د افغانستان فوټبال فدراسيون له لوري د اتلانو لیګ د څلورم پړاو سيالیو پر مهال د شنبې په ورځ لومړۍ لوبه کې د فراه ابومسلم لوبډلې سرپل خدیم اف سي ته درې پر يو ماتې ورکړه. د سياليو دويمه لوبه د فراه عدالت او فاریاب سرسبزیاشلر لوبډلو ترمنځ ۲ پر ۲ مساوي پای ته ورسېده.
د فراه ابومسلم لوبډله، چې تر ډېره د سياليو د قهرمانۍ هڅه کوي په خپل ترکيب کې د افغانستان د ملي لوبډلې د لوبغاړو ترڅنګ بهرني لوبغاړي هم له ځان سره لري.
دغې لوبډلې په بريا د سياليو پيل وکړ او په خپله لومړۍ لوبه کې يې درې امتيازونه تر لاسه کړل.
د فراه ابومسلم لوبډله کې افریقايي لوبغاړي ایمانويل یاغر، لوبډلمشر امان الله سرداري او جبار شيرزي ګولونه وکړل.
د همدې سياليو د شنبې د ورځي دويمه لوبه د فراه عدالت او فاریاب سرسبز یاشلر لوبډلو ترمنځ ۲ پر ۲ مساوي پای ته ورسېده.
په همدې سيالۍ سره دواړو لوبډلو یو یو امتياز تر لاسه کړ.
د افغانستان د فوټبال اتلانو لیګ څلورم پړاو سيالۍ د جمعې په ورځ په هرات ولایت کې د ۱۲ لوبډلو ترمنځ پیل شوې.
د طالبانو تر واک لاندې د المپيک، بدني روزنې عمومي رياست وايي د وزلوبې شپږم پړاو سیالیو لومړۍ لوبه کې سرپل لوبډلې خپلې سیالې فارياب ځوانانو لوبډلې ته د ۷/۰ امتيازونو په توپير ماتې ورکړه او د ياد ليګ لومړۍ بريا يې خپله کړه. د لیګ په لومړی ورځ د درې لوبډلو ترمنځه سیالۍ شوې دي.
د طالبانو تر واک لاندې د المپيک، بدني روزنې عمومي رياست نن شنبې « د لیندۍ ۱۷مه» په اېکس کې لیکلي چې د وزلوبې شپږم پړاو ليګ کې د سرپل، تخار، هرات، جوانان فاریاب، یما پطرولیم، بدخشان، بغلان، پنجشېر، جوانان بلخ، سمنگان او کندز لوبډلو کډون کړی.
طالبان وايي د وزلوبې په شپږم پړاو لیګ کې کې د افغانستان پر چاپندازانو سربېره د تاجکستان او قزاقستان چاپندازان هم شته.
د دغو سياليو په لومړۍ ورځ درې لوبې ترسره شوې، چې لومړۍ لوبه کې سرپل لوبډلې خپلې سیالې فارياب ځوانانو لوبډلې ته د ۷/۰ امتيازونو په توپير ماتې ورکړه او د ياد ليګ لومړۍ بريا يې خپله کړه.
دويمه لوبه کې بدخشان لوبډلې سيالې سمنګان لوبډلې ته د ۴/۱ امتيازونو په توپير ماتې ورکړه.
په درېيمه لوبه کې يما پټرول لوبډلې سيالې بلخ ځوانانو لوبډلې ته د ۱۰/۰ امتيازونو په توپير ماتې ورکړه او په دغه ليګ کې يې لومړۍ برياوې خپلې کړې.
طالبان وایي دا لوبې د المپيک، بدني روزنې عمومي رياست په همکارۍ او د وزلوبې او سيمه ييزو لوبو ملي فدراسيون له لوري د کابل ښار په يکه توت وزلوبې لوبغالي کې د ۱۱ لوبډلو ترمنځ پيل شوې، چې لس ورځې به دوام وکړي.
وزلوبه چې د افغانستان د لرغونو لوبو له ډلې څخه ده، شاوخوا شپږ کاله مخکې په افغانستان کې په رسمي توګه د دغه هېواد د اولمپیک د ملي کمېټې له خوا د یوې ملي لوبې په توګه ثبت او د وزلوبې فدراسیون رامنځته شو.
د طالبانو د رییس الوزرا اقتصادي مرستیال د افغانستان د اقتصادي وضعت په اړه د نړیوال بانک وروستۍ موندنې له حقیقته لرې بللې او دغه راپور يې رد کړی. طالبانو ويلي، چې د دوی په واکمنۍ کې پرمختيايي پروژې لکه د کانونو اېستل، د لویو لارو او پلونو رغول او نورې زياتې بنسټيزې چارې روانې دی.
نړيوال بانک د دسمبر مياشتي په لومړیو کې په خپل راپور کې ویلي، چې د افغانستان اقتصادي حالت لا هم ټکنی دی او زياته وده یې نه ده کړې.
نړيوال بانک ويلي په افغانستان کې د بې کارۍ کچه لوړه، د زېربنایي پروژو کارونه ولاړ او پانګونه محدوده شوې ده.
