د اسراییل امنیتي کابینې د جمعې په ورځ (د مرغومي ۲۸مه) د اوربند موافقه تصویب کړه، چې د یکشنبې په سهار له غزې څخه د لومړنیو یرغمل شویو بیرته راستنیدو ته لاره هواره کړه او له دې سره د اسراییل او حماس تر منځ ۱۵ میاشتنې جګړ چې زرګونه کسان یې وژلي ودروي.
د رویټرز په وینا د سیمه ییزو چارواکو په وینا، د اسراییلي ځواکونو او حماس تر منځ جګړې د غزې ډېره ښاري برخه ویجاړه کړې، له ۴۶ زرو څخه ډېر خلک یې وژلي، او د سیمه ایزو چارواکو په وینا د جګړې څخه دمخه د ۲،۳ میلیون نفوس ډېری برخه یې بې ځایه کړې ده.
د قطر لومړي وزیر د چهارشنبې په ورځ وویل، چې په غزه کې د اسراییل او حماس ترمنځ د اوربند موافقه شوې او په غزه کې به اوربند د جنورۍ په ۱۹مه پیل شي.
د حماس د سرچینو په حواله وویل، چې حماس د اوربند له پیل څخه ۴۸ ساعته مخکې د بریدونو د درولو غوښتنه کړې ده.
په غزه کې لا هم د اسراییل بریدونه دوام لري او د اوربند د اعلان راهیسي، په غزه کې د اسراییل په بریدونو کې ۱۱۶ فلسطینیان وژل شوي دي.
د پاکستان پخواني کرېکټ ستوري او لومړي وزیر عمران خان ته د ځمکې د فساد په قضیه کې د ۱۴ کلونو بند سزا ور کول شوه. دا د نوموړي د ژوند د لوړو ژورو په لړ کې وروستۍ ده، چې له تیر یو نیم کال راهیسې په زندان کې دی.
۷۲ کلن عمران خان، ۲۰۲۲ کال کې پارلمان د بې باورۍ رایې ور کولو سره له واکه لرې کړ او وروسته له لسګونو قضیو سره مخ شو.
ښاغلي خان ته د ۲۰۲۳ کال په اګست میاشت کې د فساد په یوه بله قضیه کې هم د دریو کلونو بند سزا ورکړل شوې، چې له امله یې هغه څو میاشتې وروسته له عمومي ټاکنو بې برخې شو.
په زندان کې د عمران خان ساتلو له امله د ۲۰۲۴ کال په عمومی ټاکنو کې د نوموړي د ګوند نوماندانو خپلواک ګډون وکړ او د پارلمان ډیری څوکۍ یې هم وګټلې، خو د حکومت جوړولو لپاره د اړین اکثریت کې پاتې راغلل.
عمران خان د ده پرضد ټولې قضیې رد کړې او رویټرز ته یې ویلي؛ د پاکستان پوځ چې په ۱۹۴۷ کال کې له خپلواکۍ راهیسې د خپل تاریخ ډیره برخه په پاکستان واکمني کړې ده او استخباراتي اداره یې هڅه کوي چې دی او سیاسي ګوند یې له منځه یوسي.
خو پوځ چې د اټومي وسلو لرونکي پاکستان ځینې لویې اقتصادي ادارې هم کنټرولوي، په سیاست کې ځان بې طرفه وليب.
عمران خان چې د خپل واک پر مهال د پوځ د جنرالانو له لوري تر نیوکې لاندې راغی، د هغه وخت د پوځ د مشر جنرال قمر جاوید باجوه سره یې شخړه وشوه، چې د هغه د ګوښه کیدو لامل هم شوه.
عمران خان ویلي دي، که څه هم د پوځ مشري اوس د عاصم منیر په لاس کې ده، خو لا هم نوموړی او ګوند یې په نښه کوي.
د عمران خان د ګوند او د پاکستان د پوځ ترمنځ مخالفتونه هغه مهال ډیر شول، چې د ۲۰۲۳ کال په مۍ کې د خان له نیول کېدو وروسته د نوموړي ملاتړو د پاکستان په څو ښارونو کې د پوځ تاسیسات ویجاړ او لوټ کړل.
تر دغو لاریونونو وروسته د خان د سیاسي ګوند ځینو مشرانو له تحریک انصاف ګوند استعفا ورکړه او ګوند وايي چې لا هم د تحریک انصاف ګوند زرګونه پلویان بندیان دي.
