د وروستي جمهوري نظام پخواني لوی څارنوال محمد فرید حمیدي د افغان کرېکټ ملي لوبډلې ضد کړیو ته په غبرګون کې لیکلي، چې د افغانستان ورزشي لوبډلې تل د فاشیستي فکرونو او ګوندي ذوقونو قرباني شوي. نوموړی زیاتوي، چې راشد خان تل د نجونو د زده کړو ملاتړ کړی.
په افغانستان کې د طالبانو له لورې په ښځو او نجونو د سختو بندیزونو له امله د بریتانیا پارلمان ۱۶۰ غړو له بریتانیایي لوبډلې غوښتي وو، چې له افغانستان سره په راورانو چمپينز ټرافي سیالیو کې ونه لوبیږي، خو د بریتانیا کرېکټ بورډ دغه غوښتنه رد کړه.
ددې ترڅنګ په ټولنیزو شبکو ځينې اسناد خپاره شوي، چې د افغانستان پارلمان پخوانۍ غړې فوزیه کوفي د بریتانیا پارلمان ته لیک استولی او ترې غوښتي یې دي چې له افغان کرېکټ لوبډلې سره باید لوبې لغوه کړي، خو تر اوسه مالومه نه ده چې ایا دا لیک اغلې فوزیه کوفي پورې اړه لري او کنه؟
پخواني لوی څارنوال محمد فرید حمیدي په خپله اېکس افغان ورزشي لوبډلې د قومي او کوندي سیاستونو قرباني یادې کړي او لیکي یې دي: «څه موده وړاندې د طالبانو د ډلې مشر کرېکټ غیر اسلامي او حرام بللی و او د دغې ډلې په څانګو او دفترونو کې پرې بندیز لګول شوی و. له دې وروسته د دې ډلې د پلویانو له خوا د کرېکټ د لوبې پر ضد د اعتراضونو سیلاب راغی. کله چې راشد خان او د ټیم نورو غړو د نجونو د تعلیم له حق څخه ملاتړ وکړ، د واکمنې ډلې د یو شمېر پلویانو او غړو له خوا سپک او تهدید شول».
حمیدي لیکلي، چې ورزش که څه هم له سیاست نه جلا کیږي خو له سیاستوالو باید لرې وساتل شي او زموږ لوبډلې تل د سیاسیونو قرباني دي.
هغه وایي: « دا د یوځای کیدو وخت دی، د هر هغه ټکي څخه ډډه وکړئ چې د اختلاف لامل کیږي، د افرادو او افرادو په یووالي او برابرۍ سره د اشغال، ښکاره ظلم، استبداد او جهالت څخه د هېواد ژغورل ممکن دي، د کرکټ د ټیم د بایکاټ عمل د ترهګرو دریځ پیاوړی کړی او د طالبانو د مخالفینو ترمنځ یې ژور درز رامنځته کړی دی. ګټونکی څوک دی؟»
تر دې واړندې په ملګرو ملتونو کې د افغانستان د دایمي استازولۍ سرپرست نصیراحمد فایق د افغان کرېکټ ملي لوبډلې په ملاتړ ویلي وو، چې ورزش باید سیاسي نه شي او د طالبانو د ځپلو او سزا ورکولو لپاره نورې لارې هم شته.
