د بشری حقوقو سازمان ههنګاو ویلي چې ایران د لرستان په علیګودرز زندان کې د جلال ستانکزی په نوم یو افغان بندي په دار ځړولی. دغه سازمان لیکلي، چې جلال ستانکزی څلور کاله وړاندې د «قصدي وژنې» په تور نیول شوی او په اعدام محکوم شوی و.
د بشري حقونو دغه سازمان چې له ایرانه بهر فعالیت کوي وايي چې د ایران په لرستان کې د علیګودرز زندان چارواکو د یکشنبې په سهار دغه افغان بندي اعدام کړ.
دغه سازمان زیاته کړې، چې جلال ستانکزی مخکې له دې د ایران د قضايي ادارو له خوا د «قصاص» په تور محکوم شوی و.
د دغه بندي د اعدام خبر د ایراني رسنیو او یا حکومتي سرچینو له لوري د دغه خبر تر لیکلو پورې نه دی خپور شوی.
د هغو بندیانو اعدامول چې د «مخدره توکو د قاچاقو او قصدي وژنو» په تورونو اعدام شوي، له تېرو څلورو کلونو راهیسې په پرله پسې توګه او هر کال زیات شوي دي. د ۲۰۲۲ پرتله، چې ۲۵۶ کسان د «مخدره توکو قاچاق» په تور اعدام شوي، په ۲۰۲۳ کې ۸۴٪ زیاتوالی په کې راغلی او په دې لړ کې ۴۷۱ اعدامونه ثبت شوي.
د ایران د بشري حقونو سازمان ویلي، چې د دغه هیواد حکومت په تېره نومبر میاشت کې د ۱۲ افغانانو په ګډون ۱۴۴ زندانیان په ایران کې اعدام کړي دي. دغه سازمان وايي، په اعدام شویو کې څلور ښځې، یو یهودي-ایرانی وګړی او یو ذهني ناروغ هم شامل و.
د ایران د بشري حقونو سازمان ویلي چې ایران یوازې په اکتوبر میاشت کې د ۱۳ افغانانو په ګډون لږ تر لږه ۱۶۶ کسان اعدام کړي.
پر بشري حقونو د څار سازمان هم په ایران کې د اعدام سزا پر ډیروالي اندېښنه ښودلې او د دغې سزا د لغوه کېدو غوښتنه یې کړې.