عمران خان چې د کرکټ افسانوي لوبغاړی هم بلل کیږي، په ۱۹۹۲ کال کې یې پاکستان ته د نړیوال جام تر ټولو مهمه بریا ورپه برخه کړې ده.
نوموړي له فساد د پاک او سوکاله ملت لپاره سیاسي مبارزه پیل کړه او په ۲۰۱۸ کال کې یې واک ترلاسه کړ.
عمران خان د پاکستان تحریک انصاف (پي ټي ای) ګوند له جوړولو وروسته له دوو لسیزو مبارزو وروسته واک ته ورسېد.
په ۲۰۱۱ کال کې خان هغه ځوانان را جلب کړل چې د پراخ فساد، د برېښنا د اوږدمهاله کمښت او د زدکړې او بې کارۍ له بحرانونو مایوسه شوي وو.
له نوموړي سره د سیاسي مبارزي په ملاتړ کې له اروپايی هېوادونو پاکستاني کډوال یوځای شول او ان بهرنیو مشهورو کسانو او لوبغاړو یې هم ملتیا وکړه او په ۲۰۱۸ کال کې یې ټاکنې وګټلې.
ځینې څارونکي وايي، چې د ښاغلي خان ترټولو لوی دښمن د هغه خپله وینا او الفاظ و، چې د ملاتړو هیلې یې لوړې کړې.
عمران خان په اکسفورد پوهنتون کې د فلسفې او اقتصاد په برخه کې زدکړې کړې دي.
په کرېکټ کې د نوموړي ډیر شهرت هغه ته د پلې بوای شهرت هم ورکړی و.
د پاکستان پخواني لومړي وزیر عمران درې ځلې واده کړی دی.
نوموړي لومړی واده په ۱۹۹۵ کال کې د بریتانیايي سوداګر جیمز ګولډسمیت لور جمیما ګولډسمیت سره وکړ. دې جوړې، چې دوه زامن یې درلودل په ۲۰۰۴ کال کې طلاق واخیست.
خان د دوهم ځل لپاره د تلویزیوني خبریالې ریحام نایر خان سره واده وکړ خو په طلاق سره پای ته ورسید.
دریم واده یې د بشرا بي بي سره چې یوه روحاني مشره وه وکړ او اوس دواړه په زندان کې دي.
کله چې خان واک ته ورسېد، د یو داسې فلاحي دولت د جوړولو پلان یې پیل کړ چې د هغه په وینا د اسلامي نړۍ د ۱۴ پیړیو راهیسې یو مثالي نظام به وي.
خو د فساد پر ضد مبارزه چې، ځیني کسان یې له دندو ګوښه او بندیان کړل، خان د ډیرو کسانو له نیوکو سره مخ شو او دا کړنه یې د نوموړي له لوري د سیاسيی مخالفانو د ځپلو په مانا وبلله.
خان د ۲۰۲۲ کال په اپریل کې د لوړ انفلاسیون، د بودیجې مخ په زیاتیدونکي کسر او پراخ فساد له امله د خلکو د نا امیدۍ په منځ کې د لومړي وزیر له څوکۍ لرې شو، چې هغه یې د له منځه وړلو ژمنه کړې وه.
هغه مهال سترې محکمې د پارلمان د منحلولو په اړه د عمران خان پریکړه لغوه کړه او له هغه د واکمن ایتلاف جدا کیدل معنی دا وه چې هغه د باور رایه له لاسه ورکړه.
په دې سره، خان د پاکستان د ټاکل شویو لومړیو وزیرانو په نه ماتیدونکي قطار کې وروستی کس شو چې خپلې بشپړې دورې یې نه دي پوره کړې.
د پاکستان يوې محکمې نن جمعه د (مرغومې ۲۸مه) د ۱۹۰ میلیونه پونډو د فساد قضیې اړوند د تحریک انصاف ګوند بنسټګر او د پاکستان پخوانی لومړی وزیر عمران خان پر ۱۴ کاله بند او د هغه مېرمن بشریٰ بي بي په اوه کاله بند سزا محکومه کړه.
دغه پرېکړه د ناصر جاوېد رانا په نامه د یوه قاضي لهخوا د اډیاله زندان دننه واورول شوه.
