د لبنان د روغتیا وزارت وايي، چې د ۲۰۲۳ کال د اکټوبر په میاشت کې د اسراییل او حزب الله تر منځ د جګړې له پیل راهیسې په لبنان کې څه باندې درې زره کسان وژل شوي او تر دیارلس زره زیات ټپیان شوي دي.
اسراییل وايي، په لبنان کې به د حزب الله د مرکزونو په نښه کولو لپاره خپلو بریدونو ته دوام ورکوي.
د روغتیا نړۍوال سازمان ویلي، په تېر کال کې پر مرستندویه ځواکونو له ۲۰۰ ډېر بریدونه شوي، چې په پایله کې یې ۱۵۱ مرستندویه کارکوونکي وژل شوي او ۲۱۲ نور ټپیان شوي دي.
د اسوشیېټډ پرېس اژانس د خبر له مخې، په لبنان کې د جګړې د پای ته رسېدو کومه نښه نه لیدل کېږي او دمګړۍ اسراییل په دغه هېواد کې د حزب الله پر ضد نوي عملیات کوي.
حزب الله چې د ایران متحد دی، د تېر کال په اکتوبر میاشت کې د اسراییل او حماس تر منځ د جګړې له پیل وروسته د اسراییل پر شمالي سیمو د راکټونو وېشتل پیل کړل، چې له هغه وروسته اسراییل پر لبنان هم خپل بریدونه پیل کړل.
