ایران وايي چې رسول سیاف تهران ته د درملنې لپاره ورغلی
د ایران د بهرنیو چارو وزارت وايي، پخوانی افغان جهادی مشر عبدالرب رسول سیاف تهران ته د درملنې په هدف ورغلی.
د ایران د بهرنیو چارو وزارت وايي، پخوانی افغان جهادی مشر عبدالرب رسول سیاف تهران ته د درملنې په هدف ورغلی.
نوموړي ددوشنبې په ورځ په یوه خبري ناسته کې وویل، « په عمومي ډول، زه باید ووایم چې د افغانستان ټولنه یوه متنوعه ټولنه ده، چې مختلف شخصیتونه او سیاسي ډلې پکې دي. دا چې څوک ایران ته سفر کوي، کومه حیرانوونکې خبره نه ده».
بقايي د پوښتونکي خبریال په ځواب کې زیاته کړه، « تر هغه ځایه چې زه معلومات لرم، هغه شخص چې تاسې ورته اشاره کوئ، د درملنې لپاره ایران ته راغلی دی».
د رسول سیاف د زوی له قوله، نوموړی له هند څخه، چې ددرملنې په برخه کې د سیمې تر ټولو غوره امکانات لري، ایران ته تللی دی.
د ایران د بهرنیو چارو وزارت ویاند د ایران او ترکیې د اړیکو په اړه هم خبرې وکړې او ویې ویل، چې اختلافات باید ځیرکانه حل شي او اړیکې زیانمنې نه شي.
نوموړي زیاته کړه، « موږ له ترکیې سره دوهاړخیزو اړیکو ته ډېر ارزښت ورکوو. موږ د دې اړیکو له متقابلو ګټو او تاریخي ارزښت څخه خبر یو».
هغه وویل، چې په سیمه کې د وروستیو بدلونونو اغیزې ورځ تر بلې راڅرګندیږي او ترکیه باید د خپلو پالیسیو پایلو ته ژوره کتنه وکړي.
بقايي زیاته کړه، « څه چې زموږ، ترکیې او نورو لپاره مهم وي، دا دي چې موږ باید له اختلافونو پاکه او باثباته سیمه رامنځته کړو. موږ په دې لاره کې جدي یو او باور لرو چې ترکیه د متقابلو ملي ګټو پر بنسټ د دوهاړخیزو اړیکو د ساتنې او پراختیا اهمیت درک کوي».
