سره له دې چې اسراییل د جګړې د درولو او د ایران او د دغه هېواد د نیابتي ډلو سره د پراخې سیمه ییزې شخړې د مخنیوي په موخه د یوې معاملې لپاره د نړۍوالو فشارونو سره مخامخ دی، بیا هم اسراییلي ځواکونو د دوشنبې په ورځ د غزې سویلي ښار خان یونس ته نږدې پوځي عملیاتو ته دوام ورکړی.
فلسطیني ډاکټرانو ویلي دي، چې د دوشنبې په ورځ د خان یونس په ښار کې د اسرايیلي ځواکونو په برید کې لږ تر لږه ۱۸ تنه وژل شوي او یو شمېر نور ټپیان شوي دي.
په عین حال کې ډېرې کورنۍ او بې ځایه شوي کسان له هغو سیمو څخه وتلي چې اسراییلي ځواکونو یې د تخلیې غوښتنه کړې وه.
ډاکټرانو وویل، چې د غزې ښار په زیتون ښارګوټي کې د اسراییلو په هوايي برید کې پنځه کسان او مصر سره پولې ته څېرمه په رفح کې دوه نور کسان وژل شوي دي.
لکه څنګه چې جګړه روانه وه، حماس د پنجشنبې په ورځ د مصر او قطر په منځګړیتوب د خبرو اترو وروستي پړاو ته په شک سره غبرګون وښود او ویې ویل، چې د اسراییل له خوا هېڅ اقدام نښه نه لیدل کیږي.
دې ډلې د یکشنبې په ورځ وویل، چې منځګړي باید اسراییل مجبور کړي چې د متحده ایالاتو د ولسمشر جو بایډن د نظرونو پراساس د اوربند وړاندیز ومني.
د حماس په اعلامیه کې راغلي: "مونږ دغه وړاندیز منلی او اسراییل هم باید دا کار وکړي، نه دا چې د خبرو اترو نور پړاوونه یا نوي وړاندیزونه تعقیب کړي چې د اشغال د دوام بهانه برابره کړي".
حماس ته نږدې دوو سرچینو رویټرز خبري اژانس ته ویلي، چې دا ډله په دې باور وه، چې د خبرو لپاره نوې بلنې په اړه اسراییل سره همغږي نه ده شوې او موخه یې دا وه، چې په تهران کې د دې ډلې د مشر اسماعیل هنیه او په لبنان کې د حزب الله د یو جګپوړي مشر د وژل کېدو په اړه د ایران او حزب الله د غبرګونونو مخه ونیسي.
له دغو سرچینو یو یې ویلي: "دا د خبرو اترو د نوي وړاندیز د ردولو یوه نرمه طریقه ده. که حماس د خبرو اترو لپاره د اسراییل له خوا مثبت ځواب ترلاسه کړي، ښايي وضعیت بدل شي، خو تر دې دمه حماس په دې باور دی چې نتانیاهو یوې موافقې ته د رسیدو لپاره جدي نه دی."
خبرو اترو ته د حماس غبرګون په داسې حال کې راځی چې د پراخې جګړې لپاره چمتووالی زیات شوی، واشنګټن منځني ختیځ ته د لارښود توغندیو بېړۍ لیږلې او د ابراهیم لینکن د برید ډلې په سیمه کې د ځای پرځای کیدو هڅې ګړندۍ کړي.
د اسراییل د دفاع وزیر یوف ګالنټ د امریکا د دفاع وزیر لویډ اسټین ته وویل، چې ایران په اسراییل باندې د لویې کچې پوځي برید لپاره چمتووالی نیسي.
