د ازادۍ جبهه: په میمنه کې مو د طالبانو پر سرحدي کنډک برید کې ۲ وسله وال وژلي

د افغانستان د ازادۍ جبهې په اېکس خواله رسنۍ خپور کړي پیغام کې ویلي، چې د فاریاب ولایت مرکز میمنې ښار کې یې د طالبانو پر سرحدي کنډک برید کړی دی.

د افغانستان د ازادۍ جبهې په اېکس خواله رسنۍ خپور کړي پیغام کې ویلي، چې د فاریاب ولایت مرکز میمنې ښار کې یې د طالبانو پر سرحدي کنډک برید کړی دی.
د دغې جبهې په وینا، په یاد برید کې دوه طالب وسله وال وژل شوي او دوه نور ټپیان دي.
د ازادۍ جبهې پر اېکس یوه ویډیو هم خپره کړې، چې په کې د چاودنې غږ اوریدل کیږي.
تر دې وړاندې، د خواله رسنیو ځینو کاروونکو په مینې ښار کې د یوې چاودنې د اوریدو خبر ورکړی و.
طالبانو تر اوسه د دغه برید په اړه څه نه دي ویلي.


طالبانو ویلي، چې د ازبکستان لوی مفتي نورالدین خالق نظر د یو لوړ پوړي دیني پلاوي په مشرۍ کابل ته راغلی دی. د طالبانو د ریاست الوزرا دفتر وايي، چې د دغه لوړپوړي مذهبي چارواکي د سفر موخه د ازبکستان او افغانستان ترمنځ د اړیکو پراختیا ده.
د دغې ډلې په خبره، چې ریاست الوزرا اداري مرستیال عبدالسلام حنفي د پنجشنبې په ورځ له ازبک پلاوي سره کتلي دي.
په دې کتنه کې د ازبکستان ستر مفتي وویل، چې د افغانستان او ازبکستان د دیني، تاریخي او کولتوري مشترکاتو له امله دواړه لوري کولای شي په بېلابېلو برخو کې خپلې اړیکې پراخې کړي.
د طالبانو د اعلامیې له مخې، حنفي افغانستان ته د ازبکستان د مذهبي پلاوي سفر د افغانستان او ازبکستان ترمنځ د دوستۍ، نږدې اړیکو، ګاونډیتوب او ګډو ګټو نښه بللې ده.
د طالبانو د رییس الوزرا اداري مرستيال وويل: «دغه سفر د دواړو هېوادونو ترمنځ د ګډو همکاريو د ټينګښت او د اړيکو د پياوړتيا په برخو کې د اغېزناکو ګامونو د پورته کولو زمينه برابروي.»
کابل ته د ازبکستان د لوړ پوړي مذهبي پلاوي سفر په داسې حال کې کېږي، چې طالبانو د اسلامي نړۍ د ډېرو دیني عالمانو د عقایدو برعکس د شریعت په نوم د افغانستان پر خلکو سخت بندیزونه لګولي دي.

د خواله رسنیو ځینو کاروونکو د کابل په کارته نو سیمه کې د یوې چاودنې خبر ورکړی.
پر خواله رسنیو په خپاره شوو انځوورونو او ویډیوګانو کې له چاودنې وروسته له سیمې لوګی پورته کیږي او د ابولانسونو غږونه اوریدل کیږي.
ځینو سرچینو ویلي، چې چاودنه د طالبانو په رنجر موټر کې د ځای پر ځای شوو چاودیدونکو توکو له امله رامنځ ته شوې او وسله والو ته یې مرګژوبله اړولې.
طالبانو لا د دغې چاودنې په اړه څه نه دي ویلي. طالب ضد ډلو هم لا د دغې چاودنې مسوولیت پر غاړه نه دی اخیستی.

سرچینو افغانستان انټرنېشنل ته ویلي، چې طالبانو د افغانستان په لږ تر لږه ۱۰ ولایتونو کې د ساکښو د انځورونو پر خپراوي بندیز لګولی.
دوی وايي، دا بندیز اوس په کندهار، هلمند، ارزګان، کونړ، خوست، تخار، بادغیس، پنجشیر او لغمان کې پلی کیږي.
دا بندیز، چې د نوي توشیح شوي "امر بالمعروف" قانون یوه برخه ده، خبریالان او خلک له فلم اخستلو منع کوي. د دغه قانون له مخې ټلویزیونونه نشي کولای د ساکښو انځورونه خپاره کړي.
د طالبانو د امر بالمعروف قانون د ۱۷مې مادې له مخې د سالرونکو موجوداتو انځور او ویډیو اخیستل منع ګرځول شوي.
د طالبانو د امر بالمعروف وزارت، چې د یاد قانون د پليتابه دنده پر غاړه لري، اعلان وکړ چې دغه بندیز به په تدریجي ډول په ټول افغانستان کې پلي کوي.
د امر بالمعروف او نهی عن المنکر وزارت محتسبان د افغانستان په ۳۴ ولایتونو کې فعال دي او دا قانون دوی ته واک ورکوي چې پر رسنیو، ښځو او وګړو بې ساري بندیزونه ولګوي.
د قانون په ديارلسمه ماده کې د ښځو غږ "عورت" ګڼل شوى او له ښځو او نجونو غوښتل شوي چې مخپټې وګرځي.

