په پاکستان کې د روان کال د پولیو ۵۶مه پېښه ثبت شوه
په خیبر پښتونخوا کې تازه د پولیو یوه مثبته پېښه ثبت شوه، چې له دې سره روان کال په پاکستان کې د پولیو د مثبتو پېښو شمېر ۵۶ ته لوړ شو.
په خیبر پښتونخوا کې تازه د پولیو یوه مثبته پېښه ثبت شوه، چې له دې سره روان کال په پاکستان کې د پولیو د مثبتو پېښو شمېر ۵۶ ته لوړ شو.
دغه تازه پېښه د خیبرپښتونخوا په ډېره اسماعیل خان کې په یو ۲۷ میاشتني ماشوم کې لیدل شوې ده.
له دې سره د خیبر پښتونخوا په ډېره اسماعیل خان کې د پولیو د ټولو مثبتو پېښو شمېر ۷ ته لوړ شو او په ټول خیبرپښتونخوا کې بیا ۱۵ ته رسېدلی دی.
تېره اونۍ هم په بلوچستان کې د پولیو دوه پېښې او په خیبر پښتونخوا کې یوه پېښه ثبت شوې وه.
روان کال بلوچستان د پولیو له امله تر ټولو ډېره اغېزمنه شوې صوبه ده.
د دغو ۵۶ پېښو له ډلې ۲۶ په بلوچستان کې، ۱۵ په خیبر پښتونخوا کې، ۱۳ په سند کې، پنجاب او اسلام اباد کې بیا د پولیو یوه، یوه پېښه راپور شوې ده.
روغتیایي چارواکي د دغې د مخنیوي وړ ناروغۍ د خپرېدو د ورکولو لپاره د واکسین کمپاین پر اهمیت ټینګار کوي، چې په پاکستان کې د عامې روغتیا د برخې لپاره یوه لویه ننګونه ده.
پاکستان یو له هغو دوو هېوادونو څخه دی، چې د پولیو ویروس په کې لا تر اوسه له منځه نه دی تللی.
د پاکستان روغتیایي چارواکي په کورنیو غږ کوي، چې د حکومت لهخوا په پر له پسې توګه د پولیو واکسین کمپاینونو کې په فعاله توګه برخه واخلي او د دغې ناروغۍ په مخنیوي کې دې له روغتیایي کارکونکو سره مرسته وکړي.
