پاکستاني رسنیو راپور ورکړی، چې په کویټه ښار کې د اورګاډي په یوه تمځای کې له خونړي برید وروسته د دغه هېواد د ریلوې چارواکو اندېښنې زیاتې شوې او د اورګاډو په تمځایونو کې یې د کلکو امنیتي تدابیرو نیولو لارښوونې کړې دي.
د پاکستان د ریلوې پولیسو انسپکټر جنرال راو سردار علي خان د شنبې په ورځ د کراچۍ په ګډون په ټول هېواد کې په لوړه کچه د اورګاډو د تمځایونو او تاسیساتو د امنیت ساتلو خبرداری ورکړی.
د اورګاډو د تمځایونو او ودانیو د امنیت خوندیتوب په موخه د یادې ادارې اړوند اضافي پولیس هم په مهمو تمایځایونو کې ځای پر ځای شوي دي.
د پاکستان ټریبیون ورځپاڼې په خپل یوه راپور کې ویلي، چې د دغه هېواد د اورګاډي ادارې دغه امنیتي تدابیر د پاکستان د بلوچستان ایالت د کویټې ښار د اورګاډې په یوه تمځای کې له یوې خونړۍ چاودنې وروسته نیولي دي.
د پاکستاني چارواکو له لوري امنیتي ځواکونو ته لارښوونه شوې، چې د اورګاډونو تمځایونو ته د ننوتلو او وتلو په ځایونو کې څارنه سخته کړي.
د اورګاډو په تمځایونو کې د کلکو امنیتي تدابیرو د نیولو په لړ کې د پاکستان د حکومت له لوري د اورګاډو په لویو تمځایونو کې د ماین ناکاره کولو ډلې هم ځای پرځای شوې دي او د هر اورګاډې له روانیدو مخکې د اورګاډي پلټنه کوي.
د راپورونو له مخې، د اورګاډو په تمځایونو کې د کلکو امنیتي چمتوالو په لړ کې ټول مساپر او د هغوی وسایل پلټل کیږی او د لا څار په موخه په تمځایونو کې د تګ راتګ لپاره اضافي دروازې جوړیږي.
همدارنګه پاکستاني رسنیو ویلي، چې د اورګاډو په تمځایونو کې د ځانګړو امنیتي تیاریو په لړ کې په تمځایونو کې د ښځینه پولیسو شمېر هم ډیر شوی تر څو امنیتي چاپیریال ډاډمن کړي.
پاکستاني چارواکو د پاکستان د اورګاډو په مهمو او لویو تمځایونو کې د کلکو امنیتي چمتوالي نیولو راپور په داسې حال کې ورکړی، چې تېره ورځ د پاکستان د کویټې ښار د اورګاډې په یوه تمځای کې د یوې چاودنې په پایله کې د ۱۹ پاکستاني پوځيانو په ګډون ۲۶ کسان ووژل او له ۵۰ ډیر نور ټپان شول.
