د تایباد ښار لوی څارنوال ویلي، چې د ایران بېلابېلو ښارونو ته په شخصي موټرو کې د «ناقانونه» افغانانو تګ منع دی. حجت صديقي وويل: د هغو موټرو خاوندان چې «ناقانونه» افغانان لېږدوي سزا دې ورکړل شي.
د هغه په وينا، د هغو موټرونو خاوندان چې بې اسناده افغانان لېږدوي، د مجازاتو تر څنګ به د ايران د ملي امنيت شورا د پرېکړې له مخې تر شپږو مياشتو پورې د هغوى موټرونه ودرول شي.
د ایران د دغه چارواکي د څرګندونو له مخې، د روان کال په لومړۍ نیمایي کې څه باندې ۲۳ زره «ناقانونه» افغانان نیول شوي او افغانستان ته لیږدول شوي دي.
نوموړي همدا راز ویلي، چې د روان کال له پیل راهیسې د تایباد په بېلابېلو سیمو کې ۱۶ کورونه چې «ناقانونه» افغانانو ته ورکول شوي وو، په نښه او د مسولانو له لوري قلفونه ور اچول شوي.
حجت صديقي وويل، چې دغه ګام د خلکو له غوښتنې او د عدلي او قضايي ارګانونو په حکم اخیستل شوى دى.
نوموړي د شنبې په ورځ د لړم په پنځمه نېټه ایرنا خبري اژانس ته ویلي، هغو کسانو چې افغانانو ته یې کورونه په کرایه نیولي وو، په وړاندې یې دوسیې ثبت کړې، عدلي او قضايي ارګانونو ته یې ورپيژندلي دي.
دایران دغه قضایي چارواکی وايي: «هغه کسان چې «ناقانونه» بهرنیانو ته د استوګنې لپاره د کورونو په سپارلو کې د املاکو د مشاورینو په شمول ګډون کړی دی دوسیې یې قضایی چارواکو ته وړاندې کوي او له قانون سره سم به ورسره چلند وشي.»
د تایباد لوی څارنوال ټینګار وکړ چې له «ناقانونه» افغانانو سره کرایه، پېر او پلور منع او سرغړونه ده.
د ایران حکومت پر افغان کډوالو فشارونه زیات کړي او په ډیرو لویو ښارونو کې یې د هغوی پر کار، فعالیتونو او تګ راتګ سخت بندیزونه لګولي دي.
د ایران د کورنیو چارو وزیر اسکندر مومني په ایران کې له مېشتو افغان کډوالو غوښتي چې «خپل هېواد ته ولاړ شي، کار وکړي او هغه ځای اباد کړئ»
دا په داسې حال کې ده، چې په افغانستان کې د شته سختو حالاتو او د طالبانو د بیا حاکمېدو له امله د بې وزلۍ او بیکارۍ د ډيروالي له امله ګڼ افغانان خپل هېواد پريږدي ایران او نورو هېوادونو ته ګډه کیږي.
د ښخو پر وړاندې د طالبانو د بندیزونو له امله د خواله رسنیو ځینو کاروونکو دغه کړنه «سمبوليک او اعتراضي» بللې ده.
د ملي روغې جوړې شورا پخوانی مشر عبدالله عبدالله د دوه انځورونو په خپرولو سره لیکلي، چې د شنبې پر ماسپښین (د لرم ۵مه) یې د هېواد له پخواني ولسمشر حامد کرزي او یو شمېر نورو مشرانو سره کتلي دي.
دا غونډه د حامد کرزي په دفتر کې، ترسره شوې ده.
ښاغلي عبدالله د دې غونډې د موضوعاتو او په دې غونډه کې د حامد کرزي د لور د حضور په اړه څه نه دي ویلي.
ښاغلي عبدالله د دې غونډې دوه عکسونه خپاره کړي دي. لومړۍ انځور په دفتر کې د ناستې دی، چې پر حامد کرزي او عبدالله عبدالله سربېره حامد کرزي ته یو شمېر نږدي کسان هم په کې لیدل کېږي. په دې غونډه کې د ښاغلي کرزي او عبدالله تر منځ د حامد کرزي لور ناسته ده. په دوهم انځور کې چې د کرزي د دفتر په انګړ کې اخیستل شوی، درخانۍ د پخوانیو مشرانو په منځ کې ولاړه ده چې تېکرۍ یې پر اوږه پروت دی.
عبدالله عبدالله او حامد کرزی هغه مهم سیاسي شخصیتونه دي چې د طالبانو د واکمنۍ پر مهال په کابل کې پاتې شوي. دوی وخت ناوخته سره ګوري.
له ټولنې او زده کړو څخه د نجونو محرومیت له امله، د ټولنیزو رسنیو ډېری کاروونکو د پخوانیو مشرانو سره په ناسته کې د دې نجلۍ شتون ته غبرګون ښودلی.
د خواله رسنیو کاروونکي وايي، چې په ټولنه کې د نجونو او ښځو د تعلیم منع کولو او د طالبانو له خوا د هغوی د غږ "عورت" ګڼلو ته په کتو، د دې نجلۍ شتون یو "سمبوليک او اعتراضي" اقدام بلل کېدای شي.
که څه هم حامد کرزی وخت نا وخته د ښځو له فعالانو سره لیده کاته کوي او له طالبانو یې په کلکه غوښتي چې د نجونو ښوونځي او پوهنتونونه پرانیزي.
باخبرو سرچینو افغانستان انټرنشنل ته ویلي، چې درخانۍ د حامد کرزي لور ده چې په کابل کې د افغان ترک په لېسه کې زده کړې کوي. هغه د ښوونځي په دویم ټولګي کې ده.
طالبانو له شپږم ټولګي پورته د نجونو ښوونځي تړلي او نجونې د رسمي زده کړو اجازه نه لري.
د طالبانو محدودیتونو د ښځو لپاره ډېرې پایلې لرلي او د راپورونو له مخې ښځې له بې ساري ذهني او رواني فشار سره مخ دي او د ځان وژنې، جبري ودونو او د ښځو پر وړاندې د تاوتریخوالي ګڼ راپورونه خپاره شوي دي.