د پاکستان جیونیوز د راپور له مخې، عمران خان د دغې پرېکړې د اورېدو لپاره د یاد زندان یوې بلې برخې ته لېږدول شوی و او د هغه مېرمن بشریٰ بي بي هم په دغه ځای کې حاضره وه. له دوی سره د دوی مشهورو وکیلانو لکه بیرسټر ګوهر، شعیب شاهین او سلمان اکرم راجه هم په دې اورېدنه کې ګډون کړی و.
د محکمې د پرېکړې له مخې عمران خان د ۱۴ کاله بند تر څنګ باید یو میلیون پاکستاني روپۍ جریمه هم باید پرې کړي. په ورته کې د هغه مېرمن بشری بي بي د اوو کلونو بند تر څنګ باید پنځه لکه پاکستاني کلدارې جریمې پر ورکړې محکومه شوې ده.
د محکمې قاضي دغه اعلان هم کړی که یادې جریمې ورنه کړل شي؛ نو عمران خان به شپږ میاشتې او مېرمن به یې درې میاشتې نور هم په بند کې پاتې کېږي.
د دې تر څنګ محکمه امر وکړ چې د القادر خیریه پوهنتون دې دولتي ملکیت وګرځول شي.
د عمران خان مېرمن بشریٰ بي بي د پرېکړې له اعلان وروسته د محکمې له تالار څخه بیا ځل نیول شوې ده.
د پاکستاني رسنیو د راپورونو له مخې د هر ډول امنیتي ګډوډۍ د مخنیوي لپاره د اډیاله زندان دننه او شاوخوا سخت امنیتي تدابیر نیول شوي وو. پولیس او په ځانګړي ډول ښځينه پولیسې او په ساده جامو کې امنیتي مامورین په سیمه کې ځای پر ځای شوي وو.
د ۱۹۰ میلیونه پونډو قضیه چې د القادر خیریه پوهنتون سره تړاو لري، د یوه کال په اوږدو کې له ۱۰۰ څخه زیاتو عدالتي غونډو کې وڅېړل شوه. د اصلي تور له مخې عمران خان په کابینه کې د یو پټ قرارداد د تصویب لپاره له خپل نفوذ څخه کار اخیستی دی.
همدارنګه د تورونو پر بنسټ بشریٰ بي بي د ناقانونه فعالیتونو په ترسره کولو کې کلیدي رول لوبولی دی.
دغه قضیه د ۲۰۲۴ د ډېسمبر په ۱۸مه نېټه د پرېکړې لپاره خوندي ساتل شوې وه؛ خو څو ځله د پرېکړې اعلان ځنډېدلی و او بالاخره د ۲۰۲۵ د جنوري په ۱۷ نېټه وروستۍ پرېکړه واورول شوه.
دغه پرېکړه په پاکستان کې د تحریک انصاف ګوند مشرانو اوپلویانو ته یوه دروند ګوزار بلل کېږي او د فساد پر ضد د مبارزې په برخه کې د پاکستان دننه یو له مهمو ګامونو څخه ګڼل کېږي.
د عمران خان د واکمنۍ پر مهال یو بل چارواکی او د (ای ایس ای) پخوانی مشر فیض حمید هم د فساد تر څنګ په بېلابېلو قضیو کې زنداني شوی دی.
پولیسو د پنجشنبې په ورځ وویل، چې په سویلي افریقا کې د سرو زرو په یوه پرېښودل شوي کان کې په ناقانونه توګه د کار کولو پرمهال د پولیسو او کان کیندونکو تر منځ د یوې میاشتې اوږدې شخړې په پایله کې د مړو شمېر لږترلږه ۷۸ ته لوړ شوی.
د سویلي افریقا چارواکو د کان کیندونکو پر مخ د خوراکي توکو او اوبو لارې تړلې وې.
د پولیسو ویاند اتلانډا ماتي رسنیو ته وویل، چې د محکمې په امر د ژغورنې په عملیاتو د ۷۸ جسدونو ترڅنګ ۲۴۶ ژوندي پاتې کسان د ځمکې له ژورو رایستل شوي دي.
ماتي د جزییاتو له ورکولو پرته وویل، چې د ژغورنې عملیاتو دمخه نهه نور جسدونه هم موندل شوي دي.
د پولیسو په دغه عملیاتو کې د مړو شویو کسانو د مړینې لامل نه دی په ډاګه شوی خو خلک فکر کوي چې زیاته مړېنه به د لوږې له امله رامنځته شوي وي.
