د پاکستان پخواني لومړي وزیر عمران خان په ګډون په اډیاله زندان کې له ټولو بندیانو سره پر لیدو بندیز به د اکټوبر تر ۱۸ نېټې دوام ولري. د پاکستاني رسنیو د راپورونو له مخې، په اډياله زندان کې له بندیانو سره په لیدو بندیز د امنیتي ګواښونو له امله لګېدلی.
د معلوماتو له مخې د پاکستان د پخواني لومړي وزیر او د تحریک انصاف ګوند مشر عمران خان سره د ګوند د غړو، وکیلان او د کورنۍ د غړو په لید کتو هم بندیز ولګېد.
د پاکستان جیونیوز د اډیاله زندان د سرچینو په حواله د دوشنبې په ورځ د (تلې ۱۶مه) په خپل راپور کې ویلي، چې په اسلام اباد کې د شانګهای همکاریو سازمان د غونډې په مناسبت د اډیاله زندان د امنیت د ټینګولو پرېکړه شوې ده.
د اډیاله زندان سرچینو ویلي، چې په دغه زندان کې له بندیانو سره پر لیدنو د بندیز لګولو پرېکړه د پنجاب حکومت کړې ده.
د پنجاب حکومت د پرېکړې له مخې، په یاد زندان کې د نورو عامو بندیانو سره پر لیدنو هم بندیز لګول شوی.
د پاکستان مرکزي حکومت د شانګهای همکاریو سازمان غونډې ترسره کېدو له امله په اسلام باد کې کلک امنیتي تدابیر نیولي.
دا په داسې حال کې ده، چې دوه ورځې مخکې د پاکستان تحریک انصاف ګوند غړو او پلویانو د دغه ګوند د بندي مشر عمران خان د خلاصون په پار لاریون وکړ.
