طالبانو د ننګرهار له بېلابېلو ولسوالیو څخه جلال اباد ښار ته د (مرغومې په دویمه) د بیلابېلو برخو ورزشکاران رابللي او د «شرعي رزونې» په نوم یې ورته د ملایانو له لوري د دیني زدهکړو روزنه پیل کړې.
طالبانو دغه پروګرام ته د «ملي او اسلامي احساس تقویه» نوم ورکړی چې درې ورځې به طالب پلوي ملایان دوی ته د اسلامي علومو په تړاو روزنه ورکړي.
په یاد ولایت کې د طالبانو د ورزش او المپیک مشر عبدالسلام وزیروال وایي، په ننګرهار کې ورزشکاران د اسلام څخه په لرې واټن کې روزل شوي او له دین څخه ناخبره ساتل شوي دي.
هغه زیاته کړې: «دوی کسبګرو غوندې روزل شوي، داسې روزل شوي چې ورزش له اسلام سره اړخ نه لګوي، غواړو دوی ته خپل حد ور معلوم وي چې له ورزش سره د اسلام اړیکه څه ده؟.»
د دغو لوبغاړو له ډلې د یوه ځایي ورزشکار عتیق الله په وینا؛ طالب ملایانو ورته په نړۍوالو سیالیو کې د اسلامي اصولو په چوکاټ کې د لوبو کولو سپارښتنې کړي.
طالبانو په بېلابېلو ولایتونو کې د ورزشکارانو تر څنګ د پوهنتون استادانو، ډاکټرانو، ښوونکو او د ټولنې بېلابېلو قشرونو ته د دیني زدهکړو په نوم روزنیز سیمینارونه جوړ کړي دي.
ویل کېږي طالبان د دین په نوم دغه ډول پروګرامونو کې په ښکاره او جدي ټکو خلک د دوی د واکمنۍ ملاتړ ته رابولي او غوښتنې ترې کوي چې د دوی د دوام لپاره په خپلو اړونده برخو کې تبلیغات وکړي.