د طالبانو د رییس الوزرا اقتصادي مرستيال دفتر د شنبې په ورځ په يوې اعلاميه کې د نړيوال بانک د ردغه اپور پر ردولو سربېره ویلي، چې په بېلابيلو برخو کې پرمختګونه شوي او يوازي د ستر مقياس کانونو په برخه کې يې شاوخوا ۴۱۵ ميليارده افغانۍ کورنۍ او بهرنۍ پانګونه جذب کړې ده.
د نړيوال بانک په نشر شوي راپور کې د کورني ناخالص توليد ودې، د بهرنيو اسعارو پر واندې د افغانۍ ارزښت او صادراتو کچې ثابت پاتې کېدو، د کورنيو عوایدو د ټاکل شوي هدف ترلاسه کېدو، د خوراکي توکو بیو ټيټېدو او د کورني صنعت او بانکي سکټور کې شوي پرمختګونه کم ياد کړي.
خو طالبان بیا په خپله اعلاميه کې وايي، چې د نړيوال بانک له لوري په بېلابيلو برخو کې وړاندي شوي د ودې سلنه او پرمختګونه تر دې لوړ دي.
طالبانو له نړيوالو غوښتي، چې د حقایقو په واقعي درک له افغانستان سره مثبت تعامل وکړي، تر څو په افغانستان کې اقتصادي برخه کې پرمختګونه رامنځ ته شي.
په کابل کې د طالبانو تر واک لاندې د افغانستان برېښنا شرکت ځینو کارمنانو افغانستان انټرنشنل ته وویل، د دې ډلې استخبارانو ترې «موبایلونه او لپټاپونه یووړل.» سرچینې وايي رسنیو کې پرلپسې د دې ادارې د فساد سندونو خپرېدو پسې د عبدالباري عمر په غوښتنه پر برېښنا شرکت چاپه واچول شوه.
د طالبانو تر واک لاندې د افغانستان برېښنا شرکت ځینو کارکوونکو نن « د لیندۍ۱۶مه» وویل چې تېره پنجشنبه د طالبانو استخباراتو برېښنا شرکت کلابند کړی و.
عیني شاهدان وايي استخباراتو د شرکت د کارکوونکو په ځانګړي ډول د بشري سرچینو ادارې له ټولو کارمنانو موبایلونه ور سره یووړل.
د طالبانو استخباراتو د برېښنا شرکت کارکوونکو ته ویلي چې موبیلونه او اداري لېپټاپونه به په مکمل ډول وڅېړل شي ترڅو هغه کسان پیدا کړي چې د دې ادارې د فساد اسناد یې رسنیو ته لېږلي دي.
د افغانستان د برښنا شرکت یو کارمن« نن شنبې هم د طالبانو اسخباراتو برېښنا شرکت کلابند کړی او د ټولو شعبو او دفترونو کمپیوټرونو کې دفتري او یاهم شخصي اېمیلونه ګوري ترڅو معلومه کړی چې له دې ادارې څوک سندونه بهر ته باسي»
ځیني کارکوونکي وايي چې دوی په موبایلونو کې شخصی انځورونه او ویډیوګانې هم لري چې دا د دوی پر شخصي حریم تېری دی.
دوی زیاتوی استخبارات د طالبانو د برېښنا شرکت رییس عبدالباري عمر په شخصی غوښتنه دا څېړنه پیل کړې ده، ځکه څو ورځې وړاندې هغه لېستونه په ټولنیزو رسنیو کې خپاره شول چې د طالبانو د برېښنا رییس عبدالباري عمر ۴۰ نژدې خپلوان ګمارلي دي.
د طالبانو تر واک لاندې د افغانستان برېښنا شرکت کې روان فساد
افغانستان انټرنشنل د هغو لېستونو کاپي هم ترلاسه کړې ده، چې د افغانستان د برېښنا شرکت لپاره د طالبانو رییس عبدالباري عمر د دې ادارې په بېلابیلو پوسټونو کې شاوخوا ۴۰ نژدې خپلوان ګمارلي دي.
په دې لېستونو کې لېدل کېږي چې له ۳ بست نیولې تر ۹ بست پورې یې کسان ګمارلي دي چې یوازې ټول د لوګر د مرکز پل علم اوسېدونکي دي او پخپله دا رییس هم د همدې سیمې دی.
د طالبانو سرچینې افغانستان انټرنشنل ته وویل، د دې لېستونو خپرېدو سره د اوسني رییس عبدالباري عمر په اړه په کابل کې د طالبانو تر منځه بحثونه جوړ شوي دي.
د سرچینې په وینا« په ټولنیزو رسنیو کې د برېښنا شرکت کې د ګمارنو د لېستونو د خپرېدو له امله عبدالباري عمر له استحباراتو غوښتنه کړې ده چې د دې اداري د کاروونکو ټول موبایلونه او اداري کمپیوټرونه وکتل شي ترڅو معلومه شي چې څوک دغه سندونه له دې ادارې بهر کوي»
افغانستان انټرنشنل پښتو د طالبانو تر واک لاندې د افغانستان برېښنا شرکت اړوند بېلابېل د فساد سندونه خپاره کړي دي.
