چین وايي امریکا تایوان ته په پوځي مرستو له «اور سره لوبې کوي»
د چین حکومت د یکشنبې په ورځ د تایوان لپاره د امریکا د وروستیو پوځي مرستو او پر دغه هېواد د وسلو د پلور د اعلان په غبرګون کې وویل چې متحده ایالات «له اور سره لوبې کوي».
د چین حکومت د یکشنبې په ورځ د تایوان لپاره د امریکا د وروستیو پوځي مرستو او پر دغه هېواد د وسلو د پلور د اعلان په غبرګون کې وویل چې متحده ایالات «له اور سره لوبې کوي».
د امریکا ولسمشر جو بایډن د شنبې په ورځ تایوان ته ددغه هېواد د دفاع وزارت د ۵۷۱ میلیونه ډالرو پوځي وسایلو، خدماتو او پوځي روزنې د برابرولو منظوري ورکړه. له دې جلا، پنټاګون د جمعې په ورځ اعلان وکړ چې د ۲۹۵ میلیونه ډالرو پوځي وسایلو پلورل یې تایید کړي دي.
د چین د بهرنیو چارو وزارت په یوه اعلامیه کې له امریکا وغوښتل چې تایوان ته د وسلو ورکول بند کړي او هغه « خطرناک ګامونه» ودروي چې د تایوان ثبات او سولې ته زیان رسوي.
د اسوشیټېډ اژانس د رپوټ له مخې، تایوان، چې ۲۳ میلیونه نفوس لري، د چین حکومت یې د خپلې خاورې برخه ګڼي او وایي، باید د دوی تر کنټرول لاندې راشي. له بلې خوا، امریکا په پوځي مرستو او د وسلو په پلورلو سره د چین پر وړاندې د تایوان دفاعي وړتیا لوړوي.
د امریکا په نویو پوځي مرستو او د وسایلو په پلور کې د ۲۶۵ میلیونه ډالرو په ارزښت۳۰۰ تاکتیکي رادیو سیسټمونه او د ۳۰ میلیونه ډالرو په ارزښت د توپونو اړوند وسایل شامل دي.
د تایوان د بهرنیو چارو وزارت د امریکا د دې دوو اقداماتو هرکلی کړی او پرخپل ایکس یې ویلي چې دا د تایوان د دفاع په برخه کې د امریکا ژمنتیا ثابتوي.
