د طالبانو د لوړو زدهکړو وزارت نن دوشنبه د مرغومي ۷مه نېټه په یوې خبرپاڼه کې ویلي چې د دغې ډلې د لوړو زدهکړو وزارت سرپرست ندا محمد ندیم کابل کې د ترکیې له سفیر سره ناسته کې په پوهنتوني او علمي برخو کې له ترکیې د همکاریو غوښتنه کړې.
په خبرپاڼه کې راغلي د طالبانو د لوړو زدهکړو سرپرست ندا محمد ندیم د لېسانس او نورو لوړو زدهکړو په برخه کې د ترکیې له سفیر جنګ اونال څخه غوښتي چې لازمې مرستې ورسره وکړي.
که څه هم کابل د ترکیې سفارت خپله په رسمي ډول څه نه دي ویلي، خو خبرپاڼه زیاتوي چې جنګ اونال د طالبانو د لوړه زدهکړو وزیر ته د همکارۍ ډاډ ورکړی او د پوهننتونونو د ودې په برخه کې یې ورسره ځانګړې ژمنې کړې دي.
خبرپاڼه کاږي، چې د ترکیې سفیر د طالبانو د لوړو زدهکړو وزارت یوه پلاوي ته بلنه ورکړې څو ترکیې ته سفر وکړي او هلته د دغه هېواد د ودانیزې انجنیرۍ او کرنې تر څنګ د طب له پوهنځیو څخه لیدنې وکړي.
د طالبانو د لوړو زده کړو وزارت له دې تازه لیدنې هېڅ ډول انځور نه دی خپور کړی ؛خو تر دې وړاندې یې د ترکیې له سفیر سره د ندا محمد ندیم د ناستو انځورنه خپرول.
ندا محمد ندیم داسې مهال دا ناستې کوي چې دیني زدهکړې تر عصري زدهکړو مهمې ګڼي او په وار وار یې خپلو ویناوو کې پوهنتوني چاپیریالونه د مدرسو پر وړاندې ننګولي دي.
