د فرانسې ولسمشرۍ ماڼۍ د پنجشنبې په ورځ د سعودي له ولیعهد سره له ټلیفوني خبرو وروسته په یوه بیان کې وویل، فرانسه په پام کې لري چې د فبرورۍ په دیارلسمه په پاریس کې د سوریې په اړه یو کنفرانس جوړ کړي.
د فرانسې ولسمشر امانویل مکرون د سعودي له ولیعهد محمد بن سلمان سره ټیلیفوني خبرې کړي. د مکرون دفتر وویل چې د دواړو مشرانو خبرې د سوریې پر وضعیت راڅرخېدې.
په بیان کې ویل شوي: "دواړو هېوادونو مشرانو د یو عادلانه او ټول شموله سیاسي لیږد د ملاتړ لپاره خپلې ژمنې تکرار کړې چې د ټولو سوريایي وګړو حقونو ته په کې درناوی وي."
چارواکو په وینا، په فرانسه کې د سوریې په اړه د کفرانس موخه په سوریه کې د بشاالاسد د کورنۍ له نیمې پېړۍ واکمنۍ ړنګېدو وروسته له دغه جګړه ځپلي هېواد د واک د انتقال ملاتړ دی.
افریقايي هېواد موریتانیا څخه هسپانیا ته تلونکې د ناقانونه کډوالو کښتۍ د ډوبیدو په پیښه کې د ۴۴ پاکستانیانو په ګډون ۵۰ تنه مړه شوي دي. د بشري حقونو سازمان په وینا، د جنورۍ په ۱۲ د اسپانیا سمندري ژغورونکو د کښتۍ د ورکېدو په اړه خبر ورکړی وو.
د رسنیو د راپورونو له مخې، دغه کښتۍ چې ۸۶ تنه کډوال په کې سپاره وو د جنورۍ په دوېمه نېټه له موريتانيا څخه حرکت کړی وو، د مراکش چارواکي وايي، په کښتۍ کې ټول ۶۶ پاکستانیان سپاره وو، چې د کشتۍ په پېښه کې ۳۶ کسان ژغورل شوي دي.
په پېښه کې د مړو شویو کورنیو پاکستاني رسنیو ته ویلي، چې د کورنۍ غړو یې غوښتل چې اروپا ته لاړ شي خو د پېسو او خوراکي توکو د نه شتون له امله یې ښکتۍ ډېره موده د سمندر په اوبو کې بنده پاتې وه چې دغه پېښه رامنځته شوه.
له پېښې څخه ژوندی پاتې شوی پاکستانی سړی وایي:« کله چې کښتۍ په سمندر کې ولاړه وه، نو د سختې يخنۍ له امله ځينې کسان ناروغه شول او په کښتۍ کې خوراکي توکي هم کم و او انساني قاچاقبرو د پېسو غوښتنه کوله، ځينې کسان چې ناروغان وو د قاچاقبرو له لورې سمندر ته وغورځول شول او مړه شول.»
د پاکستان ولسمشر او لومړي وزير د دغې پېښې په اړه خواشيني څرګنده کړې او په پېښه کې د وژل شويو پاکستانيانو له کورنيو سره يې خواخوږي کړې.
یاده دې وي چې اکثریت نا قانونه کډوال په لرګینو کښتیو کې چې سر یې خلاص وي، د اتلانتیک په سمندر کې د کنري ټاپو ته ځانونه رسوي خو یو شمیې نور بیا چې مراکش، الجزایر او منځني ختیځ د نورو هېوادونو څخه د هسپانیا په لور حرکت کوي، د مدیترانیې بحیرې او اتلانتیک سمندر د لارې د هسپانیا خاورې ته داخلیږي. پدې خطرناکې لارې هر کال زرګونه کډوال مړه کیږي.
د ایران د کیهان ورځپاڼي مشر، د ایران ولسمشر مسعود پزشکیان له این بي سي نیوز سره مرکه کې په هغه څرګندونو نیوکې کړي چې ویلي یې وو موږ د متحده ایالاتو منتخب ولسمشر ډونالډ ټرمپ د وژلو پلان نه درلود.
تېره اونۍ مسعود پزشکیان له این بي سي نیوز سره په خبرو کې وویل ایران هېڅکله د امریکا د ۲۰۲۰ کال د ایران د لوړ پوړي پوځي قوماندان قاسم سلیماني د وژلو په غچ کې د ټرمپ د وژلو هدف نه درلود.
