د طالبانو د لوړو زده کړو وزیر وايي د هبت الله له امر نه سرغړونه د خدای نافرماني ده

د طالبانو تر واک لاندې ارګ په خپله اعلامیه کې ویلي، چې د دې ډلې د ریاست الوزرا اداري مرستیال عبدالسلام حنفي د افغانستان لپاره د چین سفیر جاو شېنګ سره په کتنه کې د دواړو هېوادونو ترمنځ د سوداګرۍ او پانګونې په اړه خبرې کړې دي.

په خبرپاڼه کې ویل شوي، چې په یاده لیدنه کې عبدالسلام حنفي د چین له سفیر جاو شېنګ څخه د برېښنا د تولید او په عصري ماشینرۍ د روغتونونو او روغتیايي مرکزونو د تجهیز په برخه کې د همکاری غوښتنه کړې ده.

د طالبانو خبرپاڼه کې د چین د سفیر له قوله لیکل شوي، چې بیجنګ له پاکستان او ایران څخه د راستنو شویو کډوالو لپاره د کورونو جوړولو، روغتیا، په یو شمېر ولایتونو کې د سړو خونو جوړولو، سروې او د افغانستان د کانونو د اېستلو په برخه کې همکاري کوي.

د چین سفیر په ورورستي یوه کال کې افغان سوداګرو ته د ډیرو ویزو ورکول د دوه اړخیزو اړیکو پراختیا بللې ده.

د طالبانو تر واک لاندې ارګ د ریاست الوزرا د سیاسي مرستیال عبدالسلام حنفي او د افغانستان لپاره د چین د سفیر جاو شېنګ د لیدنې په اړه انځور نه دی خپور کړی.

د ریاست الوزرا اداري مرستیال له چین څخه په داسې حال کې د روغتونونو لپاره عصري وسایل غواړي، چې د دې ډلې مشر په تازه فرمان کې په طبي انسټیټیوټونو کې د نجونو پر زده کړو بندیز لګولی دی.

چین له تېرو درې نیمو کلونو راهیسې له طالبانو سره په مختلفو برخو کې د همکاریو ژمنې کړې دي، خو تر اوسه ددغه هېواد کومه ستره نوې پروژه یا د مرستې کمپاین نه دی لیدل شوی.

د طالبانو د کندهار د کرنې ریاست د مرغومي پر ١٦مه نېټه خبر ورکړ چې په سلګونو طوطیان د نړيوالو روغتيايي سندونو د ترلاسه کولو په مقصد له ازموينو وروسته کويټ ته لېږدول شوي دي.

باختر اژانس کویت ته د دغو مرغانو د صادرولو د عاید په اړه نور جزئیات نه دي ورکړي.

د معلوماتو له مخې، له دې وړاندې هم د کندهار له یوه خصوصي ژوبڼ څخه قطر ته ۳۰۰ طوطیان صادر شوي دي.

په راپور کې ویل شوي، چې "لاوبیرډ" طوطیان د ښکلا او بېلو ځانګړتیاوو له امله په نړیوالو بازارونو کې ډېر ارزښت لري.

دا راپور په داسې حال کې خپرېږي، چې په افغانستان کې د نادرو مرغانو او ژویو د ښکار په اړه اندېښنې شته.

که څه هم د طالبانو مشر هبت الله اخوندزاده په یوه ځانګړي فرمان کې د نایابه مرغانو پر ښکار بندیز لګولی، خو لا هم د دغو مرغانو د ښکار او قاچاق راپورونه خپرېږي.

د متحده ایالاتو نوی ټاکل شوی ولسمشر ډونالډ ټرمپ به د دې میاشتې په پای کې واک واخلي. نوموړي د اوکراین د درې کلنې جګړې د ژر پای ته رسولو ژمنه کړې ده.

زیلېنسکي وویل چې د بېلابېلو شریکو هیوادونو استازي به د پنجشنبې په ورځ په جرمني کې د رامسټاین هوایي اډې غونډه کې ګډون وکړي. هغه وویل، « په دې کې هغه هیوادونه هم شامل دي چې کولی شي زموږ وړتیاوې نه یوازې د توغندیو پر وړاندې، بلکې د لارښودو بمونو او روسي هوايي ځواک پر وړاندې هم پیاوړې کړي».

هغه زیاته کړه، « موږ به دا موضوع ورسره وڅیړو او هڅه به وکړو چې هغوی قانع کړو».

د متحده ایالاتو د دفاع وزیر لوید جي اسټین به په دې غونډه کې ګډون وکړي.

د بایډن ادارې په خپله وروستۍ موده کې هڅه کوله چې د ټرمپ له ټاکل کیدو مخکې اوکراین ته تر ټولو زیاتې پوځی مرستې ورکړي.

ټرمپ د خپل انتخاباتي کمپاین په ترڅ کې ادعا کړې وه چې هغه کولای شي جګړه په یوه ورځ کې پای ته ورسوي.

