د عربي خبري اژانس وفا د راپور له مخې، د جمعې پر ورځ د مرغومي په اوومه نیټه د اسرایيلي ځواکونو له لوري د فلسطین پر یو شمېر ښارونو بریدونه شوي چې یوازې له نن سهار راهیسې په غزه او رفح کې نهه کسان وژل شوي شاوخوا ۲۰ تنه ټپیان شوي. په وژل شویو کسانو کې ښځې او ماشومان هم شامل دي.
همدا راز اسراییلي ځواکونو د غزې په شجاعیه سیمه کې یو کور بمبار کړی چې په پایله کې یې د یوې کورنۍ څلور غړي وژل شوي دي.
د رسنیو د راپورونو پر بنسټ په ورته وخت کې د رفح د النصبر په سیمه کې د توغندیز برید له امله یوه ښځه وژل شوې.
همدا راز د غزې په الصبرا سیمه کې پر یوې ودانۍ د برید په پایله کې لږ تر لږه څلور کسان وژل شوي او یو شمېر نور ټپیان شول.
د دغو ټولو پېښو د ټپیانو شمېر ساوخوا شل تنه ښودل شوی چې ښځې او ماشومان هم په کې شامل دي.
ملګرو ملتونو په غزه کې د ماشومانو وژل کیدل جنګي جنایت بللی او د نړۍ د ټولو جګړو په پرتله یې په فلسطین کې د اسرايیلي ځواکونو له لوري د وژل شویو ماشومانو شمېر لوړ ښودلی دی.
