په غور کې د طالبانو امربالمعروف ریاست ويلي، شپږ تنه يې د الکولي مشروباتو د پېر او پلور په تور نيولي دي. دغه رياست وايي، څلور تنه يې د شرابو د څښلو او دوه تنه يې د شرابو او نشهيي ګولیو د پلورلو په تور نيولي دي.
په غور ولایت کې د طالبانو امربالمعروف ریاست نن پنجشنبه د (لیندۍ ۲۲مه) په ایکس پاڼه لیکلي، چې له دغو کسانو څخه ۱۲۰۰ بوتله شراب او ۱۲۴ پاکټه د نشې ګولۍ نیول شوي دي.
دغه رياست وايي، د محتسبانو له نيولو او له لومړنيو څېړنو وروسته يې د «اسلامي شريعت» د حکمونو د تطبيق په موخه دغه کسان عدلي او قضايي ارګانونو ته سپارلي دي.
د طالبانو امربالمعروف وزارت له دې مخکې د لیندۍ په لسمه ویلي و، چې د دغه وزارت محتسبانو په یوه اوونۍ کې د افغانستان په شپږو ولایتونو کې ۲۳ تنه نیولي دي.
دغه وزارت وايي، ۱۵ تنه په کابل، نیمروز او سرپل او اته تنه نور په بلخ، زابل او دایکنډي کې د امربالمعروف له قانون څخه د سرغړونې په تور نیول شوي دي.
د طالبانو امربالمعروف وزارت محتسبان په ټولو ولایتونو کې ګرځنده ګزمې کوي او د خلکو چلند او کړنې څاري.
