د پاکستان د تحریک انصاف یا پيټيای یوه لوړپوړي غړي سلمان اکرم راجا د خېبرپښتونخوا ایالاتي حکومت د اطلاعاتو سلاکار بیرسټر سیف وروستۍ څرګندونې چې ګواکې عمران خان او د هغه مېرمن بشرا بيبي ته پېشلمی نه ورکول کېږي، «پروپاګنډ او نامسوولانه» بللې دي.
جیونیوز د سلمان اکرم راجا په حواله د سېشنې په ورځ (د مارچ ۴مه) په یوه راپور کې ویلي، چې خان او بشرا بيبي ته د پېشلمي او روژهماتي د نهورکولو په تړاو خپاره شوي راپورونه بېاساسه او درواغ دي.
نوموړي همدارازد تحریک انصاف د بنسټګر د ناسم روغتیايي وضعیت په تړاو وروستي راپورونه هم رد کړي او زیاتوي چې هغه بیخي ښه دی.
سلمان اکرم راجا دا څرګندونې داسې مهال کوي، چې تېره ورځ (دوشنبه) پاکستاني رسنیو ویلي و، چې مخکېنی لومړی وزیر عمران خان په اډیاله زندان کې د غوږونو پر ناروغۍ اخته شوی دی.
د راپورونو پر بنسټ، د «پېمز» روغتون څلور ډاکټران د خان لپاره اډیاله زندان ته ورغلي او د هغه معاینه یې کړې ده.
دا په داسې حال کې ده، چې څه موده مخکې د پاکستان تحریک انصاف ګوند د مخکېني لومړي وزیر عمران خان د ناسم روغتیايي وضعیت په تړاو اندېښنه ښودلې وه.
نوموړي ګوند د شهباز شریف په مشرۍ د پاکستان له حکومت څخه غوښتي و، چې د خان د معاینې او درملنې لپاره د نوموړي ډاکترانو ته اجازه ورکړي څو زندان ته ورشي.
د یادونې ده، چې د پاکستان له واکه پرځېدلی لومړی وزیر عمران خان او د هغه مېرمن بشرا بيبي د تېر ۲۰۲۴ کال د جنورۍ په ۱۷مه د دغه هېواد په راولپنډۍ ښار کې د یوې محکمې له خوا له اصلي بیو په کم ارزښت د دولتي سوغاتونو رانیولو په تور په ۱۴-۱۴ کاله بند سزا او د ۷۸۷ مېلیونه پاکستانۍ کلدارو په ورکولو محکوم شوي وو.