یو له دغو راپونو د برېښنا شرکت له خوا د بډو بدل کې د برېښنا د ۸۲ نويو لګول شویو ټرانسفرمرونو لېست هم دی.
په دغه راپور کې راغلي و چې کابل کې د برېښنا پر کمښت سربېره بیا هم طالبانو دغه ټرانسفرمرونه فابریکو او سوداګریزو وداینو ته لګولي.
د افغانستان انټرنشنل د بل راپور له مخې چې د اسنادو له مخې جوړ شوی و، د طالبانو تر واک لاندې د افغانستان برېښنا شرکت عمومي رییس عبدالباري عمر، د ملا هبت الله اخوندزاده د فرمان خلاف کمارنې کړې دي.
ځايي سرچينې وايي، چې د طالبانو استخباراتو د کابل "شنه زون" ته څېرمه په هوټلونو او مسافر خونو کې د شپې پاتې کېدل منع کړي دي. د سرچينې د معلوماتو له مخې، د طالبانو استخباراتو ویلي، چې دغه بنديز يې د امنيتي دلايلو له امله لګولی دى.
د سیمه ییزو سرچینو په وینا، د طالبانو استخباراتو د دې بندیز د لاملونو په اړه توضیحات نه دي ورکړي.
د بلال سروري په نوم یو خبریال هم پر اېکس پاڼې د کابل په شنه سیمه کې د بندیز په اړه لیکلي دي.
په هغه عکس کې چې هغه پر اېکس پاڼې خپور کړی، لیدل کیږي چې د مسافرخونو د دهلیز پر یو دیوال لیکل شوي دي: «د امنیتي لاملونو له امله، میلمانه نه شي کولی په خونه کې شپه تېره کړي.»
مخکې له دې چې طالبان پر افغانستان بیا واکمن شي، د امريکا په ګډون د بهرنيو هېوادونو سفارتونه او د نړۍوالو بنسټونو او موسسو دفترونه د کابل په شنه زون کې وو. په دې سیمه کې ولسمشرۍ ماڼۍ، د دفاع، کورنیو چارو او بهرنیو چارو وزارتونه هم موقعیت لري.
د افغانستان د بهرنیو چارو پخوانی وزیر حنیف اتمر د «رسمي او نا رسمي سرچینو» په حواله ادعا کوي، چې د طالبانو مشر په هېواد کې د ټولو خیریه بنسټونو د فعالیت د بندولو پرېکړه کړې ده. هغه وايي؛ که دغه پرېکړه عملي شي، په افغانستان کې به "يو ستر او نه هېرېدونکى ناورين" پيل شي.
د افغانستان د بهرنیو چارو پخواني وزیر د جمعې په ورځ (د لېندۍ ۱۶مه) پر اېکس لیکلي: «له کندهار څخه د رسمي او نا رسمي سرچینو څخه ډېر خواشینونکي خبرونه ترلاسه شوي. ویل کیږي چې د طالبانو مشر له مخالفتونو سربیره په هېواد کې د ټولو خیریه موسسو د تړلو پرېکړه کړې ده.»
تر دې مخکې سرچینو افغانستان انټرنشنل ته ویلي و، چې هبت الله اخندزاده د طالبانو له کابینې غوښتي چې ټولې نا دولتي ادارې وتړي.
حنیف اتمر د دغې پرېکړې د پایلو په اړه د اندېښنې په څرګندولو سره دا «وحشتناکه» وبلله او خبرداری یې ورکړ، چې دا عمل به د میلیونونو افغانانو په ځانګړې توګه د ماشومانو او ښځو ژوند له جدي ګواښ سره مخ کړي.
نوموړي د ملګرو ملتونو له امنیت شورا، د سیمې له هېوادونو، د اسلامي همکاریو له سازمان او افغان سیاستوالو وغوښتل چې په افغانستان کې د میلیونونو زیانمنو شویو وګړو د خوندیتوب لپاره اقدام وکړي.
خو ښاغلي اتمر د خپلو مالوماتي سرچینو په اړه وضاحت نه دی ورکړی او نه یې د خپلو څرګندونو د ثابتولو لپاره کوم سند وړاندې کړی.
تر اوسه وسله والو طالبانو او د دې ډلې تر واک لاندې ادارو په دې اړه څه نه دي ویلي.
تر دې وړاندې د طالبانو د عدلیې وزارت یو شمېر خیریه بنسټونو ته د "ناقانونه" فعالیتونو له امله تړلي وو.
دا ادعا په داسې حال کې کېږي چې په افغانستان کې میلیونونه خلک پر بشري مرستو متکي دي.
د ملګرو ملتونو د راپور له مخې، سږ کال ۲۳،۷ میلیونه افغانان چې ۵۲ سلنه یې ښځې او نجونې دي، عاجلو مرستو ته اړتیا لري.