د کیهان مدیر حسین شریعتمداري د پنجشنبې په ورځ دایران ولسمشر ته په ورځپاڼه کې لیکلي:"تاسو ولې د این بي سي خبریال ته اجازه ورکړه چې د امریکا پر ځای ایران په کټ کې واچوي؟ موږ ترهګر نه یوو، مګر موږ ټرمپ او د هغه ځیني ملګري لکه مایک پامپیو، د ټرمپ د بهرنیو چارو وزیر د جنرال سلیماني او د هغه د ملګرو په وژنه کې د دوی د رول له امله د مرګ مستحق ګڼو."
شریعتمداري په ۱۹۹۳ کال کې د ایران د ستر رهبر علي خامنه يي له خوا په شخصي توګه د کیهان ورځپاڼې مدیر وټاکل شو.
نوموړي په دغه لیکنه کې زیاته کړې: " د ټرمپ او د سلیماني په وژنه کې دخیل نورو کسانو وژنه "د هر باعزته او متعهد ایراني مسلمان لپاره دیني او قانوني دنده ده. له همدې امله د یو باعزته او متعهد ایراني مسلمان په توګه ستاسو دنده دا ده چې دا الهي امر ترسره کړئ، نه دا چې د سلیماني له وژونکو سره خبرې وکړئ او یا له هغوی سره دوستانه تبادله وکړئ."
د ایران ولسمشر پزشکیان له این بي سي سره په خبرو کې د ایران له لورې د ټرمپ د وژلو هڅه رد کړه خو په ۲۰۲۳ کې د ایران انقلابي ګارډ د قول اردو یو جګپوري قوماندان په دولتي ټلویزیون کې وویل چې تهران هڅه کوي چې ټرمپ، پامپیو او د متحده ایالاتو د مرکزي قومندانۍ پخوانی مشر جنرال مکینزي د سلیماني د وژنې په غچ کې ووژني.
قاسم سلیماني د قدس ځواک د بهرنيو عملیاتو د څانګې مشر و، نوموړی د ۲۰۲۰ کال په جنورۍ کې د امریکا د بې پېلوټه الوتکې په برید کې ووژل شو او ددغه برید اجازه ډونالډ ټرمپ ورکړې وه چې هغه وخت د متحده ایالاتو ولسمشر و.
د نومبر په میاشت کې، د متحده ایالاتو د عدلیې وزارت یو ایرانی وګړی په دې تورن کړ چې د ټرمپ د وژلو لپاره یې د وژنې دسیسه جوړه کړې وه.
امریکايي چارواکو دا پلانونه د ایران د هغو هڅو یوه برخه وبلله چې د سلیماني د وژنې غچ اخلي.
په پام کې ده چې د دوشنبې په ورځ ډونالډ ټرمپ ته د متحده ایالاتو د ولسمشر په توګه واک وسپارل شي، تمه کېږي چې ټرمپ به یو ځل بیا د تېرې دورې په څېر په ایران د سخت فشار کمپاین پېل کړي.
د سوریې مشر احمد الشارع د پنجشنبې په ورځ وویل، چې هېواد یې چمتو دی چې په حایل زون کې د اسراییل سره د ملګرو ملتونو د ځواکونو هرکلۍ وکړي.
احمد الشارع رسنیو ته وویل:«په سیمه کې د اسراییل پرمختګ د ایراني ملېشو او حزب الله د شتون له امله و. د دمشق له ازادۍ وروسته، زه باور لرم چې دوی هېڅ شتون نه لري. داسې پلمې شته چې اسراییل نن ورځ د سوریې سیمو ته د بفر زون ته د پرمختګ لپاره کاروي.»
په ورته مهال د قطر لومړي وزیر شیخ محمد بن عبدالرحمن بن جاسم ال ثاني له اسراییل غوښتي چې سمدستي دې خپل ځواکونه له سوریې سره د ملګرو ملتونو له خوا له جوړ شوي حایل زون څخه وباسي.
نوموړي د پنجشنبې په ورځ په دمشق کې د سوریې د واکمن احمد الشارع سره یوځای په یوه خبري کنفرانس کې د وینا پر مهال د سوریې په سویل کې د جولان لوړو ته نږدې د سیمې د اشغالولو لپاره د اسراییلو پر اقداماتو نیوکه وکړه.
شیخ محمد وویل: "د اسراییلي اشغالګرو له خوا د بفر زون نیول یو بې پروا عمل دی، او باید ژر تر ژره وویستل شي."
شیخ محمد همدا ډول په دغه لېدنه کې ژمنه وکړه چې د سوریې د زیربنا د بیارغونې او د نوې ادارې ملاتړ ته به دوام ورکړي.
