د پاکستان د پوځ لوی درستیز جنرال عاصم منیر نن د پښتونخوا بنو ته د خپل سفر پر مهال یوځل بیا ادعا کړې، چې په ورستیو ترهګریزو بریدونو کې د بهرنیو وسلو کارول ښيي چې افغانستان د ترهګرو ډلو لپاره خوندي پټنځای دی.
د پاکستان د پوځ د رسنیو او اطلاعاتو د مرکز له لوري په خپره شوې خبرپاڼه کې لیکل شوي، چې د پاکستان د پوځ لوی درستیز جنرال عاصم منیر د پښتونخوا په بنو کې د موټر چاودنې او وسله وال برید له امله د ټپیانو د لیدنې پرمهال ویلي، چې ډیر ژر به د یاد برید غچ واخلي.
هغه نه دي ویلي، چې څه ډول غچ اخلي، خو تېرځل یې د افغانستان په پکتیکا ولایت کې هوايي بمبارۍ وکړې، چې ګڼو ملکي کسانو ته پکې مرګ ژوبله واوښته.
د پوځ په خبرپاڼه کې د عاصم منیر له قوله لیکل شوي، چې د ټي ټي پي په ګډوون ترهګرې ډلې له افغانستان څخه د پاکستان په وړاندې فعالیتونه کوي.
نوموړي په ټینګار سره ویلي، چې «په وروستیو ترهګریزو بریدونو کې د بهرنیو وسلو کارول د دې ثبوت دی چې افغانستان د ترهګرو لپاره خوندي پټنځای دی».
تر دې وړاندې هم پاکستان په وار وار ادعا کړي چې دا ډول بریدونه د افغانستان له خاورې تنظیم شوي، خو کابل د پاکستان دغه ډول ادعاوې ردوي.
د پښتخوا په بنو کې د سې شنبې په ماښام پر یوې پوځې چاوڼۍ موټر بم برید او وسله وال برید وشو. د پاکستان د پوځ د رسنیو مرکز ویلي، چې په دغو بریدونو کې د پنځو سرتیرو په ګډون ۱۸ تنه وژل شوي او ۳۲ تنه نور ټپیان دي.
