د طالبانو د امربالمعروف او نهي عن المنکر وزارت وايي، چې په کابل کې یې د ارزو ټلویزیون د «اسلامي ارزښتونو د ساتنې او له رسنیو څخه د ناسمې ګټې اخیستنې» د مخنیوي په موخه تړلی دی. د طالبانو استخباراتو او امربالمعروف کارکوونکو تېره ورځ په کابل کې د ارزو ټلویزیون دفتر تړلی.
د طالبانو د امربالمعروف او نهي عن المنکر وزارت نن پنجشنبه د (لیندۍ ۱۵مه) د یوې خبرپاڼې په خپرولو سره ویلي، چې په کابل کې یې د ارزو ټلویزیون دفتر د تړلو پرېکړه د «اسلامي ارزښتونو د ساتنې او له رسنیو څخه د ناسمې ګټې اخیستنې» د مخنیوي په موخه کړې ده.
د طالبانو په خبرپاڼه کې راغلي، چې «د اسلامي ټولنې د پرمختګ لپاره اړینه ده چې رسنۍ د بیان ازادي ولري او د اسلامي اخلاقو او اصولو سره سمې مخته ولاړې شي، نو ځینو کسانو د ارزو ټلویزیون له نوم څخه په ګټې اخیستنې د اسلامي ارزښتونو او ملي عنعناتو سره په ټکر کې کړنې ترسره کولې، چې د ټولنې د اصلاح او سالمې لارې ته د راګرځېدو لپاره اړتیا وه چې یادې ستونزې په جدي ډول وڅېړل شي.»
د افغانستان د خبريالانو مرکز تېره ورځ د یوې خبرپاڼې له لارې په کابل کې د ارزو تلويزيون تړل او د اوو کارکوونکو نيول غندلي او دا یې د بیان ازادۍ او د رسنیو له حقونو ښکاره سرغړونه بللې ده.
ځینو باوري سرچینو ویلي، د ارزو ټلویزیون کارکوونکي له افغانستان انټرنشنل او امو شبکو سره د همکارۍ په شک نيول شوي دي.
د طالبانو امربالمعروف په خبرپاڼه کې له ټولو رسنیو غوښتي چې د خپلو فعالیتونو پر مهال د «اسلامي ارزښتونو، ملي ګټو، او ټولنیزو اخلاقو درناوی وکړي او د یوې سالمې او هوسا ټولنې د جوړولو لپاره کار وکړي.»
دا لومړی ځل نه دی چې د طالبانو استخباراتي اداره او امربالمعروف وزارت په کابل کې خبریالان نیسي، ګواښي یې او رسنۍ یې ورتړي، تر دې وړاندې هم طالبانو هغه رسنۍ تړلې او خبریالان یې بندیان او شکنجه کړي چې د دوی له منفي کړنو یې پرده پورته کړې او په دې اړه یې معلومات خپاره کړي.
