د هند په همالیا ایالت کې د واورو ښوېیدو له امله د مړو شمېر ۸ تنو ته ورسېد
د هند د همالیا ایالت په اتراکنډ کې د واورې ښوییدنې له امله د مړو شمېر اتو تنو ته ورسېد. هندي چارواکو په دې سیمه کې د بند پاتې کارکوونکو د ژغورنې عملیات هم بشپړ کړي دي.
د هند د همالیا ایالت په اتراکنډ کې د واورې ښوییدنې له امله د مړو شمېر اتو تنو ته ورسېد. هندي چارواکو په دې سیمه کې د بند پاتې کارکوونکو د ژغورنې عملیات هم بشپړ کړي دي.
د جمعې په ورځ د همالیا ایالت په چمولي ولسوالۍ کې وروسته له هغه د لټون پراخ عملیات پیل شول، چې د واورې ښویېدنې له امله د سرحدي سړکونو سازمان ۵۰ کارګران په واورو کې ډوب شول.
د هند دفاع وزارت د یکشنبې په ماښام وویل، چې د وروستي ورک شوي کس مړی یې هم موندلی دی.
دغه وزارت په خپل اېکس کې لیکلي. " د مانا کلي د بیارغونې د کارګرانو د ژغورنې عملیاتو پای ته رسېدلي دي ،"
د هند پوځ دا هم ویلي، چې ژغورل شوي کارکوونکي تر درملنې لاندې دي او وضعیت یې د قناعت وړ دی.
د مصر د بهرنیو چارو وزیر وایي، چې د غزې د بیارغونې پلان چمتو دی او د مارچ په څلورمه به د عربي هېوادونو بېړنۍ غونډې ته وړاندې شي.
عربي هېوادونو د غزې د کنټرول او د فلسطینیانو د بیا مېشتېدو په اړه د متحده ایالاتو د ولسمشر ډونالډ ټرمپ پلان رد کړ.
د ټرمپ پلان چې د فېبرورۍ په څلورمه په غزه کې د اسراییل او حماس تر منځ د یوه نازک اوربند په ترڅ کې اعلان شو، فلسطینیان او عربي هېوادونه یې په غوسه کړل او د امریکا د لسیزو ډېپلوماسي یې د دوو دولتونو په حل باندې متمرکزې کړې.
د مصر د بهرنیو چارو وزیر په وینا، د دغه هېواد د بیارغونې پلان به په بشپړ ډول مصري یا عرب نه وي، بلکې نړۍوال ملاتړ او تمویل به ترلاسه کړي، ترڅو بریالی پلی شي.
نوموړي د مدیترانې په برخه کې د اروپايي اتحادیې له کمیشنر دوبراوکا سویکا سره په یوه خبري ناسته کې وویل: "کله چې په راتلونکي عربي سرمشریزه کې دا پلان تصویب شي موږ به له لویو مرسته کونکو هېوادونو سره ژورې خبرې وکړو."
د اوربند د دویم پړاو په اړه د پوښتنې په ځواب کې د مصر د بهرنیو چارو وزیر وویل، چې دغه هېواد به د اوربند د ټینګښت او د دویم پړاو د خبرو اترو د پیل لپاره خپلو جدي هڅو ته دوام ورکړي.
هغه د جنورۍ په میاشت کې د لاسلیک شوي اوربند په خوندي توګه د عملي کولو پر اهمیت ټینګار وکړ او د هغې د سم تطبیق په برخه کې یې خپله ژمنه بیا تکرار کړه.
نوموړي همداراز زیاته کړه: "لومړنى پړاو په برياليتوب سره پاى ته ورسېد او اوس موږ بايد د دويم پړاو خبرو اترو ته ولاړ شو، چې د اوربند د دوام لپاره کليدي دی."
د برېتانیا لومړي وزیر کییر سټارمر د یکشنبې په ورځ وویل، چې هغه متحده ایالاتو ته د باور وړ متحد په توګه نه ګوري. نوموړی وایي، چې اروپا باید د اوکراین لپاره تمویل ته دوام ورکړي، ترڅو په قوي دریځ کې د سولې خبرې وشي.