دا څرګنده نه ده، چې کان کیندونکي څومره وخت لپاره تر ځمکې لاندې وو، خو سرچینو ویلي چي ځینې یې د اګست میاشت راهیسې په کان کې وو او ځينې نور یې له جولای کان ته کوز شوي وو.
په ژوندو پاتې کسانو کې یې زیات شمېر داسې وو چې کمزوري شوي وو او د تلو توان یې نه لره خو پولیسو وویل چې ټول ژوندي کسان به د ناقانوني کیندنې له امله ونیول شي.
د سویلي افریقا دویم لوی سیاسي ګوند، چې د حکومتي ایتلاف برخه ده، د یوې خپلواکې پلټنې غوښتنه کړې ترڅو معلومه کړي چې "ولې وضعیت دومره خراب شو."
ولسمشر ولادیمیر زېلېنسکي او د بریتانیا لومړي وزیر کییر سټارمر د جنورۍ په ۱۶ په کییف کې د دوی د لیدنې پرمهال د ۱۰۰ کلن شراکت تړون لاسلیک کړ. دا د همکارۍ پراخ تړون په پوځي، انرژۍ، ساینسي، کلتوري، اقتصادي او نورو برخو کې دی.
دا تړون د سوداګرۍ او شراکت ۲۰۲۰ او د ۲۰۲۴ دوه اړخېزه امنیتي تړونونو له مخې چې په خوا لاسلیک شوي وو جوړ شوی دی.
ددغه تړون د لاسلیک پر مهال سټارمر وویل: "د روسیې ولسمشر ولادیمیر پوتین هیله چې اوکراین له خپلو نږدې ملګرو څخه لیرې کړي یوه ستره ستراتیژیکه ناکامي وه."
هغه زیاته کړه، "د دې پر ځای، موږ د هر وخت په پرتله نږدې یوو او دا ملګرتیا به موږ د ملګرتیا بل پړاو ته ورسوي."
بریتانیا به د یاد تړون له مخې د اوکرایین لپاره نوې نظامي مرستې هم چمتو کړي، په دغه مرستو کې ۱۵۰ توپخانې ، د ګرځنده هوایي دفاع سیسټم او د متحدو هېوادونو سره د روزنې پراخه نوښتونه شامل دي.
سږکال، بریتانیا پلان لري چې اوکراین ته د درې میلیارده پاونډه په ارزښت بې سارې نظامي مرستې ورسوي.
په داسې حال کې چې سټارمر د زېلېنسکي سره د ولسمشرۍ په ماڼۍ کې لیدنه درلوده، د روسيې بې پېلوټه الوتکو د کییف ځينې سیمې په نښه کړې خو د اوکراین د دفاع هوایي سیسټم یې مخه ونیوله.
د کییر سټارمر نا اعلان شوی سفر اوکراین ته د هغه لومړی سفر دی. نوموړي د جولای په میاشت کې دنده پېل کړه، دا په داسې حال کې ده چې د اوکراین ولسمشر ولادیمیر زېلېنسکي راتلونکې اونۍ د ټرمپ له راستنېدو مخکې د خپل هېواد له متحدینو سره په جلا جلا غونډو کې د ګډون پلان لري.
د فرانسې ولسمشرۍ ماڼۍ د پنجشنبې په ورځ د سعودي له ولیعهد سره له ټلیفوني خبرو وروسته په یوه بیان کې وویل، فرانسه په پام کې لري چې د فبرورۍ په دیارلسمه په پاریس کې د سوریې په اړه یو کنفرانس جوړ کړي.
د فرانسې ولسمشر امانویل مکرون د سعودي له ولیعهد محمد بن سلمان سره ټیلیفوني خبرې کړي. د مکرون دفتر وویل چې د دواړو مشرانو خبرې د سوریې پر وضعیت راڅرخېدې.
په بیان کې ویل شوي: "دواړو هېوادونو مشرانو د یو عادلانه او ټول شموله سیاسي لیږد د ملاتړ لپاره خپلې ژمنې تکرار کړې چې د ټولو سوريایي وګړو حقونو ته په کې درناوی وي."
چارواکو په وینا، په فرانسه کې د سوریې په اړه د کفرانس موخه په سوریه کې د بشاالاسد د کورنۍ له نیمې پېړۍ واکمنۍ ړنګېدو وروسته له دغه جګړه ځپلي هېواد د واک د انتقال ملاتړ دی.