عباس ستانکزی: د سوریې په شان ظالم حکومتونه نسکورېږي
د طالبانو د بهرنیو چارو وزارت سیاسي مرستیال د سې شنبه په ورځ (د لېندۍ ۲۰مه) وویل، چې د ظالمو حکومتونو پایله د سوریې د حکومت د نسکورېدو په څېر ده.
د طالبانو د بهرنیو چارو وزارت سیاسي مرستیال د سې شنبه په ورځ (د لېندۍ ۲۰مه) وویل، چې د ظالمو حکومتونو پایله د سوریې د حکومت د نسکورېدو په څېر ده.
عباس ستانکزی وایي، چې د طالبانو نظام باید داسې عمل وکړي، چې راتلونکي نسلونه پرې وویاړي.
د طالبانو د بهرنیو چارو وزارت سیاسي مرستیال د سې شنبه په ورځ د (لېندۍ ۲۰مه) د نوي کابل پروژې د لومړي پړاو د عملي کار د پیل په مراسمو کې وویل، چې افغانستان باید له اقتصادي، سیاسي، دفاعي او امنیتي اړخه په خپلو پښو ودرېږي.
ستانګزي وویل:«بلاخره د سوریې نږدې ۵۴ کلن حکومت نسکور شو. د زور او جبر د رژیمونو پایله به تل همداسې وي.»
ستانکزي د "شريعت او عدالت" پر بنسټ جوړو شویو حکومتونو ته په اشارې سره وويل، چې عادل او شرعي حکومتونه به په تاريخ کې په زرينو کرښو ليکل کېږي.
طالبانو په سوریه کې د اسلامپالو د بریا هرکلی کړی دی.
تحریر شام چې د یاغیانو اصلي ډله ده، په سوریه کې یې حکومت په غاړه اخیستی.
یادې ډلې په تېرو وختونو کې د طالبانو په څېر له القاعدې سره ملګرتیا درلوده.
دا ډله د نورو سیاسي او مذهبي ډلو د همکارۍ د جلبولو او د نړیوال مشروعیت د ترلاسه کولو لپاره له القاعدې څخه ځان لرې کړی، خو لا هم د یوې افراطي اسلامپالې ډلې په توګه پېژندل کېږي.
