افغانستان کې د حزب التحریر ګوند په ایکس پاڼه په یوه مطلب کې لیکلي چې د «خلافت» په نشتوالي کې بل هر نظام د «جبریه» نظام په توګه پيژني. حزب التحریر وايي، اسلام د یوه بشپړ دین په توګه یوازې د «خلافت حکومتي نظام په رسمیت پېژني.»
په افغانستان کې د حزب التحریر ګوند نن پنجشنبه د (لیندۍ ۲۲مه) په ایکس پاڼه یو مطلب خپور کړی او په کې لیکلي یې دي، چې د «خلافت په نشتوالي کې بل هر نظام د «جبریه» نظام په توګه پيژني.»د حزب التحریر ګوند دغه خبره، دا څرګندوي چې دوی د طالبانو حکومت د یوه «اسلامي حکومت» په توګه نه مني.حزب التحریر په خپل دغه مطلب کې وړاندې لیکلي: «خلافت د اسلامي احکامو پر بنسټ جوړ شوی نظام او د تاریخ په اوږدو کې د راشده او غیر راشده خلافت په بېلابېلو بڼو راڅرګند شوی. سره له دې، د خلافت په نه شتوالي کې هر بل نظام د اسلام له نظره د «جبریه» نظام په توګه پيژندل کېږي.»حزب التحریر په خپل مطلب کې د «اسلامي خلافت» د نظام درې ځانګړنې «راشده خلافت، مقتدر خلافت او شتمن خلافت» بیان کړې او وايي، چې له دغو ځانګړنو پرته هیڅ اسلامي نظام په پښو نه شي دریدلی.له دغو درېیو ځانګړنو د حزب التحریر موخه د اسلام په چوکاټ کې د یوه رامنځته شوي حکومت جوړېدل دي چې د جغرافیا په لحاظ واکمن او په اقتصادي لحاظ په خپلو پښو ولاړ وي.تر دې وړاندې هم په افغانستان کې د حزب التحریر ګوند د طالبانو پر کړنو توندې نیوکې کړې وې او د هغوی چارې یې د «اسلامي امارت» په چوکاټ کې تر کلکو پوښتنو لاندې راوستې وې.د چارو یو شمېر شنونکي وايي، په دې سره طالبانو د حزب التحریر ځینې مشران ونیول او او زندان ته یې واچول او د دې تر څنګ د طالبانو تر واکمنۍ لاندې افغانستان او په ځانګړي ډول کابل کې د دغه ګوند ځینې مشران ترور شول.حزب التحریر په خپل تازه خپاره شوي مطلب کې د کنایې په ډول د طالبانو حکومت داسې مهال تر پوښتنې لاندې راوستی چې په ټول هیواد کې د طالبانو د ډاډمن امنیت راوستو له دعوې سره سره تېره ورځ د دغې ډلې د کډوالو چارو وزیر خلیل الرحمان حقاني په خپل وزارت کې دننه په یوه ځانمرګي برید کې ووژل شو.حزب التحریر د خپل مطلب په یوه برخه کې لیکلي، چې اسلامي حکومتونه باید له لوېديځو هیوادونو سره په تعامل ولاړ نه وي، چې دا مهال د طالبانو حکومت ته د بشري مرستو او بانکي ملاتړ په موخه د ملګرو ملتونو په چوکاټ کې د لوېدیځو هیوادونو په لسګونه میلیونه ډالره میاشتنۍ مرستې ور روانې دي.
