د روسیې د بهرنیو چارو وزیر ویلي، که واشنګټن د ډونالډ ټرمپ د بیا ټاکلو له لارې اقدام وکړي، روسیه له امریکا سره د خلاصو خبرو لپاره چمتو ده. سرګي لاوروف په یوه خبري غونډه کې وویل: «موږ هېڅکله له چا سره له تماس څخه ډډه نه ده کړې، خبرې اترې تل له یو بل د جلا کېدو څخه غوره دي.»
لاوروف د پنجشنبې په ورځ (د لړم ۱۷ مه) نېټه په یوه خبري کنفرانس کې زیاته کړه: «موږ به وګورو، چې د ټرمپ د ادارې له خوا د خبرو لپاره کوم وړاندیز شته که نه. زه تکراروم، موږ هغه نه وو، چې اړیکې مو پرې کړې او دا زموږ پورې اړه نه لري، چې د بیا رغولو وړاندیز وکړو.»
دغه جګپوړي روسي ديپلومات ومنله، چې که د واشنګټن له لوري له يو اړخيزو غوښتنو پرته کوم اقدام وشي، مسکو به د خبرو لپاره خپل چمتووالی اعلان کړي.
هغه وویل: «موږ چمتو یو، چې له واشنګټن سره په دې اړه خبرې وکړو، چې موږ چیرته ولاړ یو او څنګه باید پرمخ ولاړ شو.»
سرګي لاوروف د روسیې او امریکا د اړیکو ستونزې «ډېرې ژورې» وبللې او ویې ویل، چې د امریکا مشران په دې باور دي، چې دوی باید په نړیوال ډګر کې خپل سیالان وځپي.
