د افغانستان او زیمبابوې ترمنځ د ټېسټ لوبې په لومړۍ پاڼۍ کې د ټولو لوبغاړو په سوځیدو سره ۵۸۶ منډې جوړې کړې. افغانستان د دوهمې ورځې ترپایه د زیمبابوې د ۵۸۶ منډو پوره کولو په تعقیب د دوو لوبغاړو په سوځیدو سره ۹۵ منډې جوړې کړې.
د زېمبابوې په کوربه توب د افغانستان او کوربه هېواد ترمنځ د لومړۍ ټېسټ سیالۍ په لومړۍ پاڼۍ کې زېمبابوې په ۱۳۵،۲ اورونو کې د ټولو لوبغاړو په سوځیدو سره ۵۸۶ منډې جوړې کړې.
د زېمبابوې لوبډله په توپ وهنه کې خورا بر لاسې وه او دریو لوبغاړو یې سلیزي هم جوړې کړې.
په توپ اچونه کې الله محمد غضنفر ۳، ضیا الرحمن اکبر، نوید ځدراڼ او ظاهر خان دوه دوه او عظمت الله عمرزي یوه وېکټه ترلاسه کړه.
د لوبې په دوهمه پاڼۍ کې افغان لوبډلې د زېمبابوې د ۵۸۶ منډو په تعقیب د دوهمې ورځې ترپایه په ۳۰ اورونو کې د دوو ویکټو په زیان ۹۵ منډې جوړې کړې دي.
په توپ وهنه کې افغان پلیز توپ وهونکی صدیق اتل په دریو او عبدالمالک له ۲۳ منډو جوړولو وروسته خپلې ویکټې له لاسه ورکړې، خو رحمت شاه د ۹۵ بالونو په لوبولو سره په ۴۹ ناسوځیدلو منډو ولاړ دی.
سبا شنبه به د لوبې په دریمه ورځ رحمت شاه د یو بل توپ وهونکي سره د زېمبابوې د ۵۸۶ منډو په تعقیب توپ وهنې ته دوام ورکړي.
