د طالبانو د دفاع وزير ملامحمد یعقوب په یوه غونډه کې وویل، چې د « خپلې عقيدې او ملي ګټو» په چوکاټ کې په ټولو برخو کې له ټولو هېوادونو سره تعامل ته تيار دي. نوموړي ويلي، چې دوی د نړۍ برخه ده او غواړي له دنیا سره ژوند وکړي.
د طالبانو د دفاع وزیر ملایعقوب د پنجشنې په ورځ د سردار محمد داود خان کمپلکس روغتون کې د څلورو طبي څانګو د پرانيستې په مراسمو کې وویل چې له ټولو هېوادونو سره په متقابل احترام اړيکي غواړي او دوی نه غواړي، چې افغانان بیا ناخوالو ته وګرځي.
هغه زياته کړه: «موږ د دې نړۍ يوه برخه یو. غواړو چې د دنیا سره ژوند وکړو.د ټولو اسلامي او ملي منافعو په نظر کې نيولو سره، په متقابل احترام ولاړې اړيکې ولرو، نه غواړو چې بیا پرديو اشغالګرو ته زمينه برابره شي».
د نوموړي په وینا، ځيني ستونزې درک کوي او د ملت ژغورنې لپاره به د ستونزو د حل لپاره کار کوي.
هغه وویل: «باید د دې ملت د ژغورنې هڅو ته دوام ورکړو، ځينې وختونه د ځينو مشکلاتو د حل په وجه تر هغه د لویو مشکلاتو سره موږ مخامخ کیږو.» نوموړي دا ونه ویل چې له کومو ستونزو سره مخ دي.
هغه غوښتنه وکړه، چې د تل پاتې ثبات لپاره باید حوصله وشي.
د طالبانو دفاع وزير په بهر کې له افغان ډاکټرانو غوښتنه وکړه، چې وطن ته راشي او د خلکو خدمت وکړی.
دغه طالب چارواکی پر داسي مهال له نړیوالو سره د تعامل غوښتنه کوي، چې له دې وړاندې د دې ډلې مشر هبت الله اخوندزاده په خپلو خبرو کې ویلي و، چې له نړۍ سره د تعامل هيڅ اړتیا نه لري او هيڅ وخت به «د شریعت پر سر معامله ونه کړي».
