په تاجکستان کې د افغانستان سفارت او سیاسي استازولۍ نن د یو غونډې په ترڅ کې د جرمونو نړیوالې محکمې له هغې پرېکړې هرکلی وکړ چې د طالبانو د مشر هبتالله اخوندزاده او د طالبانو د قاضي القضات عبدالحکیم حقاني د نیولو غوښتنه یې پکې کړې ده.
په دې غونډه کې په تاجکستان کې افغان سفیر محمد ظاهر اغبر دغه پرېکړه د عدالت پر لور یو مهم ګام وباله او ټینګار یې وکړ چې دا پرېکړه به د طالبانو جنایتونه نړیوالو ته ښکاره کړي.
هغه وویل: «دا پرېکړه به نه یوازې طالبان نور هم منزوي کړي، بلکې د نړیوالو ادارو له خوا د هغوی د جنایتونو د لا زیاتې څېړنې او مستند کولو لپاره به لار هواره کړي».
د اغبر په وینا، که څه هم د جرمونو نړیوالې محکمې خپله دنده په ښه توګه ترسره کړې، خو د طالبانو جنایتونه باید د دې ډلې د نورو غړو محاکمه کېدو ته هم لار پرانیزي.
هغه له نړیوالې ټولنې وغوښتل هغه کسان چې د بشري حقونو په نقض او د افغانانو پر وړاندې په جنایتونو کې لاس لري، په تور نوملړ کې شامل کړي او د خپلو اعمالو حساب ورکړي.
په دې غونډه کې د سفارت د معارف اتشې مېرمن سلطاني او نورو ښځینه ګډونوالو هم د جرمونو نړیوالې محکمې دا پرېکړه وستایله او دا یې د افغان ولس لپاره، په ځانګړي ډول د هغو ښځو لپاره چې د طالبانو تر جنسیتي تبعیض لاندې دي، یو قوي او هیلهبښونکی پیغام وباله.
