په ملګرو ملتونو کې د چین استازي د امنیت شورا په غونډه کې پر طالبانو غږ وکړ، چې د امر بالمعروف د قانون په اړه د هېوادونو اندېښنې جدي ونیسي. هغه وویل، چې نړۍ تمه لري چې طالبان به یو "منځلاری او ټول ګډونه حکومت" جوړ کړي او په افغانستان کې له "ترهګرۍ" سره مبارزه وکړي.
د امنیت شورا په نننۍ غونډه کې د چین سفیر هڅه وکړه، چې د طالبانو لاسته راوړنې روښانه کړي او له نړۍ یې وغوښتل چې د دغې ډلې له حکومت سره مرسته وکړي.
ښاغلي فو کانګ وویل: «افغانستان د خپلې سوله ییزې بیارغونې په یو مهم پړاو کې دی. امنیتي وضعیت ښه شوی او د خلکو د ژوند شرایط په تدریجي ډول مخ پر ښه کیدو دي. له افغانستان سره سیمه ییزې همکارۍ ژورې او پیاوړې شوې دي.
هغه دا هم وويل، چې په تېرو درېيو کلونو کې د طالبانو حکومت د افغانستان د اقتصاد د بيا رغولو او د سيمې له هېوادونو سره د سوداګريزو اړيکو د پياوړتيا لپاره ګامونه پورته کړي دي. د چین سفیر زیاته کړه چې د طالبانو د مالیاتو عواید زیات شوي او ښځینه متشبثینو د هېواد په اقتصادي فعالیتونو کې برخه اخیستې ده. هغه دغه لاسته راوړنې "هڅوونکې" وبللې.
چین او طالبانو په تېرو درېیو کلونو کې په تدریجي ډول ښې اړیکې جوړې کړې دي. چین او روسیه د امنیت شورا دوه هغه غړي هېوادونه دي چې د غربي هېوادونو د فشارونو او نیوکو پر وړاندې د طالبانو د حکومت دفاع کوي. چین په وار وار له امریکا غوښتي چې د افغانستان په بیارغونه کې مرسته وکړي او د افغانستان مرکزي بانک کنګل شوې پیسې خوشې کړي.
همدا راز د چین استازي له طالبانو وغوښتل چې په افغانستان کې د بشري حقونو وضعیت ته بدلون ورکړي. هغه په ځانګړې توګه له طالبانو وغوښتل چې د ښځو حقونو او په ځانګړې توګه د زده کړو حق ته درناوی وکړي.
هغه له طالبان دا هم وغوښتل چې باید د "ترهګرۍ سره د مبارزې" لپاره اقدام وکړي او اجازه ورنکړي چې "افغانستان یو ځل بیا د ترهګرو ډلو په مرکز بدل شي."