د هغه څرګندونې دې پوښتنې ته لار هواروي چې ایا واشنګټن به د اوکراین ستر او تر ټولو مهم پوځی ملاتړی پاتې شي که نه؟

زیلېنسکي تېره اونۍ وویل چې ټرمپ «قوي او نااټکلېدونکی» دی او دا ځانګړې کولای شي پر اوکراین د روسیې د برید پر وړاندې د هغه په سیاست کې ټاکونکې وي.

روسیه د اوکراین پر پنځمې برخې کنټرول لري او تېر کال یې ددغه هېواد په ختیز کې ورو ورو پرمختګ وکړ، سره له دې چې ګڼ مالي او ځاني زیانونه یې وګالل. د اې پي د رپوټ له مخې، د جګړې پر لور تمایل د اوکراین په ګټه نه دی، ځکه دغه هیواد د لومړۍ کرښې په ډګر کې کمزوری دی او د خپلو لویدیزو شریکانو دوامدار ملاتړ ته اړتیا لري.

پوځي شنونکي وايي چې اوکراین شاوخوا ۴۰٪ ځمکه له لاسه ورکړې ده.

د افغانستان د بهرنیو چارو پخوانی وزیر محمد حنیف اتمر نن یکشنبه« د مرغومي ۱۶مه» پر خپل اېکس د ډیورنډ کرښې په اړه غبرګون ښودلی دی.

اتمر وايي، « د ډیورنډ کرښې لاسلیک‌کوونکي او هغه کسان چې د هر دلیل له مخې یې مني، دا حق له پامه غورځولی او له همدې کبله زموږ د ملت د ارادې له مشروعیت څخه برخمن نه دي.»

اتمر وايي چې د نورو ملتونو بریالیو تجربو ته باید پام وشي او ټینکار کوي چې «زموږ خلک به خپله مشروع مبارزه د ځمکنۍ بشپړتیا، خپلواکۍ او ملي حاکمیت لپاره د ولس د ازادو رایو پر بنسټ مخته یوسي».

یوه اونۍ وړاندې د طالبانو د دفاع وزارت ویاند عنایت الله خوارزمي ویلي و، چې د دوی حکومت هم پښتونخوا د پاکستان د خاورې برخه نه ګڼي.

د طالبانو دفاع وزارت ویاند عنایت الله خوارزمي د رویټرز خبري اژانس د دې پوښتنې په ځواب کې چې ایا دغه څرګندونې یې پاکستان ته اشاره ده، وویل، "موږ دا د پاکستان خاوره نه ګڼو، نو موږ دا نه شو تاییدولی چې دا د پاکستان په خاوره کې بریدونه دي، خو دا برید "د فرضي کرښې بل اړخ ته شوی دی."

په لغمان کې څو سرچینو نن یکشبنه «د مرغومي ۱۶مه» افغانستان انټرنشنل ته وویل چې د طالبانو استخباراتو حبیب الله د تېرې چارشنبې په ورځ له خپل کور څخه وړی دی.

د حبیب الله یوه نږدې خپلوان وویل چې، « تر تېرې چارشنبې ورځې هم [نوموړی] په خپله دنده کې و، د طالبانو د استخباراتو دوو کارمندانو له ځان سره یووړ، نوموړي له هېچاسره ستونزه نه درلوده نو ځکه یې د طالبانو په وخت کې هم خپلې دندې ته ادامه ورکړه».

سرچینې افغانستان انټرنشنل ته وویل چې یو شمېر قومي مشرانو غوښتل حبیب الله له نږدې وګوري خو ځايي طالب چارواکو ورته د ملاقات وخت نه دی ورکړی.

تر دې دمه طالبانو د پخواني ولسوال او د دوی په حاکمیت کې د لغمان ولایت مقام اداري مامور حبیب الله د نیولو په اړه څه نه دي ویلي.

حبیب الله د لغمان دولت شاه ولسوالۍ د درنګي کلي اوسېدونکی دی او په تېر جمهوري حکومت کې د الینکار او دولت شاه ولسوالیو ولسوال هم پاتې شوی. نوموړي د طالبانو له حاکمیت وروسته ددې ډلې تر واک لاندې د لغمان ولایت مقام په اداري برخه کې دنده درلوده.

د روان کال «د وري پر دویمه» سرچینو افغانستان انټرنشنل ـ پښتو ته وویل ، چې د ننګرهار زندان کې د پخواني جمهوري نظام ۲۳۱ سرتېري او استخباراتي کارکوونکي زندانیان دي خو تر اوسه د طالبانو محکمې ته نه دي وړاندې شوي.

که څه هم د طالبانو د واکمنېدو په درشل کې ملا هبت الله خپلو مخالفانو ته ټولبښنه وکړه، خو بیا هم وخت نا وخت د پخواني نظام کارکوونکي په تېره نظامیان په مرموز ډول وژل کېږي او یا هم د دې ډلې په زندانونو کې شکنجه او ځینې وخت وژل کېږي.