د جولان لوړې سیمې چې اسراییل او سوریه سره جلا کوي حایل زون اعلان شوی، دغلته تېره میاشت اسرییل خپل نظامي ځواکونو ځای پر ځای کړي.
فلسطیني روغتیایي چارواکو ویلي، چې په غزې تړانګه کې د حماس او اسراییل ترمنځ له ۱۵ میاشتنۍ جګړې د پای ته رسولو او له اوربند څو ساعته وروسته اسراییلي هوايي ځواکونو په دغه سیمه کې پراخ هوایي بریدونه ترسره کړي، چې نږدې ۷۷ فلسطنیان یې وژلي دي.
د پېچلي اوربند دا تړون د چهار شنبې په ورځ د قطر، مصر او امریکا په منځګړیتوب د خونړۍ جګړې او لسګونه زره انسانانو له وژنې وروسته ترسره شو.
دا تړون به د غزې له تړانګې د اسراییلي ځواکونو په تدریجي وتلو سره د یکشنبې په ورځ پلی شي، د تړون له مخې به له حماس سره یرغمل او د اسراییل سره فلسطیني بندیان له یو بل سره تبادله شي.
د خوړو د خوندېتوب کارپوهانو ویلي< چې دا تړون به په غزه کې د خوراکي توکو له سخت کمښت سره مخ د بې ځایه شویو فلسطنیانو له پاره د بشري مرستو د زیاتوالي ته لاره هواره کړي.
په غزه کې له تازه برېدونو ور,سته اسراییلي چارواکو ویلي< چې دا تړون تر هغې د منلو وړ نه دی چې تر څو د امنیتي کابینې او حکومت له خوا تصویب شوی نه وي.
د پښتونخوا په کورمه کې ځايي پولیسو رسنیو ته ویلي، چې له ټل دغې سیمې ته د خوراکي، درملو او نورو توکو په لیږدونکي کاران د برید په پایله کې یو سرتیری او شپږ وسله وال وژل شوي دي.
د پاکستان جیونیوز د راپور له مخې، له ټل څخه کورمې ته تلونکي دریم مرستندویه کاروان باندې راکیټي برید شوی، چې په پایله کې یې یو سرتیری وژل شوی دی.
د کورمې د پولیسو مرستیال وايي، په دغه برید کې د کاروان درې موټر زیانمن شوي او د امنیتي ځواکونو په ځوابي برید کې شپږ وسله وال وژل شوي او ۱۰ تنه نور ټپیان دي.
له دې وړاندې، د دریم کاروان په لومړي پړاو کې ۳۵ باري موټرونه کورمې ته درمل، خوراکي او نور توکي استول شوي و او د کاروان د لیږد امنیت ساتلو لپاره په لاره کې ګڼ امنیتي سرتیري ځای پر ځای شوي وو.
په راپور کې ویل شوي، چې له تېرو لسو ورځو راهیسي له کورمې څخه پېښور ته د ناروغانو د انتقال لپاره د هوایې امبولانس چوپړونه هم درول شوي او هلته ناروغان له سختو ستونزو سره مخ دي.
د کورمې ولسوالۍ د مرکزي روغتون مشر داکټر میرحسن جان وايي:«د درملو راوړلو او ناروغانو د لیږد لپاره د چورلکې چوپړونه د لسو ورځو راهیسې بند شوي دي موږ په دې اړه د ولسوالۍ مقام ته مکتوب هم لیږلی دی.»
دغه ډاکټر وايي، د ناروغانو د انتقال د سړک له لارې ناشونی دی او د هوايي امبولانس له لارې د ۷۴ ناروغانو د انتقال غوښتنه کوي.
خو د پښتوخوا د مذهبي چارو وزیر ویلي، چې کورمې ولسوالۍ ته د هوايي امبولانس چوپړونه فعاله دي.
د جنوري میاشتې په لومړیو ورځو کې په کوهاټ کې د کورمې تړون د سني او شیعه مذهبو ترمنځ لاسلیک شو او پرېکړه وشوه چې له دواړو غاړو به سپکې او درنې وسلې راټولوي.
په دغه تړون کې د تګ راتګ لپاره د لارو د خلاصولو پرېکړه هم وشوه، خو څو ورځې وړاندې په بګن کې د پولیسو د مشر جاوید الله پر موتریز کاروان تر برید وروسته کورمې ته د توکو د لیږد پروسه ټکنۍ شوې ده.