د ایران د اسلامي شورا د کورنیو چارو د کمېسیون مشر پر افغان کډوالو د ایراني سرحدي ځواکونو د ډزو په اړه وويل؛ هغه کسان، چې د امنيتي مسايلو په پام کې نه نيولو سره د ایران له پولو تيرېږي د قانون خلاف عمل دی.
محمد صالح جوکار د چهارشنبې په ورځ له ایران دیده بان رسنۍ سره په مرکه کې وویل، د یوه هېواد پوله دقیق او روښانه تعریف لري، چې له نړۍوال اړخه هم منل کېږي.
د ایران پارلمان دغه غړي د دې پوښتنې په ځواب کې چې ایا د ایران سرحدي ځواکونو پر افغان کډوالو ډزې کړې دي او که نه زیاته کړه: «د سرحد ساتونکي باید خپله دنده سرته ورسوي او د ایران خاورې ته د بهرنیو اتباعو د غیر قانوني ننوتلو مخه ونیسي، ځکه دا موږ ته د منلو وړ نه ده، چې هر څوک کولای شي په اسانۍ سره د ایران له پولو تېر او زموږ هېواد ته داخل شي.»
محمد صالح جوکار په اسلامي شورا کې د یزد ولایت استازی دی.
هغه وويل؛ که کډوال غواړي په ايران کې کار وکړي، بايد په قانوني ډول دغه هېواد ته داخل شي.
د نوموړي په خبره په ايران کې د مېشتو افغان کډوالو له نيمايي ډېر د اوسېدو اسناد نه لري.
محمد صالح جوکار ادعا وکړه، چې د استوګنې له اسنادو پرته افغانان په ایران کې د خلکو لپاره امنیتي ستونزې راپېدا کړې او ایرانیان په دې اړوند نیوکي لري.
له بلې خوا د ایران د کورنیو چارو وزیر اعلان کړی، چې د کډوالۍ د ملي ادارې د جوړولو لایحه چمتو ده او ډېر ژر به پارلمان ته وړاندې شي.
سکندر مومني زیاته کړه، چې ایران د کډوالو ضد روحیه نه لري؛ خو د کډوالو د اداره کولو لپاره یې د هغوی بیرته ستنولو ته لومړیتوب ورکړی دی.
ایراني سرحدي ځواکونو پر افغان کډوالو ډزې کړي
په دې وروستیو کې د سیستان او بلوچستان په سراوان ښار کې د ایراني سرحدي ځواکونو له خوا پر افغان کډوالو د ډزو راپورونه خپاره شول.
د حال وش په نوم د بشري حقونو سازمان، چې د دغه سيمې خبرونه خپروي، په تېرو دوو اونیو کې د ایراني سرحدي ځواکونو له لوري پر افغان کډوالو د ډزو د دوو پېښو خبر ورکړی دی.
د دغه سازمان په وینا؛ په دغو ډزو کې لسګونه افغان کډوال وژل شوي او ټپیان شوي دي.
ایراني چارواکو پر افغان کډوالو ډزې رد کړي؛ خو طالباند یو پلاوی په ټاکلو سره د موضوع څېړنه کوي.
له دې پېښې څخه څه دپاسه یوه اونۍ تیریږي؛ خو تر اوسه پوري کوم تفصیلي راپور نه دی خپور شوی.
