د حقاني له استعفا وروسته د نوموړي پلویانو د هغه او د یعقوب مجاهد انځور خپور کړ

یادې جبهې ددغه بریدونو په تړاو په خپل اېکس کې لیکلي، چې وسله والو یې لومړی برید د کابل ولایت په خواجه سرای سیمه کې پر طالبانو کړی، چې په پایله کې یې دوه طالبان وژل شوي دي.

دوی زیاتوي، چې دویم برید یې د کابل ولایت په میربچه کوټ ښار کې ولسوالۍ ته څېرمه د طالبانو په پوستې کړی، چې یو طالب وسله وال یې وژلی او یو بل یې ټپي کړی دی.

د مقاومت جبهې د معلوماتو له مخې، دریم برید یې په کندوز ولایت کې د خان اباد ولسوالۍ اړوند پر طالبانو کړی، چې دوه طالب وسله وال یې پکې وژلي دي.

د اېکس په دغه پوسټ کې راغلي، چې په یادو بریدونو کې د طالبانو یو شمېر وسلې د دوی وسله والو ته په لاس ورغلي دي.

مقاومت جبهه زیاتوي، چې په دغه بریدونو کې د دوی وسله والو او ملکي وګړو ته زیان نه دی اوښتی.

یاده دې وي، چې د ملګرو ملتونو په راپور کې د مقاومت او ازادۍ جبهې تورنې شوې وې، چې په خپلو بریدونو کې یې ملکي وګړو ته زیان رسولی، خو ملي مقاومت جبهې دغه ادعاوې رد کړې وې.

د افغانستان د مسایلو دغه کارپوه د یکشنبې په ورځ له افغانستان انټرنېشنل سره په مرکه کې وویل، چې د حقاني ډلې استازي د دې شبکې له قوماندانانو غوښتي چې د هبت الله اخوندزاده پر وړاندې ودرېږي.

نوموړی همداراز وايي چې په افغانستان کې د حالاتو د پېچلتيا له امله د حقاني او هبت الله تر منځ د مخامخ جګړې اټکل کول ګران ښکاري.

د اروپايي ټولنې دغه پخواني جګپوړي ډیپلوماټ ویلي، چې له ۳۰ کلونو راهیسې له طالبانو سره تړلي مسایل تعقیبوي.

هغه دا هم وویل، چې د طالبانو ډېری غړي په ټيټه کچه او مشرتابه کې ناخوښه دي او احساس کوي، چې د پرېکړې کولو څخه پاتې دي.

دا څرګندونې په داسې حال کې کېږي، چې د طالبانو د کورنیو چارو وزیر سراج الدین حقاني له نږدې ۵۰ ورځو راهیسې په خپل دفتر کې نه دی لیدل شوی.

اخوا د افغانستان د ملي امنیت پخواني رییس ضیا سراج ویلي و، چې سراج الدین حقاني د وزیرستان او خوست ترمنځ په سرحدي سیمو کې اوسېږي.

په دې وروستیو کې په خوست کې د دغه لوړ پوړي طالب چارواکي یوه ویډیو هم خپره شوه.

د حقاني پلویانو په ټولنیزو شبکو کې د دې ډلې د کورنیو چارو د وزیر یوه ویډیو خپره کړې، چې په هغه کې یې د طالبانو د رژیم پر اطاعت ټینګار کړی دی.

دا په داسې حال کې ده، چې نن د دغه ډلې د بهرنیو چارو وزیر امیر خان متقي هم په ټینګار سره وویل، چې د طالبانو ترمنځ هېڅ ډول اختلافات نه شته او دوی د یوه امیر د اطاعت او امر لاندې دي.

داسې ښکاري، چې دوی هڅه کوي څو د حقاني او هبت الله ترمنځ د اختلافاتو راپورونه بې اساسه وښيي.

شواهد ښیي، چې د حقاني او هبت الله اخوندزاده تر منځ اختلافات مخ په زیاتېدو دي.

د طالبانو مشر د خپل کورنیو چارو وزیر واکونه محدود کړي او حقاني شبکه یو ګواښ بولي.

دا شبکه په طالبانو کې یوازینۍ ډله ده، چې د هبت الله ننګولو یا لرې کولو توان لري.

په کندهار کې د حقاني او طالبانو مشران د مهمو مسلو په سر اختلاف لري، په دغه اختلافي مسایلو کې د نجونو زده کړې او سیاسي مخالفینو سره د روغې جوړې خبرې شاملې دي.

پاکستان پرېکړه کړې، چې «د مارچ تر ۳۱مې» نېټې پورې په دغه هېواد کې میشت ټول افغان کډوال ووځي.

د خیبرپښتونخوا سر وزیر علي امین ګنډاپور په پېښور کې یوې خبري ناستې ته وویل چې د افغان کډوالو په اړه د مرکز پالیسي نیمګړې ده.

