کییف وايي، چې روسیې د دوشنبې په ورځ پر اوکراین د شاوخوا ۲۰۰ توغنديو او بې پیلوټه الوتکې پر مټ بریدونه کړي، چې پنځه کسان په کې وژل شوي او په ټول هېواد کې یې د برېښنا تاسیسات په نښه کړي دي.
بل خوا د ناټو غړی هېواد پولنډ وايي، چې ښايي یوه بې پېلوټه الوتکه د دوی فضايي حریم ته ننوتې وي.
د کییف د ځینو برخو په ګډون په ډېرو سیمو کې برېښنا پرې شوې او د اوبو رسولو چارې بندې شوي دي.
دغه برید په شاوخوا لسو سیمو کې برېښنا یا نور مهم بنسټیز تاسیسات په نښه کړي دي.
روسیې د مارچ په میاشت کې په پراخه توګه د اوکراین د برښنا پر تاسیساتو خپل بریدونه زیات کړي وو.
کییف هغه مهال ویلي وو، چې دغه بریدونه د اوکراین د بنسټیزو تاسیساتو د خرابولو په موخه ترسره کیږي، چې خلکو ته ژوند لا پسې سخت کړي.
د دوشنبې ورځې د توغندیو او بې پیلوټه الوتکو بریدونه په څو وروستیو اونیو کې د روسیې تر ټولو سخت بریدونه بلل شوي دي.
بل خوا اوکرایني ځواکونو د روسیې په سوېلي کرسک سیمه کې ډېر شمېر کلي نیولي دي؛ خو روسي ځواکونه بیا د اوکراین په ختیځ کې په دوامداره توګه پر مخ روان دي او لا ډېرې سیمې نیسي.
ولسمشر ولادیمیر زېلینسکي د روسیې د وروستي برید په اړه ویلي: "دا یو له سترو ګډو بریدونو څخه وو. له سلو څخه زیات توغندي او شاوخوا سل بې پېلوټه الوتکې په کې کارېدلې وې. دغه برید د روسیې د پخوانیو بریدونو په څېر د ملکي خلکو مهم بنسټیز تاسیسات په نښه کړي دي دي."
پولنډ بیا وايي؛ یو څه چې دوی فکر کوي ښايي ډرون الوتکه وي، د دوی فضایي حریم ته ننوتلې او ښايي د پولنډ خاورې کې ښکته شوی وي او لټون یې روان دی.
د اوکراین لومړي وزیر ډینس شمهال په وینا؛ د اوکراین ۱۵ سیمې د توغندیو او ډرون د بریدونو له امله زیانمنې شوې دي.
زېلینسکي بیا ویلي، چې د برېښنا تاسیسات ته "ډیر زیان" رسیدلی دی.
د کییف لوړپوړو چارواکو له خپلو لویدیځو متحدینو او د وسلو له برابرونکو وغوښتل چې پر روسیې د اوږد واټن توغندیو د بریدونو اجازه ورکړي.
زېلینسکي د پولنډ په څېر متحدینو باندې هم غږ کړی، چې د اوکراین په فضا کې د توغندیو او ډرون په ویشتلو کې ورسره همکاري وکړي.
په ازبکستان کې د امریکا سفیر وايي، د افغان پوځ ۴۶ الوتکې به د ازبکستان تر څارنې لاندې پاتې شي.
په ازبکستان کې د امریکا سفیر جوناتن هینیک ازبک کوون نیوز ورځپاڼې ته ویلي، چې امریکا او ازبکستان د افغان پوځ اړوند د هغو جنګي الوتکو او پوځي چورلکو د وضعیت په اړه موافقې ته رسېدلي، چې د افغان پېلوټانو له خوا په ۲۰۲۱ کال کې ازبکستان ته وړل شوې وې.
د دې پوښتنې په ځواب کې چې ایا دغه الوتکې او چورلکې به په ازبکستان کې پاتې شي، هینک وویل: "دغه پوځي وسایط به په ازبکستان کې پاتې شي، په دې اړه موافقه شوې ده."
هینیک یادونه وکړه، چې ازبکستان او امریکا په دې مساله کې ګډ کار ته دوام ورکوي او زیاته یې کړه: "دا الوتکې او چورلکې هیڅکله د افغانانو ملکیت نه وو، دا د امریکا ملکیت دی. افغان پوځ دغه الوتکې او چورلکې کارولې؛ خو موږ یې تل مالکان وو. "
وروسته له هغه چې د ۲۰۲۱ کال په اګست میاشت کې طالبانو د افغانستان واک تر لاسه کړ، د افغان پوځ ګڼې جنګي الوتکې او پوځي چورلکې د افغان پوځیانو له خوا ازبکستان او تاجکستان ته یوړل شوې.
د ازبکستان د څارنوالۍ دفتر د ۲۰۲۱ کال د اګست په ۱۵مه ویلي وو، چې د افغان وسله والو ځواکونو ۲۲ پوځي الوتکې او ۲۴ چورلکې د ازبکستان له هوايي حریم څخه سرغړونه کړې او دغه هېواد ته ننوتلي دي.
په داسې حال کې چې طالبانو له ازبکستانه د دغو الوتکو د بېرته اخیستو غوښتنه کړې، ازبکستاني چارواکو ویلي، چې له امریکايي لوري سره د یادو پوځي وسایطو د وضعیت په اړه لا هم خبرې روانې دي.
د پاکستان جیونیوز د بلوچستان د موسیخیلو د سیمي د پولیسو د مشر ایوب خان اڅکزي له قوله راپور ورکړی، چې تېره شپه وسله والو په یاده سیمه کې ۲۳ سورلۍ له موټرونو راښکته کړې او په ډزو یې وژلي دي.
اڅکزي ویلي، چې وسله والو کسانو د دوو ایالتونو لویه لاره تړلې وه او خلک یې له موټرونو راښکته کول او په نښه شوي کسان یې په ډزو وژل.
نوموړی زیاتوي، چې وسله والو کسانو ۱۰ موټرونه هم سوځولي دي.
په بلوچستان کې ځايي رسنیو خبرونه خپاره کړي، چې له تېرې شپې راهیسې، په کوټه، ګوادر، قلات، مستونګ، لسبېله، سبۍ او تربت کې د پاکستان پر پوځیانو بریدونه شوي دي.
د ځايي سرچینو په حواله، چې د کوټې ـ کراچې لویه لاره او د بلوچستان ایالت یو شمیر نورې لارې هم د بلوڅ وسله والو له لوري بندې شوې وې.
په ورته مهال د لارې د تړل کېدو ځینې ویډیوګانې هم خپرې شوې چې لیدل کیږي یو شمیر نظامي موټرونه هم سوځول شوي او خال خال ډزې اوریدل کیږي.
په ځينو ويډيوګانو او انځورونو کې د لویې لارې ویجاړ شوي پلونه هم ښکاري چې ویل کیږي وسله والو په بمونو الوځولي دي.
د راپورنو له مخې تېره شپه د دغو وسله والو له لوري د ډبرو سکرو په بار ۱۷ موټرونه هم سوځول شوي دي.
بل خوا بلوڅ وسله والو د یوې خبرپاڼې په خپرولو سره په بلوچستان کې پر پاکستاني ځواکونو د ځینو بریدونو مسوولیت منلی دی.
په خبرپاڼه کې ویل شوي چې بلوڅ وسله والو په بلوچستان ایالت کې د (هیروف) په نوم عملیات پیل کړي او د تیرې شپې په عملیاتو کې یې پاکستاني ځواکونو ته د مرګ ژوبلي اړولو ادعا هم کړې ده.