رویټرز راپور ورکړی، چې د اسراییل د لومړي وزیر بنیامین نتنیاهو د دفتر په یوه بیان کې راغلي، چې اسراییل به د دوشنبې په ورځ دوحې ته د اوربند د خبرو اترو د پرمختګ لپاره پلاوی واستوي. اسراییل دغه پلاوی د منځګړو د بلنې منلو وروسته لېږي.
دا هڅه د اسراییلیانو او فلسطینیانو تر منځ د جګړې د ختمولو او د اوږدې مودې سولې د ټینګښت په موخه روانه ده.
د راپورونو له مخې، د اسراییل پلاوی به په دې خبرو کې د اوربند شرایطو، د بشري مرستو لېږد او د دوه اړخیزو بندیزونو د کمولو په اړه بحث وکړي.
تر دې مخکې، د ملګرو ملتونو سرمنشي انتونیو ګوترېش ویلي و، چې د فلسطین خلک باید د حکومت کولو، د خپل راتلونکي د ټاکلو او په خپله خاوره کې د بشپړې ازادۍ او امنیت سره د ژوند کولو حق ولري.
ښاغلي ګوترېش دغه راز، پرته له کوم ځنډه د اوربند او یرغملو د خلاصون په اړه د خبرو اترو د بیا پیل غوښتنه هم کړې وه.
نوموړي دغه څرګندونې په قاهره کې د غزې د بیارغونې په اړه د عربي سرمشریزې له ګډون وروسته کړې وې.
هغه پر اېکس پاڼه کاږلي و: «په تېرو څو اونیو کې موږ د غزې د اوربند او د یرغملو د خلاصون په برخه کې د پام وړ پرمختګ لیدلی دی.»
د هغه په وینا، د دواړه خواوو لهخوا باید شوې ژمنې په بشپړ ډول پلي شي.
دغه مذاکرات د نړۍوالو فشارونو په ترڅ کې د دې لپاره روان دي، چې د جګړې له امله په سیمه کې بشري ناورین ته د پای ټکی کېښودل شي.
د غزې د روغتیا وزارت ویلي، چې د اسراییل د جګړې په ترڅ کې په غزه کې ۴۸ زره او ۴۵۳ فلسطینیان وژل شوي دي، په داسې حال کې چې ۱۱۱ زره او ۸۶۰ نور ټپيان شوي دي.
د ۲۰۲۳ کال د اکټوبر په اوومه د حماس په مشرۍ بریدونو کې په اسراییل کې لږ تر لږه یو زرو او ۱۳۹ کسان ووژل شول او له ۲۰۰ څخه زیات کسان یرغمل شول.
