د ملګرو ملتونو سرمنشي انتونیو ګوټریش، د یمن او اسراییل ترمنځ د شخړو د زیاتېدو په اړه اندېښنه څرګنده کړه او د سملاسي اوربند تر څنګ یې د نړۍوالو قوانینو د درناوي غوښتنه وکړه. نوموړي په سیمه کې د تاوتریخوالي د زیاتېدو په اړه هم خبرداری ورکړ.
ښاغلي ګوټریش په یوه خبرپاڼه کې د صنعا نړۍوال هوايي ډګر، د سره سمندرګي بندرونو او د یمن د برېښنا سټېشنونو پر هوایي بریدونو سخته اندیښنه څرګنده کړې. او د هغه په وینا؛ په دغو بریدونو کې لږ تر لږه درې کسان وژل شوي او لسګونه نور ټپیان دي.
خو تازه خپاره شوي معلومات ښيي، چې په دغو بریدونو کې شپږ تنه وژل شوي او ۴۰ نور ټپیان دي.
د ملګرو ملتونو سرمنشي وویل چې په دغو بریدونو کې د دغه سازمان د بشري مرستو د هوایي خدمتونو یو غړی هم ټپي شوی دی.
دغه بریدونه هغه مهال شوي چې د روغتیا نړۍوال سازمان د مشر ډاکټر ټیډروس اډانوم په مشرۍ یوه لوړپوړې پلاوی په صنعا هوايي ډګر کې حاضر و.
دغه پلاوی د یمن د بشري وضعیت او د ملګرو ملتونو د نیول شویو کارکوونکو او نورو کسانو د خوشې کېدو په تړاو یمن ته تللی و.
ګوټریش د حوثیانو له لوري په تېرو کلونو کې د سره سمندرګي په سیمه کې د فعالیتونو یادونه وکړه او څرګنده یې کړه چې دا کړنې د ملکي وګړو ژوند، د سیمې ثبات او د سمندري تګ راتګ ازادۍ ته جدي ګواښ پېښوي.
هغه یو ځل بیا له ټولو اړخونو وغوښتل چې له پوځي لارو کارولو ډډه وکړي او تر ټولو زیات زغم وښيي.
د ملګرو ملتونو سرمنشي ټینګار وکړ چې نړۍوال قوانین باید مراعت شي او د ملکي وګړي تر څنګ د بشري مرستو کارکوونکي باید په نښه نه شي.
دغه پېښې په داسې حال کې رامنځته شوي چې د یمن بشري وضعیت د اوږدې جګړې او کلابندۍ له امله تر بل هر وخت زیات کړکېچن بلل کېږي.