ګنډاپور نیوکه وکړه، چې په تیرو وختونو کې هم د افغان کډوالو د ایستلو پرېکړه کې له بشري حقونو سرغړونه شوې ده.

هغه وویل، چې له پاکستان نه د افغان کډوالو د ایستلو له پالیسۍ سره موافق نه دی.

له خبریالانو سره په خبرو کې علي امین ګنډاپور وویل هغه افغان کډوال چې غواړي د پاکستان تابعیت ترلاسه کړي باید د پاکستان تابعیت ورکړل شي.

هغه زیاته کړه: « باید هیڅ مساله نه وي، هغه افغانان چې جرمي سابقه ونه لري او په پاکستان کې پاتې کیدو ته لیواله وي، تابعیت ورکړل شي.»

خیبريښتونخوا د افغان کډوالو د تر ټولو سترې برخې کوربه توب کوي.

په افغانستان کې د کډوالو نړیوال سازمان مشرې موتیا مسکون د طالبانو د کډوالو او بېرته راستنېدونکو چارو له وزیر مولوي عبدالکبیر سره په ګډه کاري ناسته کې له ګاونډیو هېوادونو په زوره د افغان کډوالو د اېستل کېدو په تړاو اندېښنه ښوولې ده.

د پاکستان د ګمرک چارواکو د یکشنبې په ورځ وویل، چې د تورخم دروازې په تړل کېدو سره هره ورځ دواړه هېوادونه له دوه اړخیزې سوداګرۍ درې میلیونه ډالر له لاسه ورکوي.

چارواکو ویلي، چې د تورخم دروازې له لاري هره ورځ افغانستان نه د ۱،۶ میلیونه ډالرو په ارزښت واردات او د ۱،۴ میلیونه ډالرو په ارزښت صادارت کېږي.

د پاکستانو د ګمرکونو چارواکو ویلي، چې د تورخم دروازې په تړل کېدو سره د دواړو هېوادونو ترمنخ په تېرو ۲۲ ورځو کې د ۶۶ میلیونو ډالرو په ارزښت دوه اړخیزه سوداګري نه ده شوې.

پرهمدغه مهال د پاکستان د کډوالۍ ادارې ویلي، چې د تورخم دروازې له تړل کېدو وړاندې هره ورځ شاوخوا لس زره کسانو دواړو لوریو ته تګ راتګ کاوه خو له تېرو ۲۳ ورځو راهیسې دغه دروازه د سوداګرۍ ترڅنګ د پلي مساپرو پرمخ هم تړل شوې ده.

د تورخم دروازه ۲۳ ورځې وړاندې له هغه وروسته وتړل شوه، چې ډیورنډ کرښې ته څیرمه د طالبانو د پوستې له جوړولو سره پاکستاني ځواکونو مخالفت وکړ او د دواړو لوریو ترمنځ نښتې وشوې.

د تورخم ستونزې د حل په موخه د دواړو خواوو د سوداګرو او قومي مشرانو په ګډون یوه جرګه هم جوړه شوې، خو له څو ځله مذاکراتو وروسته بې پایلي پای ته ورسیده او دروازه لا هم د سوداګرۍ او تګ راتګ پر مخ تړلې ده.

د طالبانو تر واک لاندې د افغانستان د صنعت او سوداګرۍ وزارت نن یکشنبه « د کب ۲۶مه» په یوه خبرپاڼه کې ویلي، چې د یاد وزارت معین مولوي احمد الله زاهد د ازبکستان هیواد له یو شمېر پانګوالو سره لیدلي دي.

احمد الله زاهد د ازبک پانګوالو هرکلی کړی او د ساختماني او کان کیندنې په برخو کې د شته فرصتونو په اړه یې معلومات ور کړي دي.

طالبانو په خبرپاڼه کې د احمد الله زاهد په حواله لیکلي:«افغانستان اوس په بشپړ ډول خوندي دی او د دغو برخو لپاره د ودې او پرمختګ لپاره پراخه امکانات شته دي.»

زاهد ازبک پانګوالو ته ډاډ ور کړی، چې د پانګونې د بهیر د لا اسانتیا لپاره دغه ډله د داخلي او بهرني پانګه والو هر راز ملاتړ کوي.

هغه زیاته کړې چې د طالبانو صنعت او سوداګرۍ وزارت د هر ډول ملاتړ لپاره چمتو دی او د پانګوالو ستونزې او اړتیاوې به په لومړیتوب کې حل کړي.

د طالبانو په خبرپاڼه کې راغلي چې د صنعت او سوداګرۍ وزارت هیله څرګنده کړې، چې دا پانګونې به د افغانستان اقتصادي وده ښه کړي او د دواړو هېوادونو ترمنځ د اقتصادي اړیکو د لا ټینګېدو لامل به شي.