د طالبانو د ټولګټو وزارت ویاند وايي چې د ۴۶۷.۷ میلیونه افغانیو په ارزښت د کابل هرات پر لاره د ۱۴ نویو جوماتونو د جوړېدو چارې په چټکۍ سره روانې دي. دغه جوماتونه د طالبانو د مشر ملا هبت الله د حکم پر اساس د ټولګټو وزارت له خوا جوړېږي.
د طالبانو د ټولګټو وزارت ویاند اشرف حق شناس نن شنبې « د لیندۍ۱۷مه» په اېکس پاڼه کې لیکلي چې د کندهار ـ هرات لویې لارې په اږدو کې د دې ۱۴ جوماتونه څخه یې شپږ جوماتونه د کابل ـ کندهار او اته نور یې د کندهار ـ هرات ترمنځه غځیدلي سرک په اږدو کې جوړېږي.
د طالبانو د ټولګټو وزارت وايي چې د دې جوماتونو چارې یې بېلابېلو ساختماني شرکتونو ته ورکړي دي.
دوی زیاتوي چې د پیل شوو جوماتونو چارې به د یوه کال موده کې بشپړې شي.
د طالبانو د ټولګټو وزارت ویلي چې د دې ډلې د مشر ملا هبت الله د یو فرمان پر اساس چې په ټول هېواد کې د هر ۷۰ کېلو مېټره واټن ترمنځه به یو یو جومات جوړوي.
طالبان وايی د لویو لارو په اږدو کې په ټول هېواد کې ۷۵ جوماتونه له محراب سره جوړېږي.
د طالبانو ټولګټو وزارت وايي چې د هرات جومات لپاره درې جریبه ځمکه ځانګړې شو ده، چې په یو وخت سره به ۳۰۰ لمونځ کوونکي ځایولی شي، چې له دې جملي څخه ۱۷۰ نارینه او ۱۳۰ تنه بیا ښځینه لمونځ کوونکو ته په جلا توګه د اوس او لمانځه ادا کولو لپاره ځایونه په پام کې نیول شوي دي.
د افغانستان پر لويو لارو د استراحت، ډوډۍ خوړلو او شپې تېرولو مجهز او عصري ځايونه ډېر کم دي، چې زيات مهال پر دې لارو تلوونکي کسان د ستونزو سره مخ وي.
د طالبانو تر واک لاندې د افغانستان برېښنا شرکت ځینو کارکوونکو نن « د لیندۍ۱۶مه» وویل چې تېره پنجشنبه د طالبانو استخباراتو برېښنا شرکت کلابند کړی و.
عیني شاهدان وايي استخباراتو د شرکت د کارکوونکو په ځانګړي ډول د بشري سرچینو ادارې له ټولو کارمنانو موبایلونه ور سره یووړل.
د طالبانو استخباراتو د برېښنا شرکت کارکوونکو ته ویلي چې موبیلونه او اداري لېپټاپونه به په مکمل ډول وڅېړل شي ترڅو هغه کسان پیدا کړي چې د دې ادارې د فساد اسناد یې رسنیو ته لېږلي دي.
د افغانستان د برښنا شرکت یو کارمن« نن شنبې هم د طالبانو اسخباراتو برېښنا شرکت کلابند کړی او د ټولو شعبو او دفترونو کمپیوټرونو کې دفتري او یاهم شخصي اېمیلونه ګوري ترڅو معلومه کړی چې له دې ادارې څوک سندونه بهر ته باسي»
ځیني کارکوونکي وايي چې دوی په موبایلونو کې شخصی انځورونه او ویډیوګانې هم لري چې دا د دوی پر شخصي حریم تېری دی.
دوی زیاتوی استخبارات د طالبانو د برېښنا شرکت رییس عبدالباري عمر په شخصی غوښتنه دا څېړنه پیل کړې ده، ځکه څو ورځې وړاندې هغه لېستونه په ټولنیزو رسنیو کې خپاره شول چې د طالبانو د برېښنا رییس عبدالباري عمر ۴۰ نژدې خپلوان ګمارلي دي.
د طالبانو تر واک لاندې د افغانستان برېښنا شرکت کې روان فساد
افغانستان انټرنشنل د هغو لېستونو کاپي هم ترلاسه کړې ده، چې د افغانستان د برېښنا شرکت لپاره د طالبانو رییس عبدالباري عمر د دې ادارې په بېلابیلو پوسټونو کې شاوخوا ۴۰ نژدې خپلوان ګمارلي دي.
په دې لېستونو کې لېدل کېږي چې له ۳ بست نیولې تر ۹ بست پورې یې کسان ګمارلي دي چې یوازې ټول د لوګر د مرکز پل علم اوسېدونکي دي او پخپله دا رییس هم د همدې سیمې دی.
د طالبانو سرچینې افغانستان انټرنشنل ته وویل، د دې لېستونو خپرېدو سره د اوسني رییس عبدالباري عمر په اړه په کابل کې د طالبانو تر منځه بحثونه جوړ شوي دي.
د سرچینې په وینا« په ټولنیزو رسنیو کې د برېښنا شرکت کې د ګمارنو د لېستونو د خپرېدو له امله عبدالباري عمر له استحباراتو غوښتنه کړې ده چې د دې اداري د کاروونکو ټول موبایلونه او اداري کمپیوټرونه وکتل شي ترڅو معلومه شي چې څوک دغه سندونه له دې ادارې بهر کوي»
افغانستان انټرنشنل پښتو د طالبانو تر واک لاندې د افغانستان برېښنا شرکت اړوند بېلابېل د فساد سندونه خپاره کړي دي.
یو له دغو راپونو د برېښنا شرکت له خوا د بډو بدل کې د برېښنا د ۸۲ نويو لګول شویو ټرانسفرمرونو لېست هم دی.
په دغه راپور کې راغلي و چې کابل کې د برېښنا پر کمښت سربېره بیا هم طالبانو دغه ټرانسفرمرونه فابریکو او سوداګریزو وداینو ته لګولي.
د افغانستان انټرنشنل د بل راپور له مخې چې د اسنادو له مخې جوړ شوی و، د طالبانو تر واک لاندې د افغانستان برېښنا شرکت عمومي رییس عبدالباري عمر، د ملا هبت الله اخوندزاده د فرمان خلاف کمارنې کړې دي.