په بلوچستان کې د پاکستان د پوځ په پوستې برید کې یو سرتیری وژل شوی
د پاکستان د بلوچستان ایالت د دشتې کادان سیمې په کچ ولسوالۍ کې د امنیتي ځواکونو په یوې پوستې د وسله والو برید کې یو سرتیری وژل شوی او اته نور ټپیان دي.
د پاکستان د بلوچستان ایالت د دشتې کادان سیمې په کچ ولسوالۍ کې د امنیتي ځواکونو په یوې پوستې د وسله والو برید کې یو سرتیری وژل شوی او اته نور ټپیان دي.
د خراسان ډایري په نوم یوې پاکستاني رسنۍ د خپلو سرچینو په حواله ویلي، چې د وسله والو دغه برید د پاکستان د امنیتي ځواکونو له خوا په شا تمبول شوی دی. په دې راپور کې، وسله والو ته هم د مرګژوبلې د اړول کیدو راپور ورکړل شوي، خو د دقیق شمیر په اړه یې څه نه دي ویل شوي.
تیره ورځ د پاکستان په بلوچستان کې د بلوڅ ازادي غوښتونکي پوځ په برید کې د وژل شوو کسانو شمیر ۲۷ ته پورته شوی دی. په وژل شوو کې ۱۹ پاکستاني عسکر هم شامل دي.
په پاکستان کې یو ځل بیا نا امنیو زور اخیستی او د امنیتي پیښو شمیر په زیاتیدو دی. د پاکستان حکومت او پوځ د دغو پیښو پړه د افغانستان په طالبانو اچوي او وايي، چې دوی په خپله خاوره کې د پاکستان ضد ډلو ته ځای ورکړی دی. طالبانو بیا دغه ادعاوې رد کړي دي.
پاکستاني رسنۍ اېکسپرېس ټرېبیون د پوځ د سرچینو په حواله خبر ورکړی، چې د دغه هېواد امنیتي ځواکونو تېره ورځ په وزیرستان کې د جګړې پر مهال شپږ وسله وال وژلي او یو شمېر یې ټپیان کړي. ويل کیږي دغه وسله وال د ډیورند له کرښې د وزیرستان لور ته اوښتل.
اېکسپرېس ټرېبیون د دغه هېواد د امنیتي سرچینو له قوله تېره ورځ شنبه د (لړم ۱۹مه) ویلي چې یوې ډلې وسله والو پلان درلود چې د افغانستان له لورې له ډیورنډ کرښې د شمالي وزیرستان سپین وام ولسوالۍ ته واوړي، د پاکستان د پوځ له لوري پرې برید شوی چې له امله یې شپږ وسله وال وژل شوي او یو شمېر ټپیان شوي.
پاکستاني سرچینو په دغې جګړه کې پوځ ته د اوښتې مرګ ژوبلې په اړه څه نه دي ویلي.
پاکستاني امنیتي سرچینو اېکسپرېس ټرېبیون ته ویلي، چې دغه وسله وال د حافظ ګلبهادر اړوند و او غوښتل یې چې په شمالي وزیرستان کې پر پاکستاني امنیتي ځواکونو بریدونه وکړي.
تر اوسه پورې ټي ټي پي په دې اړه څه نه دي ویلي.
تېره اونۍ په سویلي وزیرستان پر پاکستان پوځ د ټي تي پي په برید کې شپږ پاکستاني پوځيان وژل شوي و او پنځه ټپیان وو.
دغه برید داسې مهال کیږي چې بلوڅ بیلتون پالو د بلوچستان په کويټه ښار کې د رېل په یوه تمځای کې تیره ورځ د یوه ځانمرګې پرید په پایله کې د ۱۹ پاکستاني پوځيانو په ګډون ۲۶ تنه وژلي او شاوخوا ۵۰ نور یې ټپیان کړي.
