داعش وايي په تخار کې چینایی وګړی دوی وژلی

د طالبانو بهرنیو چارو وزارت د چهارشنبې په ورځ په یوه خبرپاڼه کې وویل، چې امیرخان متقي په افغانستان کې د ایران له سفير علي رضا بیکدلي سره په لیدنه کې ټينګار کړی، چې دواړه هېودونه دې د دوه اړخيزو اړیکو عملي پرمختګ ته لاره اواره کړي.

د طالبانو په خبرپاڼه کې راغلي، چې په ناسته کې د دوو اړخيزو اړیکو، د لوړې کچې د پلاویو پر تګ راتګ او اقتصادي همکاريو هم خبرې شوې.

امیرخان متقي په دې ناسته کې ویلي: «د چابهار بندر فعالیت او د ظرفیت لوړېدا د دواړو هېوادونو او د ټولې سیمې لپاره د ګډو ګټو ښه بېلګه جوړولای شي.»

د لوړې کچې پلاوي د ترکیب په اړه تر اوسه څه نه دي ویل شوي چې دا به د بهرنیو چارو وزیرانو په کچه وي او که د مرستیال وزیرانو په کچه به غوره کیږي.

کابل او تهران سیاسي او اقتصادي پراخې اړیکې لري او ایران طالبان خپل نږدې ملګري يادوي خو د نورو هېوادونو په څېر یې لا تر اوسه په رسميت نه دي پېژندلي.

د طالبانو سترې محکمې د چهار شنبې په ورځ د دریو جلا خبرپاڼو په خپرولو سره ویلي، چې د کندهار په لوړ میوند، د پروان په بګرام او د پکتیکا په خیرکوټ او جانیخېل ولسوالیو کې یې د لومړنیو محکمو د پرېکړو له مخې درې تنه د «لواطت» او یو بل اسلامي ارزښتونو ته د سپکاوي په تور په سزا رسولي دي.

د دغې ډلې د سترې محکمې خبرپاڼه کې د تورن کس د هویت له څرګندولو پرته راغلي، چې دوه ورځې وړاندې یې د کندهار ولایت په لوړ میوند ولسوالۍ کې یو کس چې په «لواطت» تورن و، په یو کال تنفیذي بند محکوم کړی او ۳۰ دُرې یې وهلی.

دې ډلې په بله خبرپاڼه کې ویلي، چې د پروان ولایت د بګرام ولسوالۍ د لومړنۍ محکمې د پرېکړې له مخې یې یو بل کس په درې کاله تتفیذی بند محکوم کړی او ۳۹ دُرې یې وهلی.

همدارنګه یادې سترې محکمې ویلي، چې د پکتیکا په خیرکوټ او جانیخېل ولسوالیو کې یې دوو کسانو ته د لواطت په تور او «دیني شعایرو او اسلامي ارزښتونو ته» د سپکاوي په جرم تعزیري سزا ورکړې.

په خبرپاڼه کې ویل شوي، چې مجرم کس یې ۳۹دُرې وهلی او په شپږ کال تنفیذي بند محکوم شوی او تورن کس یې ۲۰ دُرې وهلی او په اته میاشتې تنفیذي بند محکوم شوی.

طالبانو دا نه دي ویلي، چې تورنو کسانو ته یې د استیناف غوښتنې موقع ورکړې او که نه خو طالبان تل خلک تورنوي او بیا هغوی ته بله موقع نه ورکوي.

د طالبانو د دفاع وزارت وايي، د چهار شنبې په ورځ د دې ډلې دفاع وزیر مولوي محمد یعقوب مجاهد په کابل کې د سعودي عربستان له سفیر فیصل طلق البقمي سره لیدلي دي.

په خبرپاڼه کې ویل شوي، چې یعقوب مجاهد په افغانستان کې د سعودي عربستان د سفارت بیا پرانېستل مهم بللي او د دواړو هېوادونو اړیکې یې له عقیدتي او فرهنګي اړخه شریکې بللې دي.

د طالبانو دفاع وزارت په افغانستان کې د سعودي عربستان د سفیر له قوله لیکلي، چې نوموړي په دې لیدنه کې له افغانستان سره د دوه اړخیزو اړیکو او بشري، اقتصادي او سیاسي همکاریو د پراختیا په برخه کې د ریاض پر ژمنیتا ټینګار کړی دی.

د طالبانو د دفاع وزیر او د افغانستان لپاره د سعودي عربستان سفیر په داسې حال کې ویني، چې د دې ډلې د کورنیو چارو وزیر سراج الدین حقاني او د استخباراتو رییس عبدالحق وثیق تېره ورځ متحده عربي اماراتو ته د سفر پر مهال د دغه هېواد له مشر محمد بن زاید ال نهیان سره لیدلي.

د طالبانو بهرنيو چارو وزارت د چهارشنبې په ورځ په يوه اعلاميه کې ويلي، چې په کابل کې د ترکيې سفير جنک اونال هم ډاډ ښودلی، چې د دواړو هېوادونو ترمنځ د دیپلوماتيکو اړيکو پر ډېرېدو به کار وکړي.

طالبانو ویلي، چې په دې ناسته کې د دوو اړخيزو اړیکو زياتېدو او په سیاسي او اقتصادي برخو کې د پرمختګونو په تړاو هم بحث شوی.

د طالبانو یو شمېر چارواکو ترکیې ته له دې وړاندې رسمي سفرونه کړي او د سوداګرۍ، اقتصاد، سياسي او دوو اړخيزو اړیکو پر جوړېدو يې له ترکي چارواکو سره ناستې پاستې کړې دي.

ترکیه ظاهرا له طالبانو سره ښې اړیکې لري، خو دغه هېواد لا هم طالبان په رسمیت نه دي پېژندلي.

محمد جوانبخت د ایران ایلنا اژانس ته وویل، چې «دا موضوعات خپل ځانګړي پروتوکولونه لري. د بهرنیو چارو وزارت هم په فعال ډول او په جديت سره موضوع تعقیبوي. هیله لرو چې ښه پایلې ترلاسه شي او اندېښنې لرې شي».

نوموړی وايي، چې ایران دمګړۍ د اوبو په ټولو برخو کې ستونزې لري او په تخصصي ناستو کې باید د اوبو د ننګونو لپاره لارې چارې وموندل شي.

جوانبخت د یوه نندارتون په څنډه کې وویل، چې د تېرو لسیزو په ترڅ کې د هېواد صنعتګرو د پام وړ پرمختګ کړی، په ځانګړي ډول په تېرو ۳۰ کلونو کې د اوبو د پروژو په تخنیکي برخو کې له بهرنیو مشاورانو پرته جدي پرېکړې شوې دي.

هغه زیاته کړه چې اوس مهال د اوبو په برخه کې د ایران مهمې اړتیاوې داخلي صنعتګر پوره کوي.

د ایران د انرژۍ وزارت مرستیال په افغانستان کې د جوړو شویو بندونو په تړاو وویل، چې « د هلمند د حقابې په اړه موږ له ګاونډي هېواد سره تړون لرو او په دوامداره توګه یې تعقیبوو. د دې موضوع تخنیکي او حقوقي اړخونه پّ انرژۍ وزارت پورې اړه لري، او موږ یې په پوره دقت سره تعقیبوو».

هغه زیاته کړه: « مقابل اړخ [ طالبانو] ژمنه کړې چې همکاري وکړي او موږ هیله لرو چې مثبت پرمختګونه رامنځته شي».