د روسیې ولسمشر ولادېمیر پوتین د پنجشنبې په ورځ وویل، چې د سلواکیا لومړی وزیر په راتلونکي کې د روسیې او اوکراین ترمنځ د سولې د خبرو د کوربه توب وړاندیز کړی دی. د سلواکیا د دریځ د هرکلي پرمهال، نوموړي وویل چې روسیه د دې وړاندیز "خلاف" نه ده.
د سلواکیا لومړی وزیر رابرټ فیتزو، چې له روسیې سره ښې اړیکې لري د ډسمبر په ۲۲مه د روسیې له ولسمشر ولادیمیر پوتین سره ولیدل.
د هغه دا سفر په داسې حال کې کیږي، چې لویدیځ هڅه کوي چې پوتین ګوښه او د کییف په ملاتړ سره متحد شي.
سلواکیا چې د اروپايي ټولنې او ناټو غړی هېواد دی، له ۲۰۲۳ میلادي کال راهیسې له اوکراین سره پوځي مرستې وځنډولې او د سولې د خبرو غوښتنه یې وکړه.
فیتسو سلواکیا ته د روسیې د طبیعي ګازو د اکمالاتو د انتقال په اړه د کییف پر مخالفت انتقاد کړی، خو د اوکراین ولسمشر ویلي چې سلواکیا چمتو نه ده چې د روسیې پر تېلو او ګازو خپله تکیه کمه کړي.
اوکراین له خپلې خاورې څخه سلواکیا ته د روسیې د ګازو د انتقال له غځولو سره مخالفت کړی او شته قرارداد به په څو ورځو کې پای ته ورسیږي.
پوتین وویل، چې اوکراینیان د روسیې د ګازو د قرارداد په پای ته رسولو سره اروپا ته سزا ورکوي. خو کییف په دې باور دی چې له روسیې څخه د انرژۍ اخیستل به په اوکراین کې د دې جګړې د ماشین تمویل کې مرسته وکړي.
پوتین وړاندیز وکړ، چې هغه چمتو دی چې اروپایی اتحادیې ته د اروپا پایپ لاین له لارې ګاز چمتو کړي.
د جرمني په ګډون ډېری اروپایی هېوادونو د اړتیا وړ ګازو د رسولو لپاره نورو سرچینو لکه قطر ته مخه کړې ده. د امریکا منتخب ولسمشر ټرمپ ویلي، اروپايي هېوادونه باید له امریکا څخه نور تېل او ګاز واخلي.