پاکستاني رسنیو راپور ورکړی، چې په کویټه ښار کې د اورګاډي په یوه تمځای کې له خونړي برید وروسته د دغه هېواد د ریلوې چارواکو اندېښنې زیاتې شوې او د اورګاډو په تمځایونو کې یې د کلکو امنیتي تدابیرو نیولو لارښوونې کړې دي.
د پاکستان د ریلوې پولیسو انسپکټر جنرال راو سردار علي خان د شنبې په ورځ د کراچۍ په ګډون په ټول هېواد کې په لوړه کچه د اورګاډو د تمځایونو او تاسیساتو د امنیت ساتلو خبرداری ورکړی.
د اورګاډو د تمځایونو او ودانیو د امنیت خوندیتوب په موخه د یادې ادارې اړوند اضافي پولیس هم په مهمو تمایځایونو کې ځای پر ځای شوي دي.
د پاکستان ټریبیون ورځپاڼې په خپل یوه راپور کې ویلي، چې د دغه هېواد د اورګاډي ادارې دغه امنیتي تدابیر د پاکستان د بلوچستان ایالت د کویټې ښار د اورګاډې په یوه تمځای کې له یوې خونړۍ چاودنې وروسته نیولي دي.
د پاکستاني چارواکو له لوري امنیتي ځواکونو ته لارښوونه شوې، چې د اورګاډونو تمځایونو ته د ننوتلو او وتلو په ځایونو کې څارنه سخته کړي.
د اورګاډو په تمځایونو کې د کلکو امنیتي تدابیرو د نیولو په لړ کې د پاکستان د حکومت له لوري د اورګاډو په لویو تمځایونو کې د ماین ناکاره کولو ډلې هم ځای پرځای شوې دي او د هر اورګاډې له روانیدو مخکې د اورګاډي پلټنه کوي.
د راپورونو له مخې، د اورګاډو په تمځایونو کې د کلکو امنیتي چمتوالو په لړ کې ټول مساپر او د هغوی وسایل پلټل کیږی او د لا څار په موخه په تمځایونو کې د تګ راتګ لپاره اضافي دروازې جوړیږي.
همدارنګه پاکستاني رسنیو ویلي، چې د اورګاډو په تمځایونو کې د ځانګړو امنیتي تیاریو په لړ کې په تمځایونو کې د ښځینه پولیسو شمېر هم ډیر شوی تر څو امنیتي چاپیریال ډاډمن کړي.
پاکستاني چارواکو د پاکستان د اورګاډو په مهمو او لویو تمځایونو کې د کلکو امنیتي چمتوالي نیولو راپور په داسې حال کې ورکړی، چې تېره ورځ د پاکستان د کویټې ښار د اورګاډې په یوه تمځای کې د یوې چاودنې په پایله کې د ۱۹ پاکستاني پوځيانو په ګډون ۲۶ کسان ووژل او له ۵۰ ډیر نور ټپان شول.
د پاکستان د دفاع وزیر خواجه محمد اصف وايي، اوس هم د افغانستان خاوره د پاکستان خلاف کارول کیږي. هغه دغه خبرې په کويټه کې له یوه خونړي برید وروسته د پاکستان له یوه ټلویزیون سره په مرکه کې کړې دي.
د پاکستان د دفاع وزیر خواجه محمد اصف د پاکستان له جیونیوز سره په خبرو کې ویلي، چې اوس هم په پاکستان د نا امنۍ راوستلو لپاره د افغانستان خاوره کاریږي.
هغه دغه خبرې د بلوچستان په کويټه کې د ریل په یوه تمځای کې له هغه خونړي ځانمرګي برید وروسته کړې چې د ۱۹ پاکستاني پوځيانو په ګډون یې ۲۶ تنه وژلي او شاوخوا ۵۰ نور یې تپیان کړي دي.
