د افغانستان د پخواني ولسمشر حامد کرزي د دفتر رییس پر غزې د اسراییل جګړو ته په اشارې سره وایي، چې دغه هېواد د نړۍ د سترګو په وړاندې یو ملت په بمونو او لوږې سره له منځه وړي.
عبدالکریم خُرم د چهارشنبې په ورځ (د لړم ۲۳مه) پر خپلې اېکس پاڼې کاږلي: «اسراییل د نړۍ د سترګو په وړاندې ښیي، چې څنګه یو ملت په بمب، لوږې او تندې تباه کېږي، ملګري ملتونه هر څه چې چیغې وهي هېڅ ګټه نه لري، د لویو ککړو هېوادونو مشران ان د سي او پي ۲۹ کې د ګډون کولو زحمت ځان ته نه ورکوي، دا خو لا پرېږدئ چې د ګاز تولید کم کړي یا هم زیان منونوکو سره مرسته وکړي.»
خُرم د نړۍ پرمختللو وسلو ته هم اشاره وکړه او وایي: «د لا زیاتو وژونکو او وېرونکو وسلو د جوړولو سیالي ورځ په ورځ ګړندۍ کېږي؛ جګړه د نړۍ د ژوند یوه دایمي برخه ګرځېدلې ده.»
ښاغلي خُرم زیاته کړه، که چېرې په نړۍ کې حاکم نظام او د نړۍ د اداره کولو طریقه بدله نه شي، د ځمکې سیاره به له منځه ولاړه شي.
نوموړی دغه څرګندونې په داسې حال کې کوي، چې له څه باندې یوه کال راهیسې پر غزې د اسراییل بریدونه روان دي، چې د ښځو او ماشومان یې په کې زرګونه کسانو ته مرګژوبله اړولې او دغه راز یې میلیونونه فلسطینیان له خپلو کورونو بې ځایه کړي دي.
دغه جګړې له پراخو نړۍوالو غبرګونونو سره هم دي.
وړمه ورځ د ریاض په کوربتوب د اسلامي هېوادونو مشرانو یوه بېړنۍ ناسته هم وکړه، ترڅو په غزه کې د روانو جګړو مخه ونیول شي.
د یادولو ده، چې پر غزې د اسراییل د برید له پیل راهیسي ۴۳ زره او ۷۱۲ فلسطینیان وژل شوي او ۱۰۳ زره او ۲۵۸ تنه نور ټپیان شوي دي.