سټارمر په لندن کې د اروپا او نړۍ له نورو مشرانو سره د امنیتي سرمشریزې په پای کې په سپينه ماڼۍ کې د اوکراین د ولسمشر ولادیمیر زېلېنسکي او ډونالډ ټرمپ ترمنځ د توندو خبرو تبادلې ته په اشارې سره وویل، چې امریکا یو مهم متحد پاتې شوی دی.
سټارمر وویل: "متحده ایالات د څو لسیزو راهیسې د انګلستان لپاره د باور وړ متحد و او دوام لري." "هېڅ دوه هېوادونه دومره نږدې نه دي، لکه زموږ دوه هېوادونه."
سټارمر وویل، هغه پلان چې دی په اوکراین کې د سولې لپاره پرې کار کوي، موخه یې د متحده ایالاتو ملاتړ ترلاسه کول دي.
نوموړي وویل، چې انګلستان به د اوکرایین لپاره د ۵۰۰۰ هوایی دفاعي توغندیو د صادرولو لپاره ۱.۶ میلیارد پونډه (۲ میلیارد ډالر) ولګوي.
له دې سره، نوموړي خبرداری ورکړ چې اروپا باید د ځان په دفاع کې دروند بوج په خپلو اوږو پورته کړي.
دا غونډه دوه ورځې وروسته له هغه کېږي، چې د اوکراین لپاره د متحده ایالاتو ملاتړ له خطر سره مخ شو.
د متحده ایالاتو ولسمشر ډونالډ ټرمپ د اوکراین ولسمشر ولادیمیر زېلېنسکي په کلکه وغانده او ویې ویل، چې هغه د متحده ایالاتو له ملاتړ څخه منندوی نه دی.
د ترکیې د انرژۍ وزیر الپ ارسلان بیرقدار وایي، چې د ترکمنستان ګاز به د دوشنبې په ورځ (د کب ۱۳مه) د ایران له لارې ترکیې ته انتقال شي.
هغه زیاته کړه: «دا ګاز به په لومړي کال کې یو نیم میلیون کورونو ته ووېشل شي او هڅه به وکړو چې د کال په پای کې د وارداتو کچه لوړه کړو.»
نوموړی وایي، چې په دې برخه کې د ۵ کلونو تمدید په لټه کې دي او له دې وروسته به د کاسپین سمندر له لارې د ګازو لېږد تعقیب او د منځنۍ او اوږدې مودې لپاره د ګاز لېږد پایپونو له لارې د داخلي مصرف سربېره اروپا ته ګاز صادر کړي.
د تركيې د انرژۍ وزير همداراز وويل: «موږ اوسمهال له ۱۴ سیمو څخه ګاز واردوو او همدارنګه په يونان او بلغاريا كې دوه ځایونو ته ګاز صادروو.»
الپ ارسلان زیاته کړه، د دې اونۍ په پای کې به د ترکیې له اګدیر څخه نخچیوان ته د ګازو د لېږد پروژه هم پیل شي او د دواړو هېوادونو د ولسمشرانو رجب طیب اردوغان او الهام علییف له خوا د یو لړ مراسمو په ترڅ کې به نخچیوان ته د ګازو د لېږد پروسه پیل شي.
اسراییل د یکشنبې په ورځ غزې ته د بشري مرستو بار لاریو د ننوتلو مخه نیولې ده، ځکه د اسراییل او حماس ترمنځ د اوربند لومړی پړاو پای ته رسیدلی او تل ابیب د ۴۲ ورځني موقت اوربند غوښتنه کړې. پر همدغه مهال حماس د مصر او قطر له منځګړو د مداخلې غوښتنه کړې ده.
د اسراییل د لومړي وزیر بنیامین نتنیاهو دفتر ویلي، چې دوی د امریکا د ولسمشر ډونالډ ټرمپ د استازي سټیو ویټکوف له خوا د روژې په میاشت او د یهودانو په فسح کې په غزه کې د لنډمهاله اوربند وړاندیز منلی دی.خو حماس دا موقت اوربند رد کړی.
رویټرز وايي، که حماس هم موافقه وکړي، نو اوربند به د مارچ تر ۳۱مې شاوخوا د روژې تر پایه او د اپریل تر ۲۰مې شاوخوا د یهودانو د فسح تر رخصتۍ پورې وغځیږي.
