طالبان: سفیر مو د عربي اماراتو له مشر غوښتي چې د افغان بندیانو د لېږد اسانتیاوې برابرې کړي
د طالبانو د بهرنیو چارو وزارت ویاند وايي، په متحده عربي اماراتو کې د دوی د حکومت سفیر بدرالدین حقاني د دغه هېواد له مشر غوښتي چې افغانستان ته د بندیانو د لېږد اسانتیاوې برابرې کړي. ضیا احمد تکل نن د ویډیو پیغام خپرولو سره وايي، ښاغلي حقاني له محمد بن زاید ال نهیان سره لیدلي.
ښاغلی تکل دا نه وايي، چې دا لیدنه کله شوې، خو زیاتوي چې د دواړو په لیدنه کې، په افغانستان کې اوسني پرمختګونه او افغانانو ته د متحده عربي اماراتو د ویزو اسانتیاوې برابرول د بحث نور موضوعات وو.
طالبان وايي د دوی سفیر په دغه هېواد کې د افغانانو د بېلابېلو ستونزو د حل یادونه هم کړې ده.
د ضیا احمد تکمل په وینا، محمد بن زاید ال نهیان په دې لیدنه کې له طالبانو سره د همکارۍ ژمنه وکړه.
د تېرې چهارشنبې په ورځ د متحده عربي اماراتو د دولت رییس د طالبانو د سفیر په ګډون د یو شمېر نویو سفیرانو باورلیکونه ومنل.
متحده عربي امارات د نورو هېوادونو په څېر د طالبانو حکومت په رسمیت نه پېژني.
په ۱۹۹۰ لسیزه کې د پاکستان او سعودي عربستان ترڅنګ دغه هېواد په نړۍ کې یوازینی هیواد وو چې د طالبانو حکومت یې په رسمیت پېژندلی و.