خواجه اصف له دغه ټلویزیون سره په مرکه کې ويلي، چې بلوڅ بیلتون پال او ټي تي پي دواړه ډلې په افغانستان کې پټنځایونه لري او له هغه ځايه خپل بریدونه پلانوي.
هغه پر هندوستان تور پورې کړ چې د دغو دواړو وسله والو ډلو مالي ملاتړ کوي او په افغانستان کې دوی ته د پاکستان د نا امنه کولو لپاره سهولتونه برابروي.
تر اوسه پورې طالبانو او هندي چارواکو په دې اړه رسمي غبرګونونه نه دي ښودلي خو تر دې وړاندې طالبانو د پاکستان دا ډول ادعاوې بې بنسټه بللې وې.
خواجه محمد اصف په افغانستان کې واک ته د طالبانو له رسیدو وروسته هغوی ته پر خواله رسنیو مبارکي ویلې وه او هغوی یې د «خدای عسکر» بللي وو.
بلوڅ بیلتون پالو د بلوچستان په کويټه ښار کې د رېل په یوه تمځای کې د تیرې ورځې د هغه ځانمرګې برید مسوولیت په غاړه واخیست چې له امله د ۱۹ پاکستاني پوځيانو په ګډون ۲۶ تنه په کې ووژل شول او شاوخوا ۵۰ ننور په کې ټپیان شول.
د پاکستان د دفاع وزیر دا ډول بریدونه د هند «نیابتي جګړه» بللې او ویلي یې دي چې هند نه غواړي چې چین په پاکستان کې د پرمختګ چارې مخته یوسي نو د ده په خبره چې خنډونه ورته جوړوي.
په دې وروستیو کې بلوڅ بیتلون پال غورځنګ په بلوچستان کې د پاکستان او چین په هغو بسنټونو او پروژو ستر بریدونه کړي چې پاکستان یې د دغه هیواد د پرمختګ پروژې یادوې خو بلوڅان وايي، چې د دوی حق پرته د دوی له ګډونه خوړل کیږي او دوی داسې جګړې د خپلو حق غوښتلو لپاره کوي.
د افغانستان په چارو کې د امریکا پخواني استازي زلمي خلیلزاد په کوټه کې د شنبې د ورځې د خونړي برید په غبرګون وویل: «د پاکستان پوځ دې د سیاست پر ځای د پاکستاني وګړو د امنیت خوندیتوب ته پام وکړي.»
نوموړي په خپل اېکس کې لیکلي، چې د پاکستان پوځ په دې وروستیو کې خپله ټوله انرژي په سیاسي، عدلي او اقتصادي برخو کې لګولې ده.
دغه چاودنه چې په کوټه ښار کې د یوه اورګاډي په تمځای کې شوې له امله یې د ۱۹ پاکستاني پوځيانو په ګډون ۳۱ کسان وژل شوي او څه باندې ۶۰ تنه نور ټپيان دي.
د افغانستان په چارو کې د امریکا پخوانی استازی دا پېښه غندي او وایي: «په دې وروستیو میاشتو کې ورته ګڼ بریدونه یوه خبره څرګندوي، چې د پاکستان پوځي بنسټ ته پکار ده، چې خپلو اصلي مسولیتونو ته پام وکړي، یعنې د پاکستاني وګړو د خوندیتوب او امنیت ساتلو ته.»
نوموړی دغه څرګندونې په داسې حال کې کوي، چې د پاکستان پر پوځ د نوموړي نیوکې په دې وروستیو کې زیاتې شوې دي.
خلیلزاد تر دې وړاندې د پاکستاني پوځ د رییسانو د کاري مودې د غځولو په غبرګون وویل، چې د پاکستان د ملي شورا د دغه کار پایلې به د جنرال منیر د زیانمونکو سیاستونو دوام وي.
هغه دغه راز زیاته کړې وه، چې د پنځو کلونو لپاره د پاکستاني پوځ د رییسانو د کاري مودې غځول به په پاکستان کې د بې ثباتۍ، تاوتریخوالي، د ازادۍ د محدودیت او ان د دغه هېواد د مغز د تېښتې او دغه راز د اقتصادي کمزورتیا لامل شي.