افغانستان انټرنشنل - پښتو ته د ننګرهار د ملي راډیو تلویزون د خبریال عزیز احمد وفا د کورنۍ یو غړي تایید کړه، چې طالبانو نوموړی سل ورځې وړاندې نیولی و، چې روانه اونۍ یې بېرته خوشې کړی دی.
د افغانستان له خبریالانو د ملاتړ سازمان د روان کال د زمري په ۱۷مه ویلي وو، چې په ننګرهار کې د طالبانو استخباراتو سیمهییز خبریال عزیز احمد وفا د ناڅرګندو لاملونو له امله نیولی دی.
د وفا کورنۍ وايي، چې نوموړی د طالب استخباراتو له خوا شکنجه شوی هم دی.
د ننګرهار په ملي راډیو تلویزون کې یوې سرچینې افغانستان انټرنشنل - پښتو ته وویل، چې عزیز احمد وفا د تلویزون د ادارې له خوا له دندې منفک شوی دی.
د یادونې وړ ده، چې طالبانو په وروستیو څلورو میاشتو کې نېږدې نهه خبریالان نیولي، چې ځینې یې بېرته خوشې شوي دي.

په کازان کې د برېکس غونډې په خپل پرېکړه لیک د افغانستان د ستونزو د بېړني او سوله ییز اواري غوښتنه کړې ده.
پرېکړه ليک د ښځو او بېلابېلو قومونو په ګډون د ټولو افغانانو له بنسټیزو حقونو ملاتړ کړی او له طالبانو یې غوښتي چې د نجونو پرمخ د ښوونځيو او پوهنتونونو دروازې پرانيزي.
د برېکس مشرانو د خپلې ۱۶مې غونډې په پرېکړه لیک کې، چې د چارشنبې پر ورځ (د لړم دويمه) خپور شو، په افغانستان کې د ښځو، نجونو او بېلابېلو قومونو د حقونو په ګډون د افغانانو د بنسټیزو حقونو پر خونديتوب ټينګار کړی.
په پرېکړه لیک کې افغانانو ته د بې ځنډه او بېړنيو بشري مرستو پر رسولو د ټينګار په ترڅ کې له طالبانو غوښتل شوي چې د منځنیو او لوړو زده کړو په برخه کې پر نجونو لګېدلي بندیزونه لرې کړي.
د برېکس مشرانو دا راز وویل چې "په افغانستان کې باید پاموړ او تایید وړ ګامونه ترسره شي" څو ډاډ ترلاسه شي چې ترهګر د افغانستان خاوره نه کاروي.
پرېکړه لیک وايي: « موږ له یوه خپلواک، متحد او سوله ییز افغانستان نه، چې له ترهګرۍ، جګړې او نشه يي توکو پاک وي، ملاتړ کوو."
برېکس د افغان ستونزې په اواري کې د ګاونډیو هېوادونو او سیمه ییزو پلټفورمونو پر لومړني او اغېزناک رول ټینګار کړی او په ورته وخت کې یې د افغانستان د ستونزې د اواري لپاره د سیمه ییزو نوښتونو د هڅو هرکلی کړی دی.
د برېکس ۱۶مه سرمشریزه د سه شنبې پر ورځ د لړم پر لومړۍ نېټه د روسیې فدراسیون د تاتارستان جمهوریت په کازان ښار کې پیل شوه، چې ۳۶ هېوادونو او شپږو نړیوالو سازمانونو پکې ګډون کړی و.
په دې غونډه کې د روسیې، برازیل، هند، چین، جنوبي افریقا، مصر، متحده عربي اماراتو، ایتوپیا او ایران په ګډون د غړو هېوادونو د پلاويو مشران ګډون لري.
د برېکس ډله په ۲۰۰۹ کال کې د برازيل، روسيې، هند او چين په ګډون په روسيه کې رامنځته شوه او په ۲۰۱۰ کال کې جنوبي افريقا ورسره يو ځای شوه.
دا ډله د روان کال په پیل کې د مصر، سعودي عربستان، متحده عربي اماراتو، ایران او ایتوپیا په غړیتوب سره پراخه شوه.