د طالبانو د احصایې او معلوماتو ادارې مسولينو ویلي، چې د روان کال له پيل تر سلواغې مياشتي پورې يې دوه ميليونه هېوادوالو ته برېښنايي پېژندپاڼې وېشلې دي. د دغو طالب مسوولینو په وینا، واک ته له رسېدو وروسته یې تر ۹ میلیونه زياتو افغانانو ته برېښنايي پېژندپانې ورکړې دي.
د طالبانو د احصایې او معلوماتو ادارې مسوولينو د چارشنبې په ورځ په يوه خبري کنفرانس کې وویل، چې په تېرو ۱۱ میاشتو کې يې دوو میلیونو هيوادوالو ته د برېښنایي تذکرو د وېش ترڅنګ ۱۲۳ زره کسانو ته د برېښنایي تذکرو له ورکړې وروسته خدمتونه هم وړاندې کړي.
د طالبانو د یادې ادارې مرستیال محمدنبي نصرت زیاته کړه، چې د برېښنايي پېژندپاڼو د ترلاسه کوونکو شمېر ۱۵ ميليونه او ۳۳۰ زرو کسانو ته رسېدلی، چې له دې ډلې ۹ میليونه او ۳۰۷ زره نارينه او ۶ ميلیونه او ۲۱ زره یې ښځينه دي.
نوموړي د خپلې واکمنۍ په ترڅ کې د پېژندپاڼو د وېش اړوند وویل: « حاکمیت ته له رسېدو څخه تر اوسه په ټول هېواد کې نژدې ۹ ميليونه ۲ سوه ۲۱ زره کسانو ته الکترونيکي تذکرې ویشل شوې دي.»
دغه طالب چارواکي وویل، چې په پکتيا او پکتیکا ولایتونو کې ډيورنډ فرضي کرښې ته څېرمه يې د لرې پرتو ولسواليو د خلکو لپاره د برېښنایي پېژندپاڼو د ورکړې ګرځنده ډلې هم جوړې کړې، چې ژر به په کار پيل وکړي.
د طالبانو د دغې ادارې د مالوماتو له مخې، د پېژندپاڼو له وېش سره د عوايد د ټولولو پروسه هم په «شفافه او چټکه» توګه پر مخ روانه ده.
