اروپايي ډېپلوماټان په دې لټه کې دي، چې سپینې ماڼۍ ته د متحده ایالاتو د منتخب ولسمشر ډونالډ ټرمپ له راستنېدو دمخه د ایران په اټومي پروګرام باندې د پوځي برید ګواښ کمولو لپاره کومه لاره شتون لري او کنه.
یوه جګپوړي اروپايي دیپلومات چې نوم یې ندی یاد شوی، له العربیه انګلیسي سره په خبرو کې ویلي: "موږ باور لرو چې اسراییل په منځني ختیځ کې د تېرو څو میاشتو له پرمختګونو وروسته د برید پرېکړه کړې ده."
ډیپلوماټ نه دي ویلي، چې برید احتمالي اټکل شوی، خو ویلي یې دي چې څو اروپايي هېوادونو د ټرمپ له راتلونکي ټیم سره خبرې پیل کړي چې وګوري ایا د ډیپلوماسۍ چانس شته او که د دغو اټومي وسلو د ترلاسه کولو له پاره به برید ترسره شي.
وروسته له هغې چې د نومبر په میاشت کې پټې ناستې پرته له رسنیز کېدو ترسره شوې، بریتانیا، فرانسې او جرمني د دوشنبې په ورځ له ایران سره د تهران د اټومي پروګرام په اړه خبرې اترې وکړې.
د ډسمبر په میاشت کې، درېیو اروپایي پلازمینو د ایران د یورانیمو د غني کولو ظرفیت په اړه "سخته اندیښنه" څرګنده کړه. پاریس وویل، چې د یورانیمو غني کول د "نه راستنیدو نقطې" ته نږدې شوی.
د بهرنۍ تګلارې تر ټولو سخته ننګونه چې ټرمپ به ورسره مخامخ شي ایران او د هغه اټومي پروګرام دی. د هغه راتلونکي ټیم ته نږدې سرچینو العربیه انګلیسي ته وویل چې د ټرمپ د فشار اعظمي کمپاین به سمدلاسه بیا پیل شي.
د مشرانو جرګې د بهرنیو اړیکو د کمېټې رییس جیم ریش د جمعې په ورځ وویل، چې امریکا به "په ایران باندې د ولسمشر ټرمپ د اعظمي فشار کمپاین ته راستون شي او د امریکا ملي امنیت به خوندي کړي."
شنونکي او ډېپلوماټان په دې باور دي چې د ایران د اټومي تاسیساتو په وړاندې د متحده ایالاتو یا اسراییل د مستقیم پوځي اقدام احتمال اوس تر بل هر وخت لوړ دی، په داسې حال کې چې د ډېپلوماټیک حل لپاره امکانات کم شوي دي.
