د امریکا ولسمشر هیله څرګنده کړه، چې ایران به له اسراییله د اسماعیل هنیه غچ نه اخلي
د امریکا ولسمشر جوبایډن د یوې خبري غونډې پر مهال د یوې پوښتنې په ځواب کې وویل، هیله لري چې ایران به د غزې تر اوربنده د حماس د مشر اسماعیل هنیه د وژل کېدو غچ نه اخلي.
د امریکا ولسمشر جوبایډن د یوې خبري غونډې پر مهال د یوې پوښتنې په ځواب کې وویل، هیله لري چې ایران به د غزې تر اوربنده د حماس د مشر اسماعیل هنیه د وژل کېدو غچ نه اخلي.
هغه وویل، چې د اوربند په اړه خبرې اترې ستونزمنې دي.
له بلې خوا د امریکا د بهرنیو چارو وزارت ویاند ویدانت پټېل هم ویلي، چې د یرغمل شویو بندیانو خوشې کول او په غزه کې د اوربند هوكړه به داسې فضا رامنځته کړي چې سیمه له تاوتریخوالي څخه ووځي.
د اسرابیلي رسنیو په وینا، د ایران حکومت له لویدیځو هېوادونو او امریکا سره د غچ اخیستنې د څرنګوالي په اړه په خبرو بوخت دی.
د امريکا د بهرنيو چارو وزير انتوني بلېنکن په دې هڅه کې دی، چې کړکېچ کم کړي.
په ورته وخت کې د امریکا د بهرنیو چارو وزیر پر اسراییل د ۲۰ میلیارده ډالرو په ارزښت د پوځي تجهیزاتو پلور منظور کړی دی.
د اسراييلي رسیو د راپورونو له مخې، د جګړې په زياتېدو سره چين له ايران سره د ورېښمو بله لار جوړوي.
وروسته له هغه چې حماس د پنجشنبې په ورځ د اوربند په خبرو کې له ګډون څخه انکار وکړ، د امریکا، قطر او مصر په منځګړیتوب په غزه کې د اوربند لپاره د خبرو هڅې روانې دي.
حماس د نورو خبرو پر ځای په تېرو خبرو کې د منل شویو شرطونو د عملي کېدو غوښتنه کړې ده.
تمه کېږي، چې په غزه کې د اوربند د خبرو بل پړاو به د پنجشنبې په ورځ په قطر کې ترسره شي.
اسراييل له یوې خوا په غزه کې د اوربند په اړه د خبرو اترو لپاره د خپل پلاوي د لېږلو غوښتنه کړې؛ خو له بلې خوا پر غزې د بريدونو لړۍ هم روانه ده.
په تېرو ۲۴ ساعتونو کې په غزه کې د اسراییل د بریدونو په پایله کې ۳۲ تنه فلسطینیان وژل شوي دي.
