طالبانو په پکتیا کې دوه تنه د خلکو د سترګو په وړاندې په دورو وهلي
د طالبانو ستره محکمه وايي، چې په پکتیا کې یې دوو تنو ته د «اخلاقي فساد او غلا» په تور تعزیري سزا ورکړې ده. طالبانو په دې وروستیو کې ولسي خلکو ته په عام محضر کې سزاګانې ډېرې کړې دي.
د طالبانو ستره محکمه وايي، چې په پکتیا کې یې دوو تنو ته د «اخلاقي فساد او غلا» په تور تعزیري سزا ورکړې ده. طالبانو په دې وروستیو کې ولسي خلکو ته په عام محضر کې سزاګانې ډېرې کړې دي.
د طالبانو له خوا په عام محضر کې خلکو ته بدني سزاګانې په نړۍواله کچه غندل شوې خو طالبان یې د «شریعت» تطبیق بولي.
د طالبانو سترې محکمې نن پنجشنبه د (لیندۍ ۲۲مه) د یوې خبرپانې په خپرولو سره ویلي، چې د پکتیا ولایت څمکنیو ولسوالۍ ابتدایه محکمې دوو تنو ته د «اخلاقي فساد او غلا» په تور تعزیري سزا ورکړې ده.
د خبرپاڼې له مخې، دغه پرېکړه د دغې ډلې د سترې محکمې له تایید وروسته د پکتیا ولایت څمکنیو ولسوالۍ ابتدایه محکمې په عام محضر کې پر دوو تنو عملي کړه.
په خبرپاڼه کې د تورنو کسانو د هویت په اړه څه نه دي ویل شوي خو وايي، د محکمې د پرېکړې له مخې طالبانو یو تن په یو کال تنفیذي بند سزا محکوم او ۳۹ دورې وهلی او دویم کس یې په اته میاشتې بند سزا او ۳۹ دورې وهلی دی.
که څه هم پر طالبانو په عام محضر کې د بدني سزا ورکولو په اړه د بشري حقونو د ملاتړو سازمانونو له لوري سختې نیوکې کېږي؛ خو لا هم طالبان لږ تر لږه په یوه یا دوو ورځو کې د افغانستان په بېلابېلو ولایتونو کې پر خلکو په عام محضر کې بدني سزاوې عملي کوي.
د طالبانو دغه کړنې په نړۍواله کچه غندل کېږي؛ خو طالبان وایي دوی «د اسلامي شریعت» د تطبیق په موخه دغه چاره ترسره کوي.
