د ملګرو ملتونو د بشري مرستو د همغږۍ اداره اوچا وایي، بلغاریا د افغانستان د بشري مرستو له صندوق سره ۳۰ زره یورو مرسته وکړه. دغې ادارې ویلي، په افغانستان کې دا مهال بیړنیو بشري مرستو ته لا هم اړتیا لېدل کیږي.
د اوچا د راپورونو له مخې، په افغانستان کې د بشردوستانه مرستو د اړمنو شمېر څه باندې ۲۳ میلیونه کسانو ته رسېږي.
د ملګرو ملتونو د بشري مرستو د همغږۍ ادارې اوچا نن پنجشنبه د (لیندۍ ۲۲مه) په ایکس پاڼه یوه یادښت کې لیکلي، چې بلغاریا د دغې ادارې له لارې د افغانستان د بشري مرستو له صندوق سره ۳۰ زره یورو مرسته وکړه.
وايي، دغه مرستې به په افغانستان له اړمنو خلکو سره د خوراکي او سون توکو په برخه کې ولګول شي.
په تېره لړم میاشت کې د افغانستان لپاره د ملګرو ملتونو د بشري چارو د همغږۍ دفتر (اوچا) ویلي و، چې کویټ د افغانستان له بشردوستانه صندوق سره د ۵۰۰ زره ډالرو مرسته کړې وه.
اوچا ویلي، چې دا په ۲۰۲۴ کال کې د افغانستان له بشردوستانه صندوق سره د کویټ لومړۍ مرسته ده.
د یاد سازمان په خبره، په افغانستان کې د اړمنو کسانو شمېر مخ په زیاتېدو دی.
د روسیې د بیړنیو حالاتو وزارت تېره میاشت د یوې الوتکې له لارې ۲۸ ټنه بشري مرستې کابل کې طالبانو ته تسلیم کړې.
اوچا په تېره لړم میاشت کې د یو راپور په خپرولو سره ویلي و، چې افغانستان لپاره یې د ۲۰۲۱ کال له اګست میاشتې راهیسې چې طالبان واک ته رسېدلي ۶،۷ میلیارډه ډالره مرسته راټوله او په بشري مرستو لګولې ده.
د یو شمېر نورو راپورونو له مخې، واک ته د طالبانو له رسېدو وروسته دغې ډلې ۳۹۲ داسې تګلارې پلې کړي، چې بشري مرستې او فعالیتونه یې اغېزمن کړي دي.
