د ملګرو ملتونو سازمان په غزه کې د یخنۍ له امله د ماشومانو په مړینه خواشیني ښودلې ده او ویلي یې دي، چې د اټکل له مخې اوس هم ۹۴۵ زره کسان د ژمي له سختو حالاتو څخه د سرپناه لپاره مرستې ته اړتیا لري.
د هایپوترمیا له امله د ماشومانو د مړینې په اړه، د ملګرو ملتونو د کډوالۍ ادارې وویل، چې دا د ژمي د بارانونو ویجاړونکي اغیزو او په بې ځایه شویو فلسطینیانو باندې د یخنۍ له امله ژوره اندیښمنه ده، چې په غزه کې بې ساری بشري ناورین زیاتوي.
د کډوالۍ نړۍوال سازمان (ای او ایم) وویل، سختو اورښتونو لنډ مهاله سرپنا ځایونه ویجار کړي او خلک د سختو شرایطو له امله اړ شوي چې پخوانۍ زړې خرابې شوې خیمې بیاځلي ورغووي.
د ای او ایم مشر ایمي پوپ وویل: «دلته لږترلږه اوه ماشومان د هایپوترمیا له امله مړه شوي، چې دا غمجنې مړینې د غزې خلکو ته د سرپناه او نورو مرستو بیړنۍ اړتیا په ګوته کوي.»
هایپوترمیا یو طبي اضطراري حالت دی، چې بدن تودوخه په ګواښوونکي توګه له لاسه ورکوي، او ممکن دغه حالت ددې لامل شي چې ژوند وګواښي، ددغه ناروغۍ عمده لاملونه سړه هوا او سړې اوبه په ګوته شوي.
