چین امریکا ته په لوړه ټیکنالوژۍ کې د کارېدونکو توکو صادرات بند کړل
چین د سې شنبې په ورځ اعلان وکړ چې امریکا ته به د ګالیم، جرمانیم، انټيموني او نورو هغو مهمو توکو صادرول بند کړي چې په لوړه ټیکنالوژۍ او پوځي تجهیزاتو کې کارول کېږي.
چین د سې شنبې په ورځ اعلان وکړ چې امریکا ته به د ګالیم، جرمانیم، انټيموني او نورو هغو مهمو توکو صادرول بند کړي چې په لوړه ټیکنالوژۍ او پوځي تجهیزاتو کې کارول کېږي.
د چین د سوداګرۍ وزارت دغه پرېکړه داسې مهال اعلانوي چې واشنګټن د هغو چینایي شرکتونو د کنټرول نوملړ اوږد کړی چې د کمپیوټر چېپ جوړونې تجهیزاتو، سافټویرونو او لوړې وړتیا میموري چېپونو په صادراتو کې ښکیل دي.
دغه چېپونه په پرمختللو ټیکنالوژیو کې مهم رول لوبوي.
امریکا د صادراتو د کنټرول نوملړ ته ۱۴۰ نوي شرکتونه ور زیات کړي چې ډېری یې په چین کې دي، خو ځینې یې په جاپان، جنوبي کوریا او سینګاپور کې چینایي ملکیت لري.
دغه شرکتونه اوس د امریکایي چېپ جوړونې تجهیزاتو، سافټویرونو او لوړو ظرفیت لرونکو میموري چپونو ته لاسرسی نه لري، چې په مصنوعي ځیرکتیا او نورو پرمختللو برخو کې خورا مهم ګڼل کېږي.
چین لا له وړاندې دا شرط وضع کړی و چې امریکا ته د ګالیم په څېر مهمو موادو صادروونکي باید ځانګړي جوازونه ترلاسه کړي.
د فرانس پرېس او رویټرز د رپوټونو له مخې، د چین د سوداګرۍ وزارت د امریکا د بندیزونو د پراخولو غندنه وکړه او ژمنه یې وکړه چې د خپل هېواد “حقونه او ګټې” به خوندي کړي.
د نړۍ د دوو لویو اقتصادونو ترمنځ دغه کړکېچ پر ټیکنالوژۍ د واکمنۍ پر سر روانه سیالي نوره هم توده کړې، چې اغېزې به یې له دفاعي صنعت څخه تر مصرفي برښنایې وسایلو پورې پراخې وي.