د بلوچستان په مرکز کوټه کې نننی ځانمرګی برید چې د اورګاډي په یوه تمځای کې شوی، مسوولیت یې د بلوچ د ازادي غوښتونکي پوځ په غاړه اخیستی دی.
عاصم منير بیا د وژل شويو کسانو د جنازې په مراسمو کې وويل، چې د ترهګرۍ پر وړاندې مبارزه د ټولو پاکستانیانو دوامداره ملاتړ او د پوځي او ملکي ادارو همکارۍ ته اړتيا لري.
د پاکستان د پوځ مشر عاصم منیر په کوټه کې د شنبې د ورځې په ځانمرګي برید کې د وژل شویو کسانو د جنازې په مراسمو کې وویل: "د ترهګرۍ افت به هېڅکله ونه زغمل شي."
په دې چاودنه کې د ۱۹ پاکستاني پوځیانو په ګډون لږ تر لږه ۳۱ کسان وژل شوي او مسوولیت یې هم د بلوچ د ازادي غوښتونکي پوځ په غاړه اخیستی دی.
دا پېښه چې د بلوچستان په مرکز کوټه کې د اورګاډي په یوه تمځای کې شوې ده په ترڅ کې یې څه باندې ۶۰ کسان ټپيان شوي هم دي.
د راپورونو له مخې، په وژل شویو کې ۱۹ تنه امنیتي ځواکونه او پاتې نور ټول ملکي وګړي دي.
د ځينو ټپيانو روغتيايي حالت د اندېښنې وړ ښودل شوى دى.
له دې پېښې وروسته د دغه هېواد د پوځ د لوی درستیز په ګډون پاکستاني چارواکي کوټې ښار ته ولاړل.
عاصم منير د وژل شويو کسانو د جنازې په مراسمو کې وويل، چې د ترهګرۍ پر وړاندې مبارزه د ټولو پاکستانیانو دوامداره ملاتړ او د پوځي او ملکي ادارو همکارۍ ته اړتيا لري.
د پاکستان د پوځ د عامه اړیکو دفتر وویل، چې د پوځ مشر د کوټې روغتون ته هم تللی چې د ټپیانو سره وګوري او د هغوی د وضعیت ارزونه وکړي.
د پاکستان د کورنیو چارو وزیر محسن تقوي په کوټه کې خبریالانو ته وویل، چې د دغه برید عاملین به ونه بخښل شي.
هغه همدا راز د ترهګرۍ د له منځه وړلو په اړتيا ټينګار وکړ او ويې ويل، چې په وروستيو ورځو کې د امنيتي ځواکونو له خوا پنځه ترهګریز بريدونه شنډ شوي دي.
د پاکستان د کورنیو چارو وزیر هم د دغه هېواد د لومړي وزیر په حکم د دغې پېښې په اړه د څېړنو د پیل اعلان وکړ.
دې پېښې پراخ غبرګونونه راوپارول.
د روسیې ولسمشر له ترهګرۍ سره د مبارزې په برخه کې د پاکستان پر ملاتړ ټینګار کړی او امریکا، ترکیې، مالیزیا او طالبانو دغه برید غندلی دی.
دغه خونړۍ چاودنه د شنبې په ورځ د لړم په ۱۹مه هغه مهال وشوه چې د اورګاډي په تمځای کې ګڼه ګوڼه ډېره وه.
د بلوڅ ازادي غوښتونکو پوځ د دغه برید پړه پر غاړه اخیستې او ویلي یې دي، چې د برید هدف پوځیان وو.
دغه ډله چې یوه بېلتون غوښتونکې وسله واله ډله ده، په وروستیو میاشتو کې یې په پاکستان کې څو وژونکي بریدونه کړي دي.