د اوربند شرط دادی چې حماس به د اوربند په لومړیو کې یو شمېر ژوندي یرغمل او مړي اسراییل ته وسپاري او ددایمي اوربند توافق ته له رسیدو وروسته به پاتې نور یرغمل شوي د موقت اوربند تر پای ته رسیدو خوشي کوي.
حماس ویلي، د لومړني توافق له مخې، چې اوربند د دایمي سولې په موخه دویم پړاو ته داخل شي ژمن دی، خو ۴۲ ورځنی موقت اوربند یې رد کړی دی.
د حماس یوه لوړ پوړي چارواکي سمیع ابو ظهري د اسراییل له لوري غزې ته د توکو د ځنډولو په اړه رویټرز خبري اژانس ته ویلي، چې دا پریکړه به د اوربند په خبرو اترو اغیزه ولري.
د نتنیاهو دفتر وايي:«اسراییل به د خپلو یرغمل شویو کسانو له خوشې کیدو پرته اوربند ته اجازه ورنه کړي» او وايي، چې غزې ته به د ټولو توکو او اکمالاتو ننوتل ودرول شي.
پر همدغه مهال حماس د اسراییل دا اقدام "توهین" او "د تړون پر وړاندې یوه ښکاره کودتا" بللې ده.
حماس په یوه بیان کې ویلي: «موږ پر منځګړو غږ کوو چې پر اشغالګرو فشار راوړي چې د تړون له مخې خپلې ژمنې په ټولو مرحلو کې پوره کړي.»
پر همدغه مهال په شمالي او سوېلي غزه کې سیمه ییزو روغتیایی چارواکو ویلي، چې د اسراییل د ډزو له امله په جلا جلا بریدونو کې څلور فلسطینیان وژل شوي دي.
خو د اسراییل پوځ ویلي، چې د غزې په شمال کې د دوی سرتیرو ته نږدې شکمنو کسانو ماین ځای پرځای کاوه او دوی د ګواښ د له منځه وړلو لپاره هوايي برید کړی.
د برېتانیا لومړي وزیرکییر سټارمر د یکشنبې په ورځ له ټرمپ سره د کتنې د لغو کولو په تړاو د سیاسي ګوندونو غوښتنې رد کړې.
دا غوښتنې د اوکراین له ولسمشر ولادیمیر زیلینسکي سره د ټرمپ او د هغه د مرستیال د سپینې ماڼۍ له جنجال پاروونکې ناستې وروسته شوې دي.
د رویټرز د رپوټ له مخې، د سکاټلنډ ملي ګوند او ځینو نورو سیاستوالو له ټرمپ سره د رسمي کتنې د لغو کولو غوښتنه وکړه.
سټارمر ویلي، چې دی به دا غوښتنې ونه مني، ځکه دا د اروپا د سولې مساله ده او د بریټانیا کورنۍ سیاسي ناندرۍ نه دي.
سټارمر د دې پوښتنې په ځواب کې، چې دغه دولتي سفر باید لغو شي، پر سیاستوالو نیوکه وکړه، چې دده په وینا، داسې مهال له واشنګټن سره د اختلاف پراخېدو غوښتنه کوي، چې اروپا له واقعي ناوړه شیبې سره مخ ده. سټارمر بي بي سي ته وویل، « زه د ایس اېن پي او نورو په خبرو چې هڅه کوي لفاظۍ ډېرې کړي، نه تېروځم».
ټرمپ، چې مور یې له سکاټلنډه وه د برېتانیا د شاهي کورنۍ په اړه تل مثبته تبصره کړې.
د بریټانیا د پارلمان د بهرنیو اړیکو د کمیټې پخوانۍ رییسه الیشیا کیرنس وايي، سفر باید تر هغه وځنډول شي چې امریکا د اوکراین لپاره امنیتي ضمانت ورکړي.
په ورته وخت کې په یوه انلاین غوښتنلیک کې، چې د سفر د لغو کولو غوښتنه پکې شوې، تراوسه ۷۰ زره لاسلیکونه راټول شوي دي.