د امریکا نړۍوالې پراختیايي ادارې ویلي چې په پاریس کې یې د ۲۰۲۴ کال په نندارتون کې د ۶۰۰ کیلوګرامه افغاني زعفرانو د پېرلو تړون لاسلیک کړ. د دغې ادارې د معلوماتو له مخې، د دغه پلور کلنی ارزښت يو میليون او ۷۰ زرو امريکايي ډالرو ته رسېږي.
د امريکا نړۍوالې پراختيايي ادارې د دوشنبې په ورځ د (لړم ۱۴مه) ویلي، چې دغه تړون به د نړۍ په بازارونو کې د افغانستان د زعفرانو د غوره ځای نیولو او د دغه هېواد د خلکو د ژوند په ښه کولو کې مرسته وکړي.طالبان وايي، د کوکنارو پر کښت له بندیز وروسته د افغانستان په ۲۶ ولایتونو کې د زعفرانو کښت زیات شوی دی.د امریکا پراختیايي ادارې په ایکس پاڼه په یو یادښت کې لیکلي چې: «نن سبا زعفران د افغانستان لپاره د رقابتي ګټې په توګه، د نړۍ په نندارتونونو کې د ډیرو لویو پیرودونکو پام ځانته اړولی دی.»د طالبانو د سوداګرۍ وزارت د روان لمریز کال په لومړیو کې ويلي و چې، افغانستان په ۱۴۰۲ کال کې د ۴۹ میلیونه ډالرو په ارزښت ۶۷ ټنه زعفران نهو هېوادونو ته صادر کړي و.په بلجیم کې د «مزه» په نوم نړۍوال انسټیټیوټ هم سږکال ویلي و چې د هرات زعفران د لابراتوار ازموینې وروسته د خوند له پلوه لومړی ځای خپل کړ.په افغانستان کې د جاپان له لوري په لومړي ځل په ۲۰۱۲ کال کې د زعفرانو ازمایښتي کښت وشو چې هغه مهال یې پایله ښه او له هغې وروسته افغانستان کې د زعفرانو کښت او تولید زیات او د سیمې او نړۍ پام یې ځانته واړاوه.ایراني چارواکو څه موده وړاندې دعوه کړې وه چې د دغه هیواد زعفران افغانستان ته قاچاق کیږي او له هغه ځایه نورو هیوادونو ته د افغانستان په نوم صادریږي، چې د طالبانو حکومت دغه ادعا په کلکه رد کړه.
