افغان کرېکټ بورډ د یوې خبرپاڼې په خپرولو سره ویلي، چې د افغانستان الف کرېکټ ملي لوبډله نن دوشنبه (تلې ۱۶مه) له عمان او هانکانګ سره په درې اړخیزه لوبلړۍ کې د کډون په موخه عمان هېواد ته روانه شوه.
کرېکټ بورډ ویلي، چې د عمان هېواد په کوربتوب له عمان او هانکانګ الف لوبډلو سره درې اړخیزه لوبلړۍ د روانې اکټوبر میاشتې په ۱۳مه پیلیږي او تر ۱۵مې به دوام ولري.
افغان ابدالیان لوبډله له رسمي لوبو وړاندې د اکټوبر په نهمه او ۱۰مه نېټه د عمان له الف لوبډلې سره دوه تمریناتي لوبې هم کوي.
کرېکټ بورډ لیکلي، چې افغان ابدلیان لوبډله به له درې اړخیزې لوبلړۍ وروسته په ایمرجېنګ اسیا جام سیالیو کې هم برخه واخلي.
د ایمرجېنګ اسیا جام سیالۍ هم د روانې اکټوبر میاشتې په ۱۸مه نېټه پیلیږي.
افغان کرېکټ بورډ د یادو سیالیو لپاره تېره ورځ نوملړ هم په ډاګه کړ.
د کرېکټ بورډ له لوري په عمان کې د درې اړخیزې لوبلړۍ او ایمرجېنګ اسیام جام سیالیو لپاره د درویش رسولي په لوبډل مشرۍ، صدیق اتل، زبید اکبري، نعمان شاه، وفي الله ترخیل، شاهدالله کمال، محمد اسحاق، شرف الدین اشرف، ننګیال خروټي، کریم جنت، قیس احمد، الله محمد غضنفر، فریدون داودزی، عبدالرحمن، بلال سمیع لوبډله اعلان کړله.
په دغې لوبډله کې سلیم صافي، صدیق پاچا، بشیر احمد افغان او حسن عیسی خیل د احتیاطي لوبغاړو په توګه اخیستل شوي دي.
